ଓସ୍କାର ବିଜେତା ଗାୟକ ତଥା ସଙ୍ଗୀତ ନିର୍ଦ୍ଦେଶକ ଏଆର ରେହମାନଙ୍କୁ ନେଇ ଏକ ବଡ ଖବର ସାମ୍ନାକୁ ଆସୁଛି । ରବିବାର ଦିନ ମହାରାଷ୍ଟ୍ରର ପୁଣେରେ ରେହମାନ ଏକ ଲାଇଭ୍ ମ୍ୟୁଜିକ୍ କନସର୍ଟ ପରିବେଷଣ କରୁଥିଲେ, କିନ୍ତୁ ପୁଲିସ ଆସି ଏହି ମ୍ୟୁଜିକ୍ କନସର୍ଟକୁ ବନ୍ଦ କରିଦେଇଥିଲା । କନସର୍ଟ ସମୟ ସୀମା ଶେଷ ହେବା ପରେ ପୁଲିସ କଣ୍ଠଶିଳ୍ପୀଙ୍କୁ ମଞ୍ଚ ଉପରକୁ ଚଢ଼ି ଗୀତ ଗାଇବାରୁ ଅଟକାଇଥିଲା । ରାତି ୧୦ଟା ପରେ ଏଆର୍ ରହମାନଙ୍କ ଏହି ମ୍ୟୁଜିକ୍ କନସର୍ଟ ପରିବେଷଣ ପାଇଁ ପ୍ରଶାସନଠାରୁ କୌଣସି ଅନୁମତି ନିଆଯାଇନଥିବା ସୂଚନା ମିଳିଛି । ଯେଉଁଥିପାଇଁ ପୁଲିସ ଅଧିକାରୀ ଏହାକୁ ବନ୍ଦ କରିଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ଏପ୍ରିଲ ୩୦ ତାରିଖରେ ଏଆର୍ ରେହମାନ ପୁଣେର ରାଜା ବାହାଦୁର ମିଲ୍ ଅଞ୍ଚଳରେ ଏକ ଲାଇଭ୍ ମ୍ୟୁଜିକ୍ କନସର୍ଟରେ ନୃତ୍ୟ ପରିବେଷଣ କରିଥିଲେ। ଏଆର ରେହମାନଙ୍କ ଏହି ସଙ୍ଗୀତ ସମାରୋହରେ ବହୁ ସଂଖ୍ୟାରେ ଲୋକ ଯୋଗ ଦେଇଥିଲେ । ସେ ନିଜ ଯାଦୁକରୀ କଣ୍ଠରେ ଦର୍ଶକଙ୍କୁ ବାନ୍ଧି ରଖିଥିଲେ। କିନ୍ତୁ ରାତି ୧୦ଟା ଟପିବା ପରେ ପୁଲିସ ଘଟଣାସ୍ଥଳରେ ପହଞ୍ଚି ଲାଇଭ୍ ମ୍ୟୁଜିକ୍ କନସର୍ଟକୁ ଅଧାରୁ ଅଟକାଇ ଦେଇଥିଲା ।
ଜଣେ ପୁଲିସ ଅଧିକାରୀ ମଞ୍ଚ ଉପରକୁ ଚଢ଼ି ଏଆର ରେହମାନଙ୍କୁ କନସର୍ଟ ବନ୍ଦ କରିବାକୁ ସଙ୍କେତ ଦେଇଥିଲେ। ପରେ କାର୍ଯ୍ୟକ୍ରମ ବନ୍ଦ ହୋଇଯିବାରୁ ଏଆର ରେହମାନ ମଞ୍ଚ ପଛକୁ ପଳାଇଯାଇଥିଲେ ।