ଡାକ୍ତରଙ୍କ ଅବହେଳାରୁ ମହିଳାଙ୍କ ମୃତ୍ୟୁ ଅଭିଯୋଗ । ମୃତଦେହରେ ଅକ୍ସିଜେନ୍ ଲଗାଇ ସ୍ଥାନାନ୍ତର ବେଳେ ଲୋକଙ୍କ ବିରୋଧ, ବୈପାରୀଗୁଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଉତେଜନା
କନକ ବ୍ୟୁରୋ : ମୃତଦେହ ମୁହଁରେ ଅକ୍ସିଜେନ । ପ୍ରଥମେ ଚିକିତ୍ସାରେ ଅବହେଳା କଲେ, ଆଉ ରୋଗୀର ମୃତ୍ୟୁ ହେବା ପରେ ଡାକ୍ତର ନିଜ ଦୋଷ ଢାଙ୍କିବାକୁ ମୃତଦେହରେ ଅକ୍ସିଜେନ ଲଗାଇ ଜିଲ୍ଲା ହସ୍ପିଟାଲକୁ ସ୍ଥାନାନ୍ତର ଉଦ୍ୟମ କରୁଥିଲେ । ଏହି ଅଭାବନୀୟ ଖବର ଆସିଛି କୋରାପୁଟ ଜିଲ୍ଲା ବୈପାରୀଗୁଡା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରୁ । ଏନେଇ ମୃତ ମହିଳାଙ୍କ ସ୍ୱାମୀ ବୈପାରୀଗୁଡା ଥାନାରେ ଏତଲା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅଭିଯୋଗ ଅନୁସାରେ, ବୈପାରୀଗୁଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ବାନୁଆଗୁଡା ଗାଁର ପ୍ରହଲ୍ଲାଦ ମାଝୀଙ୍କ ସ୍ତ୍ରୀ ତିଳୋତମା ମାଝୀ ଭର୍ତି ହୋଇଥିଲେ । ତିଳୋତମାଙ୍କ ସ୍ୱାସ୍ଥ୍ୟବସ୍ଥା ବିଗିଡିବାରୁ ପରିବାର ଲୋକେ ଡାକ୍ତରଙ୍କୁ ଡାକିବାକୁ ଯାଇଥିଲେ । ନେହୁରା ହୋଇ ଯେତେ ଡାକିଲେ ମଧ୍ୟ ଡାକ୍ତରବାବୁ ରୋଗୀଙ୍କ ବେଡ ପାଖକୁ ଆସିନଥିଲେ । ଚିକିତ୍ସା ଅବହେଳାରୁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ତିଳୋତମାଙ୍କ ମୃତ୍ୟୁ ହୋଇଯାଇଥିଲା । ଏହି ଖବର ପାଇବା ପରେ ଡାକ୍ତର ଅଭିଷେକ ମେହେର ତୁରନ୍ତ ମେଡିକାଲକୁ ଆସିଥିଲେ । ଆଉ ନିଜ ମୁଣ୍ଡରୁ ଦୋଷ ଝାଡିବାକୁ ଶବ ମୁହଁରେ ଅକ୍ସିଜେନ ଲଗାଇ ଜିଲ୍ଲାମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିବା ପାଇଁ ଚେଷ୍ଟା କରୁଥିଲେ । ରୋଗୀର ମୃତ୍ୟୁ ହୋଇଥିବା ଜାଣିବା ପରେ ଗାଁ ଲୋକେ ପାଟିତୁଣ୍ଡ କରି ପୁଲିସକୁ ଖବର ଦେଇଥିଲେ । ବୈପାରୀଗୁଡା ଥାନା ପୁଲିସ ଘଟଣାସ୍ଥଳରେ ପହଂଚି ମୃତଦେହକୁ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଥି । ବୈପାରୀଗୁଡା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ଡାକ୍ତରଙ୍କ ବିରୋଧରେ ମୃତକଙ୍କ ପରିବାର ଓ ଗ୍ରାମବାସୀ ପକ୍ଷରୁ ଏତଲା ଦିଆଯାଇଛି । ପୁଲିସ ଘଟଣାର ତଦନ୍ତ କରୁଛି ।