୨୧ ବର୍ଷ ହେଲା ନିର୍ମାଣ ହୋଇ ପାରୁନି ଅନୁଗୁଳ ହିଡିସିଙ୍ଗ ମଧ୍ୟମ ଜଳ ସେଚନ ପ୍ରକଳ୍ପ । ୨୦୦୦ ମସିହାରୁ ସରିଛି ସର୍ଭେ । ଆଜି ଯାଏଁ ଛିଡୁନି ଜମି ଅଧିଗ୍ରହଣ ଅଡୁଆ ।
କନକ ବ୍ୟୁରୋ: ଚାଷ ଜମିରେ ପାଣି ପହଞ୍ଚାଇବା ପାଇଁ ଅନୁଗୁଳ ଜିଲ୍ଲାର ବନ୍ତଳା କରଡାସିଙ୍ଗରେ ହିଡିସିଙ୍ଗ ମଧ୍ୟମ ଜଳସେଚନ ପ୍ରକଳ୍ପ କରାଯାଉଛି । ଚାଷୀଙ୍କ ୩୦ ବର୍ଷର ଦାବି, ହିଡିସିଙ୍ଗ କୃଷକ ମହାସଂଘର ଆନ୍ଦୋଳନ ପରେ ପ୍ରକଳ୍ପ କାମ ଆରମ୍ଭ ହୋଇଛି, ହେଲେ ଏହାରି ଭିତରେ ୨୧ ବର୍ଷ ବିତି ଯାଇଥିଲେ ମଧ୍ୟ କାର୍ଯ୍ୟ କିନ୍ତୁ ସଂପୂର୍ଣ୍ଣ ହୋଇ ପାରୁନି । ପ୍ରକଳ୍ପ ପାଇଁ ଆବଶ୍ୟକୀୟ ଜଙ୍ଗଲ ଜମି ଅଧିଗ୍ରହଣ ହୋଇ ପାରୁନଥିବାରୁ କାମ ଧିମେଇ ଯାଇଛି । ହିଡିସିଙ୍ଗ ପ୍ରକଳ୍ପ ପାଇଁ ୧ ହଜାର ଏକର ଜମି ଆବଶ୍ୟକ । ୨୦୧୮ରେ ଅନୁଗୁଳ ତହସିଲ ପକ୍ଷରୁ ୭୦୭ ଏକର ଜମି ଚିହ୍ନଟ କରାଯାଇଥିବା ବେଳେ ଆଉ ୩ଶହ ଏକର ଜଙ୍ଗଲ ଜମି ଅଧିଗ୍ରହଣରେ ସମସ୍ୟା ହେବାରୁ ପ୍ରକଳ୍ପ କାମରେ ବିଳମ୍ବ ହେଉଛି ।
Kanak News is now on WhatsApp
Join and get latest news updates delivered to you via WhatsApp
ହିଡିସିଙ୍ଗ ମଧ୍ୟମ ଜଳସେଚନ ପ୍ରକଳ୍ପ ପାଇଁ ୨୦୦୦ ମସିହାରେ କଟକ ଯୋବ୍ରା ଡିଭିଜନ ସର୍ଭେ କରି ରିପୋର୍ଟ ଦେଇଥିଲା । ୨୦୦୮ରେ ପ୍ରକଳ୍ପ ମଞ୍ଜୁରୀ ପାଇଁ କେନ୍ଦ୍ର ଜଳ ଆୟୋଗକୁ ଚିଠି ଲେଖା ଯାଇଥିଲା । ୨୦୧୦, ମାର୍ଚ୍ଚ ମାସରେ ସର୍ଭେ କାମ ଶେଷ ହୋଇଥିଲା । ସେତେବେଳେ ପ୍ରକଳ୍ପର ମୂଲ୍ୟ ୧୩୦ କୋଟି ଥିଲା ।
ଏହି ପ୍ରକଳ୍ପ ପାଇଁ ୨ଟି ଗାଁର ୧୬୧ଟି ପରିବାର ବିସ୍ଥାପିତ ହେବେ । ଏତେପରେ ବି ପ୍ରକଳ୍ପ ହେବା ଚାଷୀ ଉଭୟ ଖରିଫ ଓ ରବି ଚାଷ କରିପାରିବେ । ଏହାଦ୍ୱାରା ମରୁଡି ପ୍ରପୀଡିତ ଅଞ୍ଚଳର ବେକାରୀ ସମସ୍ୟା ଦୂର ହେବ । ପ୍ରାୟ ୧୨ ହଜାର ହେକ୍ଟର ଜମି ଜଳସେଚିତ ହେବ । ୧୫ଟି ପଞ୍ଚାୟତ ପ୍ରତ୍ୟେକ୍ଷ ଓ ୧୦ଟି ପଞ୍ଚାୟତ ପରୋକ୍ଷ ଭାବେ ଜଳସେଚିତ ହେବ । ପ୍ରାୟ ୧ ଲକ୍ଷ ୨୫ ହଜାର ଲୋକ ଏହାଦ୍ୱାରା ଉପକୃତ ହେବେ । ତେଣୁ ପ୍ରକଳ୍ପ ପାଇଁ ଉପୁଜିଥିବା ସମସ୍ୟା ସମାଧାନ କରି ନିର୍ମାଣ କାମ ସାରିବା ନେଇ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି ଅନୁଗୁଳ ବିଧାୟକ ରଜନୀକାନ୍ତ ସିଂ ।