ଜ୍ୟୋତିଷ ହୋଇ କରୁଥିଲେ ଭବିଷ୍ୟବାଣୀ : ନିଯୁକ୍ତିି ଦେବା ଆଳରେ ବେକାର ଯୁବକ-ଯୁବତୀଙ୍କ ଲୁଟିଥିଲେ; ମିଛ ୱେବସାଇଟ୍ ଖୋଲି ଲୋକଙ୍କୁ ଲଗାଉଥିଲା ଚୁନା
କନକ ବ୍ୟୁରୋ : ଧରାପଡିଲା ଠକ ଜ୍ୟୋତିଷ ବିନୟ କୁମାର ଦାସର କାରନାମା । ତା ନାଁରେ ଆସିଛି ଅଭିଯୋଗର ଲମ୍ବା ଫର୍ଦ୍ଦ । ନିଯୁକ୍ତି ଦେବା ଆଳରେ ରାଜ୍ୟର ହଜାର ହଜାର ବେକାର ଯୁବକ ଯୁବତୀଙ୍କୁ ଠକୁଥିଲା । ଏପରିକି ନିଜେ ଜ୍ୟୋତିଷ ଶାସ୍ତ୍ରରେ ବିଶାରଦ କହି ଲୋକଙ୍କ ମିଛ ଭବିଷ୍ୟବାଣୀ ବି କରୁଥିଲା । ମିଛ ଭବିଷ୍ୟବାଣୀ କରି ବହୁ ଲୋକଙ୍କୁ ଲକ୍ଷ ଲକ୍ଷ ଟଙ୍କାର ଚୁନା ବି ଲଗାଇଛି ଠକ ବିନୟ ।
Kanak News is now on WhatsApp
Join and get latest news updates delivered to you via WhatsApp
ବିଏ ପାସ କରିଥିବା ଜଗତସିଂହପୁର ବିରିଡି ଅଞ୍ଚଳର ବିନୟ କୁମାର ଦାସର ଗିରଫଦାରୀ ପରେ ଏଭଳି ସାଂଘାତିକ ତଥ୍ୟ ସବୁ ସାମନାକୁ ଆସିଛି । ଆଡଭାନସଡ ଏ ଟି ଜେଡ ସଲ୍ୟୁସନ ନାମରେ ଏକ କମ୍ପାନୀ ଖୋଲି ଲୋକଙ୍କୁ ମିଛ ନିଯୁକ୍ତିର ପ୍ରତିଶ୍ରୁତି ଦେଖାଉଥିଲା । ଏପରିକି ଶିକ୍ଷକତା, ବ୍ୟାଙ୍କିଙ୍ଗ,ଆଇଟି ଇଂଜିନିୟର,ସ୍ୱାସ୍ଥ୍ୟସେବା, ମାର୍କେଟିଙ୍ଗ କ୍ଷେତ୍ରରେ କର୍ମନିଯୁକ୍ତିର ଲୋଭ ଦେଖାଉଥିଲା । ଅନଲାଇନରେ ବରକନ୍ୟା ଯୋଗାଡ ପାଇଁ ଫେକ ମାଟ୍ରିମୋନି ସାଇଟ ବି ଖୋଲିଥିଲା ।
ଜ୍ୟୋତିଷ ଶାସ୍ତ୍ରରେ ପାରଙ୍ଗମ ଥିବା କହି ଏ ଟୁ ଜେଡ ଆଷ୍ଟ୍ରୋ ଡଟ କମ ନାମକ ଏକ ୱେବସାଇଟ ବି ଖୋଲିଥିଲା । ହୋମ ସର୍ଭିସ ଦେବା ନାଁରେ ବି ଏ ଟୁ ଜେଡ୍ କ୍ୱିକ ସର୍ଭିସ ନାଁରେ ଏକ ୱେବସାଇଟ ବି ଖୋଲିଥିଲେ । ଯିଏ ଯୋଗାଯୋଗ କରୁଥିଲେ ସେମାନଙ୍କ ନମ୍ବରକୁ ଟ୍ରାପ କରିବା ଆରମ୍ଭ କରିଦେଉଥିଲା ଠକ ବିନୟ । ନିଜ ଅଫିସକୁ ଡାକି ପଂଜୀକରଣ ଆଳରେ ପର୍ଯ୍ୟାୟକ୍ରମେ ଟଙ୍କା ଲୁଟୁଥିଲା ।
ଏପରିକି ସନ୍ଦେହ ନହେବାପାଇଁ ଦେୟମୁକ୍ତ ଗ୍ରାହକ ସେବା ନମ୍ବର ବି ଜାରି କରିଥିଲା । ପାରାଦୀପ, ବଲାଙ୍ଗୀର ଓ କୋରାପୁଟରେ ବି ନିଜ ଅଫିସକୁ ଖୋଲିଥିଲା । କିନ୍ତୁ ଧରାପଡିବା ପରେ ନିଜ ଅଫିସ ପଞ୍ଜିକରଣ ବାବଦ କୌଣସି କାଗଜପତ୍ର ଦେଖାଇ ପାରିନଥିଲା । ବର୍ତମାନ ତଦନ୍ତରେ ଅଧିକ ତଥ୍ୟପାଇଁ ବାଦାମବାଡି ଥାନା ପୁଲିସ କର୍ପୋରେଟ ବ୍ୟାପାର ମନ୍ତ୍ରାଳୟକୁ ଅଧିକ ତଥ୍ୟ ମାଗିଛି ।