ଡ୍ରୋନ୍ ଆକ୍ରମଣରେ ଅଲ୍-କାଏଦାର ମୁଖ୍ୟ ଅଲ୍-ଜୱାହିରି ମୃତ। ଦୁଇ ମାସ ପୂର୍ବରୁ ନିପାତ ପାଇଁ ଆମେରିକା ଚଳାଇଥିଲା ଅପରେସନ।
କନକ ବ୍ୟୁରୋ: ସେପ୍ଟେମ୍ବର ୧୧, ୨୦୦୧ । ଆମେରିକା ଉପରେ ଆକ୍ରମଣ କରିଥିଲା କୁଖ୍ୟାତ ଆତଙ୍କବାଦୀ ସଂଗଠନ ଅଲ୍ କାଏଦା । ଆଉ ଏହି ଆକ୍ରମଣରେ ପାଖାପାଖି ୩ ହଜାର ଲୋକ ପ୍ରାଣ ହରାଇଥିଲେ । ଏହି ଆକ୍ରମଣ ପଛରେ ଅନ୍ୟତମ ପ୍ରମୁଖ ଖଳନାୟକ ଥିଲା ଅଲ ଜୱାହିରି । ଅଲ କାଏଦାର ପ୍ରମୁଖ ଓସାମା ବିନ୍ ଲାଡେନକୁ ଆମେରିକା ନିପାତ କରିବା ପରେ ଟାର୍ଗେଟରେ ଥିଲା ଜୱାହିରି । ଯାହାକୁ ଆମେରିକା ଏୟାର ଷ୍ଟ୍ରାଇକ ଯୋଗେ ନିପାତ କରିଛି । ଏହା ପୂର୍ବରୁ ଜୱାହିରି ବାବଦରେ ସୂଚନା ଦେଲେ ୨୫ ମିଲିୟନ ଡଲାର ପୁରସ୍କାର ରାଶି ଘୋଷଣା କରିଥିଲା ଆମେରିକା । ରାଷ୍ଟ୍ରପତି ଜୋ ବାଇଡେନ୍ ଟ୍ୱିଟ୍ କରି ଏପରି ଏନକାଉଣ୍ଟରକୁ ‘ନ୍ୟାୟ’ ବୋଲି ଉଲ୍ଲେଖ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଶନିବାର ତାଙ୍କ ନିର୍ଦ୍ଦେଶରେ ଆଫଗାନିସ୍ତାନର କାବୁଲରେ ଆମେରିକା ସଫଳତାର ସହ ଏୟାରଷ୍ଟ୍ରାଇକ୍ କରି ଅଲକାଏଦା ନେତା ଆୟମାନ ଅଲ ଜୱାହିରିକୁ ନିପାତ କରିଛି । ଉଚିତ ନ୍ୟାୟ ହୋଇଛି ବୋଲି ବାଇଡେନ୍ କହିଛନ୍ତି । ଯେଉଁମାନେ ଦେଶର କ୍ଷତି କରିବାକୁ ଚାହୁଁଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆମେରିକା ସଂକଳ୍ପବଦ୍ଧ ବୋଲି କହିଛନ୍ତି । ଏପରି କହି ଆମେରିକାକୁ ବିପଦ ଥିବା ସଂଗଠନକୁ ଚେତାବନୀ ଦେଇଛନ୍ତି ବାଇଡେନ୍ ।
କେନିଆରେ ଥିବା ଆମେରିକା ଦୂତାବାସ ନିକଟରେ ୧୯୯୮ରେ ସିରିଜ ବିସ୍ଫୋରଣ, ୨୦୦୦ରେ ୟୁଏସଏସ କୋଲ ଆଟାରେ ଆମେରିକାର ନୌସେନା ଉପରେ ଆକ୍ରମଣ, ୨୦୦୭ରେ ପାକିସ୍ତାନରେ ଘୃଣାଭାବ ସୃଷ୍ଟି କରିଥିଲା ଅଲ ଜୱାହିରି । କିନ୍ତୁ ୨୦୧୧ରେ ଅଲ କାଏଦା ମୁଖ୍ୟ ଓସାମା ବିନ୍ ଲାଡେନ ନିପାତ ପରେ ଏହି କୁଖ୍ୟାତ ଆତଙ୍କବାଦୀ ସଂଗଠନ କ୍ରମଶଃ ଦୁର୍ବଳ ହୋଇଥିଲ।।
ଆଫଗାନିସ୍ତାନରୁ ଆମେରିକା ନିୟନ୍ତ୍ରଣ ହଟାଇବା ପରେ ଅଲକାଏଦା ସଂଗଠନକୁ ମଜବୁତ କରିବାକୁ ଯୋଜନା କରିଥିଲା ଅଲ ଜୱାହିରି । ଦୀର୍ଘ ବର୍ଷ ହେବ ଜୱାହିରି ଲୁଚି ରହିଥିଲା । ତାକୁ ଖୋଜିବାକୁ ଅନେକ ଗୁଇନ୍ଦା ସୂଚନା ଉପରେ ଆମେରିକା ନିର୍ଭର କରୁଥିଲା । ଯେଉଁ ଘର ବାଲୋକୋନୀରେ ବୁଲୁଥିବା ବେଳେ ଜୱାହିରିକୁ ହତ୍ୟା କରାଯାଇଛି ଏହି ଘରର ମାଲିକ ସିରାଜୁଦ୍ଦିନ ହକ୍କାନୀ । ଯିଏକି ତାଲିବାନର ଆଭ୍ୟନ୍ତରୀଣ ମନ୍ତ୍ରୀଙ୍କ ନିକଟତମ ବୋଲି ଜଣାପଡିଛି ।