ଖୋର୍ଦ୍ଧା ଓଳସିଂହ ଗାଁର ଦୁଇ ମହିଳାଙ୍କ ନିଆରା ଉଦ୍ୟମ: ନିଜସ୍ୱ ଉଦ୍ୟମରେ ଚାଷ କରି କରୁଛନ୍ତି ପରିବାର ପ୍ରତିପୋଷଣ
କନକ ବ୍ୟୁରୋ: ଭଳିକି ଭଳି ପନିପରିବା ଫସଲରେ ହସୁଛି କ୍ଷେତ । ବାଇଗଣ, କଲରା, ଝୁଡଙ୍ଗ, ମୂଳା, କାକୁଡ଼ି, କୋଶଳା ଶାଗ, ଗେଣ୍ଡୁଫୁଲ ଚାଷ କରିଛନ୍ତି ମହିଳା ଚାଷୀ । ଖୋର୍ଦ୍ଧା ଓଳସିଂହ ଗାଁର ଦୁଇଜଣ ମହିଳା ସୀତା ବଳିଆରସିଂ ଏବଂ ସୁଷମା ବଳିଆରସିଂଙ୍କ ଦ୍ୱାରା ହୋଇଥିବା ଚାଷର ଏ ହେଉଛି ବାସ୍ତବ ଚିତ୍ର । ରୋଜଗାର କରିବା ପାଇଁ ଏହି ଦୁଇଜଣ ମହିଳା ଆଉ ଅନ୍ୟମାନଙ୍କ ଉପରେ ନିର୍ଭର କରୁନାହନ୍ତି । ନିଜେ ନିଜସ୍ୱ ଉଦ୍ୟମରେ କରଛନ୍ତି ଚାଷ । ଉତ୍ପାଦିତ ପରିବା ନିଜ ପରିବାରର ଆବଶ୍ୟକତା ପୁରଣ କରୁଥିବା ବେଳେ ବିକ୍ରି କରି ବେଶ ଦୁଇ ପଇସା ରୋଜଗାର କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପରିବା ଚାଷରେ ମାତ୍ର ୪୦ ହଜାର ଟଙ୍କା ଖର୍ଚ୍ଚ ହୋଇଥିବା ବେଳେ ୨ରୁ ଅଢେଇ ଲକ୍ଷ ଟଙ୍କା ରୋଜଗାର ହୋଇପାରୁଛି । ଗଛରେ ପାଣି ମଡାଇବା ଠାରୁ ଆରମ୍ଭ କରି ଘାସ ବାଛିବା, କୀଟନାସକ ଔଷଧ ପକାଇବା ଭଳି କାମ କରନ୍ତି ମହିଳା । ଦିନେ ଏହି ଜମି ପଡ଼ିଆ ପଡିଥିଲା । ଏବେ ସେହି ଜମିରେ ହସୁଛି ନାନା ଜାତିର ଫସଲ । ସ୍ୱୟଂ ସହାୟକ ଗୋଷ୍ଠୀରୁ ରୁଣ ଆଣି ଏହି ଫସଲରେ ଖର୍ଚ୍ଚ କରିଥିଲେ । ଏବେ ରୋଜଗାର ହେଉଥିବା ପଇସାରେ ପରିବାର ଖୁସିରେ ଚଳୁଛି ।
ଚାଷ କାମରେ କ୍ଷତି ଥିଲେ ବି ସେସବୁକୁ ଖାତିର ନକରି କଠିନ ପରିଶ୍ରମ କରି ବାଡ଼ିରେ ଫଳାଇଛନ୍ତି ସୁନା ଫସଲ । ଦୁଇଜଣ ମହିଳାଙ୍କ ଦୃଢ ଇଛା ଶକ୍ତି ଓ ସାହସ ତାଙ୍କୁ ରୋଜଗାରକ୍ଷମ କରିପାରିଛି ।