ପଞ୍ଜାବ ଲୁଧିଆନାରେ ବିଷାକ୍ତ ଗ୍ୟାସ୍ ଲିକ୍, ୧୧ ଜଣଙ୍କର ମୃତ୍ୟୁ । ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ଗ୍ୟାସ୍ ସଂସ୍ପର୍ଶରେ ଆସିଲେ ଶରୀର ପଡିଯାଉଛି ନୀଳ ।
କନକ ବ୍ୟୁରୋ : ପଞ୍ଜାବର ଲୁଧିଆନାରେ ବିଷାକ୍ତ ଗ୍ୟାସ୍ ଲିକ୍ ଘଟଣାରେ ମୃତ୍ୟୁ ସଂଖ୍ୟା ୧୧କୁ ବୃଦ୍ଧି ପାଇଛି । ସେହିଭଳି ଏହି ଘଟଣାରେ ଅନେକ ଲୋକ ଗୁରୁତର ଆହତ ହୋଇ ଚିକିତ୍ସିତ ହେଉଛନ୍ତି । ସେମାନଙ୍କୁ ନିଶ୍ୱାସ ପ୍ରଶ୍ୱାସ ନେବାରେ କଷ୍ଟ ଅନୁଭବ ହେଉଛି । ଅନେକ ଲୋକ ବିଷାକ୍ତ ଗ୍ୟାସ୍ ପ୍ରଭାବରେ ଆସି ଚେତା ହରାଉଛନ୍ତି । ଏହି ଘଟଣାକୁ ଦୃଷ୍ଟିରେ ରଖି ଏନଡିଆରଏଫ ଟିମ୍ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛି । ଘଟଣାସ୍ଥଳକୁ ପୂରା ସିଲ୍ କରାଯାଇଛି । ଗୁରୁତରଙ୍କୁ ହସ୍ପିଟାଲ ସ୍ତାନାନ୍ତର କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ, ରବିବାର ସକାଳ ସାଢ଼େ ୭ଟା ପାଖାପାଖି ସ୍ଥାନୀୟ ଅଂଚଳରେ ଥିବା ଏକ ଫ୍ରାକ୍ଟ୍ରିରୁ ଏହି ଗ୍ୟାସ ଲିକ୍ ହୋଇଥିଲା । ଯେଉଁଥିରେ କିଛି ଲୋକେ ଚେତାଶୂନ୍ୟ ହୋଇପଡ଼ିଥିଲେ । ସେପଟେ ଘଟଣାକୁ ନେଇ ଦୁଃଖ ପ୍୍ରକାଶ କରିଛନ୍ତି ପଞ୍ଜାବ ମୁଖ୍ୟମନ୍ତ୍ରୀ ଭବୱନ୍ତ ସିଂ ମାନ୍ । କହିଛନ୍ତି, ପୂରା ଘଟଣା ଉପରେ ନଜର ରଖାଯାଇଛି । ମୃତକ ଓ ଆହତଙ୍କୁ ଯଥାସମ୍ଭବ ସହାୟତା ପ୍ରଦାନ କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ପୋଲିସ ଡ୍ରୋନ ସାହାଯ୍ୟରେ ଛାତ ଉପରେ ଗ୍ୟାସ ଉପରେ କେହି ଚେତାଶୂନ୍ୟ ହୋଇ ପଡିଛନ୍ତି କି ନାହିଁ ତାହା ଦେଖୁଛି । ତେବେ ଗ୍ୟାସ୍ ଲିକ୍ ହେବା ପରେ ଲୋକେ ତୁରନ୍ତ ଏହି ସ୍ଥାନ ଛାଡି ଦେଇଥିଲେ । କିନ୍ତୁ କିଛି ଲୋକ ଏହି ବିଷାକ୍ତ ଗ୍ୟାସ ସଂସ୍ପର୍ଶରେ ଆସି ଗୁରୁତର ହୋଇଛନ୍ତି । ତେବେ କେଉଁ ଗ୍ୟାସ୍ ଲିକ୍ ହୋଇଛି ତାହା ଏଯାଏଁ ଜଣାପଡିନାହିଁ । ତେବେ ବିଶେଷଜ୍ଞ ଟିମ ଏହାର ଯାଞ୍ଚ କରୁଛି । ଯାଞ୍ଚ ପରେ ସ୍ପଷ୍ଟ ହେବ ଯେ, କେଉଁ ଗ୍ୟାସ୍ କାରଣରୁ ଏଭଳି ସ୍ଥିତି ଉପୁଜିଛି । ଏବେ ଉକ୍ତ ଘଟଣାସ୍ଥଳକୁ ଯିବାକୁ କାହାକୁ ଅନୁମତି ନାହିଁ । ଘଟଣାସ୍ଥଳରେ ଉପସ୍ଥିତ ଥିବା ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ଏହି ଗ୍ୟାସ୍ ସଂସ୍ପର୍ଶରେ ଆସିବା କାରଣରୁ ଶରୀର ପୂରା ନୀଳ ପଡିଯାଉଛି । ତେଣୁ ଏହା ଅତି ମାରାତ୍ମକ ଗ୍ୟାସ୍ ବୋଲି କୁହାଯାଉଛି ।