ବେଗୁସରାଏ ଲୋକସଭା ଆସନରୁ ଲଢିବେ ନାହିଁ କଂଗ୍ରେସ ନେତା କହ୍ନେୟା କୁମାର । ସିପିଆଇର ପ୍ରାର୍ଥୀ ଘୋଷଣା ପରେ ବଢିଲା ସସ୍ପେନ୍ସ
କନକ ବ୍ୟୁରୋ : ୨୦୧୯ରେ ବିହାରର ବେଗୁସରାଏରୁ ନିର୍ବାଚନ ଲଢିଥିବା କହ୍ନେୟା କୁମାରଙ୍କ ଟିକେଟ ଚଳିତ ନିର୍ବାଚନରେ ଇଣ୍ଡିଆମେଣ୍ଟ କାଟି ଦେଇଛି । ଭାରତୀୟ କମ୍ୟୁନିଷ୍ଟ ପାର୍ଟି କଂଗ୍ରେସ ଠାରୁ ଏହି ଆସନ ଛଡାଇ ନେଇଛି । ସିପିଆଇ ଏହି ଆସନ ପାଇଁ ପ୍ରାର୍ଥୀଙ୍କ ନାମ ଘୋଷଣା କରିଛି । ସିପିଆଇ ତରଫରୁ ବେଗୁସରାଏ ଆସନ ପାଇଁ ଦଳର ପୂର୍ବତନ ବିଧାୟକ ଅବଧେଶ କୁମାର ରାୟଙ୍କ ନାମ ଘୋଷଣା କରିଛି । ସିପିଆଇର ରାଷ୍ଟ୍ରୀୟ ମହାସଚିବ ଡି.ରାଜା ଏହି ଘୋଷଣା କରିଛନ୍ତି । ଶୁକ୍ରବାର ଦିନ ପାଟନା ଠାରେ ସାମ୍ବାଦିକ ସମ୍ମିଳନୀ କରି ଦଳ ଏହି ସୂଚନା ଦେଇଛି ।
Kanak News is now on WhatsApp
Join and get latest news updates delivered to you via WhatsApp
ସାମ୍ବାଦିକ ସମ୍ମିଳନୀରେ ଡି.ରାଜା କହିଛନ୍ତି କି, ଆମ ପାର୍ଟିର ବରିଷ୍ଠ ନେତା ତଥା ପୂର୍ବତନ ବିଧାୟକ ଅବଧେଶ କୁମାର ରାୟ ଲୋକସଭା ନିର୍ବାଚନ ଲଢିବେ । ଏହାସହ ଡ.ରାଜା କେନ୍ଦ୍ର ସରକାରଙ୍କୁ ଟାର୍ଗେଟ୍ କରି ଅରବିନ୍ଦ କେଜ୍ରିୱାଲଙ୍କ ଗିରଫକୁ କଡ଼ା ନିନ୍ଦା କରିଛନ୍ତି । ସେ କହିଛନ୍ତି କି, କେନ୍ଦ୍ର ସରକାର ସରକାରୀ ଏଜେନ୍ସିଗୁଡିକୁ ବ୍ୟବହାର କରୁଛନ୍ତି ।
ଜବାହରଲାଲ ନେହେରୁ ବିଶ୍ୱବିଦ୍ୟାଳୟର ପୂର୍ବତନ ଛାତ୍ର ସଂସଦ ସଭାପତି ତଥା ଏବେର କଂଗ୍ରେସ ନେତା କହ୍ନେୟା କୁମାର ୨୦୧୯ରେ ସିପିଆଇ ଟିକେଟରୁ ବେଗୁସରାଏ ଲୋକସଭା ଆସନରୁ ନିର୍ବାଚନ ଲଢିଥିଲେ । ତାଙ୍କର ପ୍ରତିଦ୍ୱନ୍ଦୀ ଥିଲେ କେନ୍ଦ୍ରମନ୍ତ୍ରୀ ଗିରିରାଜ ସିଂ । ହେଲେ କହ୍ନେୟା କୁମାର ଗିରିରାଜ ସିଂଙ୍କ ଠାରୁ ପାଖାପାଖି ୪.୫ ଲକ୍ଷ ଭୋଟରେ ପରାଜିତ ହୋଇଥିଲେ । ଏହାପରେ ସେ ସିପିଆଇ ଛାଡି କଂଗ୍ରେସରେ ଯୋଗ ଦେଇଥିଲେ ।