କନକ ବ୍ୟୁରୋ: ଭୁଲ ରକ୍ତ ପାଇଁ ଚାଲିଯାଇଛି ଜୀବନ । ଗୋଟିଏ ମାସ ଭିତରେ ୨ ଜଣଙ୍କ ମୃତ୍ୟୁ ପରେ କାଠଗଡାରେ ସ୍ୱାସ୍ଥ୍ୟସେବା । କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟରେ ବେପରୁଆ ସ୍ୱାସ୍ଥ୍ୟସେବା ଯୋଗୁଁ ରୋଗୀଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ଏ ପଜିଟିଭ ବ୍ଲଡ ଗ୍ରୁପ୍ ରୋଗୀଙ୍କୁ ବି ପଜିଟିଭ ବ୍ଲଡ ଦିଆଯିବାରୁ ତାଙ୍କ ମୃତ୍ୟୁ ହୋଇଥିବା ବେଳେ ଜଣେ ଏବି ପଜିଟିଭ ରୋଗୀଙ୍କୁ ଏ ପଜିଟିଭ ରକ୍ତ ଦିଆଯାଇଥିବା ପରିବାର ଲୋକ ଅଭିଯୋଗ କରିଛନ୍ତି । ଏବଂ ଏହି ଅଭିଯୋଗ ଆଧାରରେ ତଦନ୍ତ ପାଇଁ ଜିଲ୍ଲା ସ୍ୱାସ୍ଥ୍ୟ ବିଭାଗ ନିର୍ଦ୍ଦେଶ ଦେଇଛି । ତଦନ୍ତ ଚାଲିଛି, ଯେଉଁମାନେ ଦୋଷୀ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲ୍ଲା ମୁଖ୍ୟ ଚିିକିତ୍ସାଧିକାରୀ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏପ୍ରିଲ ୩୦ ତାରିଖରେ କେନ୍ଦୁଝର ସଦର ବ୍ଲକ କାଣ୍ଡରାପଶି ଗାଁର ଦାମୁ ମୁଣ୍ଡା ଯକ୍ଷ୍ମା ରୋଗରେ ପୀଡିତ ହୋଇ କେନ୍ଦୁଝର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି ହୋଇଥିଲେ । ତେବେ ତାଙ୍କ ବ୍ଲଡ ଗ୍ରୁପ୍ ଏ ପଜିଟିଭ୍ ଥିବା ବେଳେ ତାଙ୍କୁ ସେଠାରେ ବି ପଜିଟିଭ ରକ୍ତ ଦିଆଯାଇଥିଲା । ଫଳରେ ଚିକିତ୍ସାଧିନ ଅବସ୍ଥାରେ ଦାମୁଙ୍କ ମୃତ୍ୟୁ ହୋଇଥିବା ତାଙ୍କ ପୁଅ ଅଭିଯୋଗ କରିଛନ୍ତି । ସେହିଭଳି ମେ ୧୩ ତାରିଖରେ ସେହି ସଦର ବ୍ଲକ ସାହୁସାହିର ସୁନି ସାହୁ ଅସୁସ୍ଥତା କାରଣରୁ ଜିଲ୍ଲା ମୁଖ୍ୟ ଚିକିତ୍ସାଳୟ ଭର୍ତି ହୋଇଥିଲେ । ସେଠାରେ ତାଙ୍କୁ ବି ପଜିଟିଭ ବ୍ଲଡ ଦିଆଯାଇଥିଲା । ପରେ ଅବସ୍ଥା ଗୁରୁତର ହେବାରୁ କଟକ ବଡ ମେଡିକାଲକୁ ନେଇଥିଲେ ପରିବାର ଲୋକ ।
ସେଠାରେ ଚିକିତ୍ସାଧିନ ଅବସ୍ଥାରେ ଜଣାପଡିଥିଲା, ସୁନିଙ୍କ ବ୍ଲଡ ଗ୍ରୁପ୍ ଏବି ପଜିଟିଭ । କେନ୍ଦୁଝରରେ ଭୁଲ ରକ୍ତ ଦିଆଯାଇଥିବା କଟକ ଡାକ୍ତର କହିଥିବା, ଅଭିଯୋଗ କରିଛନ୍ତି ସୁନିଙ୍କ ସଂପର୍କୀୟ । ତେବେ ଭୁଲ ରକ୍ତ ପାଇଁ ୨ ଜଣଙ୍କ ଜୀବନ ଚାଲିଯିବା ଘଟଣାକୁ ନେଇ କେନ୍ଦୁଝରରେ ଅସନ୍ତୋଷ ଦାନା ବାନ୍ଧୁଛି । ଏଭଳି ଘଟଣାର ତଦନ୍ତ କରି ଦୃଢ କାର୍ଯ୍ୟାନୁଷ୍ଠାନ ନେବା ପାଇଁ କେନ୍ଦୁଝରବାସୀ ଦାବି କରିଛନ୍ତି ।