ସ୍ୱାମୀର ଜୀବନ ପାଇଁ କାନି ପାତି ଭିକ ମାଗୁଛି ସ୍ତ୍ରୀ । କର୍କଟ ଯନ୍ତ୍ରଣାରେ ଛଟପଟ ମିଥୁନଙ୍କ ପାଇଁ ମା’ ଆଖିରୁ ଅହରହ ଝରୁଛି ଲୁହ
କନକ ବ୍ୟୁରୋ: ସ୍ୱାମୀର ଜୀବନ ବଞ୍ଚାଇବାକୁ କଇଁକଇଁ ହୋଇ କାନ୍ଦୁଛି , ଆଉ କାନି ପାତି ଭିକ ମାଗୁୁଛି ସ୍ତ୍ରୀ । ଇଏ ହେଉଛି କ୍ୟାନ୍ସର ରୋଗରେ ପଡି ଯନ୍ତ୍ରଣାରେ ଛଟପଟ ହେଉଥିବା ସ୍ୱାମୀର ଜୀବନ ବଞ୍ଚାଇବାକୁ ସ୍ତ୍ରୀର ବିକଳ କାନ୍ଦ । ସ୍ତ୍ରୀ କାନ୍ଦୁଛି, ଜନ୍ମକଲା ମା’ ବି କାନ୍ଦୁଛି । ଆଉ କୋଳରେ କଅଁଳା ଝିଅ ଜୁୁଳୁ ଜୁଳୁ ହୋଇ ଚାହିଁଛି । ମଜୁରୀ ଲାଗି ଘର ଚଳାଉଥିବା ସ୍ୱାମୀ ଯେତେବେଳେ ଶଯ୍ୟାଶାୟୀ ଏମାନେ ଆଜି ଅସହାୟ ।
Kanak News is now on WhatsApp
Join and get latest news updates delivered to you via WhatsApp
ସ୍ୱାମୀକୁ ବଞ୍ଚାଇବାକୁ ସବୁ ଚେଷ୍ଟା କରି ନିଃସ୍ୱ ହୋଇଯିବା ପରେ ଏବେ ଘର ଘର ବୁଲି କାନି ପାତି ଭିକ ମାଗୁଛନ୍ତି ସ୍ତ୍ରୀ ଓ ମା’ । ସମସ୍ତଙ୍କୁ ପାଦ ଛୁଇଁ ଗୁହାରୀ କରୁଛନ୍ତି, ସେଇ ରୋଗାକ୍ରାନ୍ତ ସ୍ୱାମୀ ପାଇଁ ଟିକେ ଭଗବାନଙ୍କ ପାଖରେ ଗୁହାରୀ କରିବାକୁ । ଏ ହେଉଛନ୍ତି ଆଠଗଡ ବ୍ଳକ ରାଧାଦାମୋଦର ଗାଁର ମିନତୀ ପୁହାଣ । ମୁଖ କ୍ୟାନ୍ସରରେ ପୀଡିତ ହୋଇ ଏବେ ସ୍ୱାମୀ ମିଥୁନ ପୁହାଣ ଶଯ୍ୟାଶାୟୀ । ଘରେ ୩ ଜଣ ବଢିଲା ନଣନ୍ଦ । ବିଧବା ଶାଶୁ । ରୋଜଗାର ବୋଲି କିଛି ନାହିଁ । ଟାଇଲ ଛପର ଘର ଖଣ୍ଡେ ଛଡା ବିଲ ବୋଲି ଗୁଣ୍ଟେ ନାହିଁ । ଏପରି ସ୍ଥିତିରେ ସ୍ୱାମୀ ମିଥୁନଙ୍କ କ୍ୟାନ୍ସର ରୋଗ ଏ ସମସ୍ତଙ୍କ ଜୀବନ ଦୁର୍ବିସହ କରିଦେଇଛି । ମାଗିଯାଚି ସ୍ୱାମୀଙ୍କୁ ଚିକିତ୍ସା କରିବା ପରେ ବି କିଛି ଲାଭ ନହେବାରୁ ଏବେ ମିନତୀଙ୍କ ପାଖରେ ଆଉ କିଛି ଉପାୟ ନାହିଁ । ଶେଷରେ ବାଧ୍ୟ ହୋଇ ଘର ଘର ବୁଲି ମିଥୁନଙ୍କ ପାଇଁ ଭିକ ମାଗୁଛନ୍ତି ସ୍ତ୍ରୀ ମିନତୀ ଓ ମା’ ।
୩ ଝିଅରେ ମିଥୁନ ଗୋଟିଏ ବୋଲି ପୁଅ । ସ୍ୱାମୀ ଚାଲିଗଲା ପରେ ଅଭାବ ଅନାଟନ ଭିତରେ ବି ପିଲାଙ୍କୁ ବଡ କରିଛନ୍ତି ମା’ । ପୁଅକୁ ୨ ବର୍ଷ ତଳେ ବାହା ଦେଇଥିଲେ । ଅଭାବ ଭିତରେ ବି ପୁଅ ଯାହା ମଜୁରୀ ଆଣେ ସେଥିରେ ଚଳୁଥିଲା ଅଭାବୀ ସଂସାର । ସେତକ ବି ଦଇବ ସହିଲା ନାର୍ହି । ପୁଅକୁ ହେଲା ଦୂରାରୋଗ୍ୟ ମୁଖ କ୍ୟାନ୍ସର । ଏମିତି ଅବସ୍ଥାରେ ପୁଅର ଯନ୍ତ୍ରଣା ନା ଦେଖିପାରୁଛି ନା ସହିପାରୁଛି ମା’ । ଯେଉଁଠି ବସିଲେ ଆଖିରୁ ଅନବରତ ଝରୁଛି ଲୁହ ।
ଏପରି ସ୍ଥିତିରେ ଦୁନିଆଁ କ’ଣ ଜାଣିନଥିବା କୁନି ଝିଅଟିର ଅବସ୍ଥା କ’ଣ ହେବ ସେଇ ଚିନ୍ତାରେ ମିନତୀ । ତଥାପି ଏହି ଯନ୍ତ୍ରଣାସିକ୍ତ ପରିବାରର ଦୁଃଖ ଦେଖିବା ପରେ ଯଦି ପ୍ରଶାସନ ସାହାଯ୍ୟର ହାତ ବଢାନ୍ତେ, ତେବେ ଏହି ପରିବାରର ଦୁଃଖ କିଛି ମାତ୍ରାରେ ଲାଘବ ହୋଇପାରନ୍ତା ।
ମିଥୁନ ପୁହାଣଙ୍କୁ ସାହାଯ୍ୟ କରିବାକୁ ଚାହୁଁଥିଲେ ଠିକଣା:
ନାଁ – ମିନତୀ ପୁହାଣ
ବ୍ୟାଙ୍କ ଆକାଉଣ୍ଟ: ୪୧୦୪୩୯୮୨୦୦୪
ଆଇଏଫଏସସି କୋଡ୍: SBIN୦୦୧୦୯୦୬