ବାକ୍ସରେ ପଡି ପଡି ଖତ ଖାଇଲା ୪୨ ଲକ୍ଷର ନୋଟ୍ । ପଦାରେ ପଡିଲା ବ୍ୟାଙ୍କର ବେପରୁଆ ନୀତି
କନକ ବ୍ୟୁରୋ: ରହି ରହି ଖତ ହେଲା ୪୨ ଲକ୍ଷ ଟଙ୍କାର ୨ ହଜାର ଓ ୫୦୦ ଟଙ୍କିଆ ନୋଟ୍ । କାନପୁର ପଞ୍ଜାବ ନ୍ୟାସନାଲ ବ୍ୟାଙ୍କ ପାଣ୍ଡୁନଗର ବ୍ରାଞ୍ଚରେ ଦେଖିବାକୁ ମିଳିଛି ଏଭଳି ଘଟଣା । ରିଜର୍ଭ ବ୍ୟାଙ୍କର ସ୍ୱତନ୍ତ୍ର ଟିମ ଇନସ୍ପେକ୍ସନ୍ ପାଇଁ ଯାଇଥିବା ବେଳେ ଏହି ମାମଲା ସାମନାକୁ ଆସିବା ପରେ ବ୍ୟାଙ୍କର ୪ଜଣ ଅଧିକାରୀଙ୍କୁ ନିଲମ୍ବନ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ବ୍ୟାଙ୍କରେ ଲୋକେ ଟଙ୍କା ରଖନ୍ତି ସୁରକ୍ଷିତ ଭାବେ ସଞ୍ଚିତ ହୋଇ ରହିବା ପାଇଁ ହେଲେ ଯଦି ସେ ଟଙ୍କା ବ୍ୟାଙ୍କରେ ରହି ରହି ନଷ୍ଟ ହୋଇଯାଏ ଗ୍ରାହକ କହିବେ କାହାକୁ । କାନପୁରର ପଞ୍ଜାବ ନ୍ୟାସନାଲ ବ୍ୟାଙ୍କରେ ଟଙ୍କାକୁ ଏପରି ହେପାଜତରେ ରଖାଯାଇଥିଲା ଯେ, ପାଣିରେ ଭିଜି ପୁରାପୁରି ନଷ୍ଟ ହୋଇଗଲା ୪୨ ଲକ୍ଷ ଟଙ୍କାର ନୋଟ୍ ।
କଥା ହେଉଛି ୩ ମାସ ପୂର୍ବରୁ ଏହି ଟଙ୍କାକୁ ବ୍ୟାଙ୍କ ପକ୍ଷରୁ ଏକ ବାକ୍ସରେ ପୁରାଇ ରଖାଯାଇଥିଲା । ହେଲେ ଏହି ବାକ୍ସ ଭିତରେ ପାଣି ପଶିଯାଇଥିଲା । ବ୍ୟାଙ୍କ କର୍ମଚାରୀମାନେ ଟଙ୍କାକୁ ଏପରି ଅବସ୍ଥାରେ ଦେଖିଲେ ହେଲେ କେବଳ ଉପର ଟଙ୍କାକୁ କାଢି ଶୁଖାଇଥିଲେ ଏବଂ ତଳେ ଥିବା ଟଙ୍କାକୁ ଛାଡିଦେଇଥିଲେ । ପାଣି ଶୁଖିଯାଇଛି ଭାବି ଏହା ଉପରେ ଆଉ ନଜର ଦେଇନଥିଲେ । ଫଳରେ ପାଣିରେ ଭିଜି ଭିଜି ସଢିଯିବା ଭଳି ପରିସ୍ଥିତି ସୃଷ୍ଟି ହୋଇଥିଲା ।
ଏହି ସମୟ ମଧ୍ୟରେ ସର୍ବେକ୍ଷଣ ପାଇଁ ଆସିଥିଲେ ରିଜର୍ଭ ବ୍ୟାଙ୍କ ଟିମ୍ । ନୋଟକୁ ଏପରି ଖରାପ ସ୍ଥିତିରେ ଦେଖିବା ପରେ ସମ୍ପୃକ୍ତ ବ୍ୟାଙ୍କକୁ କାରଣ ଦର୍ଶାଅ ନୋଟିସ୍ ଜାରି କରିଛନ୍ତି । କେବଳ ନୁହେଁ ବ୍ୟାଙ୍କର ୪ଜଣ ଅଧିକାରୀଙ୍କୁ ମଧ୍ୟ ନିଲମ୍ବନ କରାଯାଇଛି ।