କନକ ବ୍ୟୁରୋ : ଆଦ୍ରିଜାଙ୍କ ଅଭିଯୋଗ ପରେ ପ୍ରତିକ୍ରିୟା ରଖିଲେ ସ୍ୱାମୀ ଅର୍କେଶ ସିଂହଦେଓ । କହିଲେ ବର୍ଷେ ହେବ ତାଙ୍କ ଭିତରେ ବିବାଦ ଆରମ୍ଭ ହୋଇଛି । ଘରୋଇ ହିଂସା ଭଳି ମିଛ ମାମଲା ତାଙ୍କ ନାଁରେ ଦିଆଯାଇଛି । ଡେରାଡୁନ୍ ତାଙ୍କ ନିଜ ଘରକୁ ତାଙ୍କୁ ଛାଡ଼ୁ ନାହାନ୍ତି । ଡେରାଡୁନ ସ୍ଥିତ ଘରେ ଆଦ୍ରିଜାଙ୍କ ବାପା, ମାଆ ଓ ଭଉଣୀ ରହୁଛନ୍ତି । ଘର ଲୋକଙ୍କ ନାଁରେ ମିଛ ମାମଲା କରିଛନ୍ତି ଆଦ୍ରିଜା । ୬ ମାସ ହେବ ମୁଁ ସେ ଘର ଛାଡ଼ି ଦେଇଛି । ୩ ଦିନ ତଳେ ଘରେ ଗୁଣ୍ଡା ପୁରାଇଥିଲେ ଆଦ୍ରିଜା । ଏସବୁ ଅଭିଯୋଗ କରି ଆଦ୍ରିଜା ଡ୍ରାମା କରୁଛନ୍ତି ବୋଲି କହିଛନ୍ତି ଅର୍କେଶ ।
Kanak News is now on WhatsApp
Join and get latest news updates delivered to you via WhatsApp
ଅନଙ୍ଗ ଉଦୟ ସିଂଦେଓଙ୍କ ସାନ ପୁଅ ଅର୍କେଶ ନାରାୟଣ ସିଂହଦେଓଙ୍କ ବିରୋଧରେ ଅଭିଯୋଗ ଆଣିଛନ୍ତି ତାଙ୍କ ପତ୍ନୀ ଆଦ୍ରିଜାମଞ୍ଜରୀ । ଅର୍କେଶଙ୍କ ସମେତ ତାଙ୍କ ଶ୍ୱଶୁର ଘର ଲୋକ ତାଙ୍କୁ ନିର୍ଯାତନା ଦେଉଥିବା ସେ ଅଭିଯୋଗ କରିଛନ୍ତି । ଏନେଇ ଉତରାଖଣ୍ଡ ଡେରାଡୁନ୍ ଥାନାରେ ଅଭିଯୋଗ କରିଛନ୍ତି ଆଦ୍ରିଜା । ପୋଲିସ ଏ ମାମଲାରେ କୌଣସି ପଦକ୍ଷେପ ଗ୍ରହଣ କରୁନଥିବାରୁ ସେ ଉତରାଖଣ୍ଡ ଡିଜିପିଙ୍କୁ ଭେଟିଛନ୍ତି । ୨୦୧୭ ମସିହା ନଭେମ୍ବର ମାସରେ ଆଦ୍ରିଜାଙ୍କୁ ବିବାହ କରିଥିଲେ ଅର୍କେଶ ।
ଆଦ୍ରିଜା ହେଉଛନ୍ତି ପୂୂର୍ବତନ ପ୍ରଧାନମନ୍ତ୍ରୀ ବିଶ୍ୱନାଥ ପ୍ରତାପ ସିଂହଙ୍କ ନାତୁଣୀ । ୨୦୧୯ ନିର୍ବାଚନରେ ଅର୍କେଶ ବଲାଙ୍ଗିର ବିଧାନସଭା ଆସନ ପାଇଁ ଟିକେଟ୍ ପାଇବା ପରେ ଆଦ୍ରିଜା ତାଙ୍କ ପ୍ରଚାର ମଙ୍ଗ ଧରିଥିଲେ । ନିର୍ବାଚନରେ ଅର୍କେଶ ପରାସ୍ତ ହେବା ପରେ ଡେରାଡୁନ୍ରେ ଥିବା ଅନଙ୍ଗ ଉଦୟଙ୍କ ଘରେ ରହୁଥିଲେ ସ୍ୱାମୀ-ସ୍ତ୍ରୀ । ଉଭୟଙ୍କ ଦାମ୍ପତ୍ୟ ଜୀବନ ଠିକ ଚାଲିଥିବା ବେଳେ ଗତ ବର୍ଷ ଅଗଷ୍ଟରୁ ଏପରି ନିର୍ଯାତନା ଆରମ୍ଭ ହୋଇଥିବା କହିଛନ୍ତି ଆଦ୍ରିଜା । ଏହା ସହ ସେ କହିଛନ୍ତି ମୂଳରୁ ଶାଶୂ ଶ୍ୱଶୂର- ଯାଆ-ଦେଢଶୂର ହଇରାଣ କରୁଥିଲେ । ତାଙ୍କ ମା’ଙ୍କ ଦେହ ଖରାପ ହୋଇଥିବାରୁ ସେ ଡେରାଡୁନ ଆସିଥିଲେ ।
ଏହି ସମୟରେ ଅର୍କେଶ ତାଙ୍କୁ ଛାଡ଼ପତ୍ର ନୋଟିସ୍ ପଠାଇଥିଲେ । ଏପରିକି କ୍ୟାମେରା ଲଗାଇ ତାଙ୍କ ଉପରେ ନଜର ରଖୁଥିଲେ । ସେ ନିର୍ବାଚନ ପାଇଁ ଟିକେଟ୍ ମାଗୁଛନ୍ତି ଓ ଶହେ କୋଟି ଟଙ୍କା ମାଗୁଛନ୍ତି ବୋଲି ଅର୍କେଶ ଅଭିଯୋଗ କରିଛନ୍ତି । ଏହା ସହ ବିଭିନ୍ନ ମିଛ ଅଭିଯୋଗ ଆଣି ତାଙ୍କୁ ଧମକାଉଛନ୍ତି । ଏସଂପର୍କରେ ବଲାଙ୍ଗିର ପୋଲିସକୁ ଜଣାଇବା ପରେ ଏକ ଆପ୍ଲିକେସନ୍ ଦେବା ପାଇଁ କୁହାଯାଇଥିଲା । ହେଲେ ପୋଲିସ ତାଙ୍କୁ କୌଣସି ପ୍ରକାରେ ସାହାଯ୍ୟ କରୁଥିବା ଅଭିଯୋଗ କରିଛନ୍ତି ଆଦ୍ରିଜା ।