ଢେଙ୍କାନାଳ ଅଳସୁଆ ସାପ୍ତାହିକ ହାଟରେ ଅଘଟଣ: ରାଇସ୍ ମିଲ କାନ୍ଥ ଭୁଶୁଡି ୪ ମୃତ, ୧୨ରୁ ଅଧିକ ଆହତ;ଅଧା ଭଙ୍ଗା କାନ୍ଥକୁ ଜେସିବି ଲଗାଇ ଭାଙ୍ଗିଦେଲା ପ୍ରଶାସନ
କନକ ବ୍ୟୁରୋ: ଢେଙ୍କାନାଳ ଅଳସୁଆ ସାପ୍ତାହିକ ହାଟରେ ବଡ ଧରଣର ଅଘଟଣ । ରାଇସ୍ ମିଲ୍ କାନ୍ଥ ଭୁସୁଡି ୪ ଜଣ ପ୍ରାଣ ହରାଇଛନ୍ତି । ୧୨ରୁ ଅଧିକ ଆହତ ହୋଇଛନ୍ତି । ଆହତ ମାନଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଯାଇଛି । ୪ ମୃତକଙ୍କ ପରିଚୟ ମିଳିଛି । ମୃତକ ମାନେ ସଂଗ୍ରାମ ସାହୁ, ରାମଚନ୍ଦ୍ର ସାହୁ, ମାୟାଧର ମଲ୍ଲିକ ଏବଂ ଅଭିମନ୍ୟୁ ବିଶ୍ୱାଳ । ସଂଗ୍ରାମ ସାହୁଙ୍କ ଘର ଚାଇଁପୁର ହୋଇଥିବା ବେଳେ ରାମଚନ୍ଦ୍ର ସାହୁ ଗେଙ୍ଗୁଟିଆ ଗାଁର ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ଶିଦ୍ଧପାଳର ମାୟାଧର ମଲ୍ଲିକ ଏବଂ ଗେଙ୍ଗୁଟିଆର ଅଭିମନ୍ୟୁ ବିଶ୍ୱାଳଙ୍କ ପ୍ରାଣ ରାଇସ୍ ମିଲ୍ କାନ୍ଥ ତଳେ ଚାପି ହୋଇ ଚାଲିଯାଇଛି । ମୃତକଙ୍କ ପରିବାରକୁ ଅନୁକମ୍ପା ମୂଳକ ସହାୟତା ପ୍ରଦାନ କରିଛି ଢେଙ୍କାନାଳ ମ୍ୟୁନିସିପାଲଟି । ପ୍ରତି ମୃତକଙ୍କ ପରିବାରକୁ ୨୫ ହଜାର ଟଙ୍କାର ସହାୟତା ଦିଆଯାଇଛି । ଅଧିକ ସହାୟତା ପାଇଁ ଜିଲ୍ଲାପାଳଙ୍କୁ ଅନୁରୋଧ କରିବ ମ୍ୟୁନିସିପାଲଟି । ଅଳସଆ ସପ୍ତାହିକ ହାଟ ନିକଟରେ ଅଘଟଣର ତଦନ୍ତ ନିର୍ଦେଶ ଦେଇଛନ୍ତି ଢେଙ୍କାନାଳ ଜିଲ୍ଲାପାଳ ।
ସାପ୍ତାହିକ ହାଟ ଚାଲିଥିବାରୁ କାନ୍ଥ କଡରେ ବସିଥିଲେ ଉଠାଦୋକାନୀ । ଭଙ୍ଗା କାନ୍ଥ ତଳେ ଗାଡି ଚାପି ହେବା ସହ କିଛି ଲୋକ ବି ଫଶି ରହିଥିଲେ । ଓଡ୍ରାଫ ଟିମ୍, ଅଗ୍ନିଶମ କର୍ମଚାରୀ ଓ ସ୍ଥାନୀୟ ଲୋକଙ୍କ ସହଯୋଗରେ ଉଦ୍ଧାର କାର୍ଯ୍ୟ କରାଯାଇଛି । କାଂଥ ଭୁଷୁଡି ଅଘଟଣ ଘଟିବା ପରେ ବାକି କାଂଥକୁ ପ୍ରଶାସନ ଜେସିବି ଲଗାଇ ଭାଙ୍ଗି ଦେଇଛି ।