ଆଜି ବସିବ ରାଜ୍ୟ କ୍ୟାବିନେଟ୍ ବୈଠକ ! ଏଜେଣ୍ଡାରେ ସପ୍ତମ ବେତନ କମିସନ, ଆଇଓସିଏଲ୍ ପ୍ରସଙ୍ଗ
କନକ ବ୍ୟୁରୋ: ଆଜି ରାଜ୍ୟ କ୍ୟାବିନେଟର ଗୁରୁତ୍ୱପୂର୍ଣ୍ଣ ବୈଠକ ବସିବ । ସନ୍ଧ୍ୟା ୫ଟା ୪୫ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ହେବାକୁ ଥିବା ବୈଠକରେ ୪ଟି ପ୍ରସ୍ତାବ ଉପରେ ଆଲୋଚନା ଲାଗି ମନ୍ତ୍ରୀମାନଙ୍କୁ ଏଜେଣ୍ଡା ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ମାତ୍ର ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ମୁତାବକ, ମଙ୍ଗଳବାର କ୍ୟାବିନେଟ୍ ସପ୍ତମ ବେତନ କମିସନ ସୁପାରିସ ଲାଗୁ ପ୍ରସ୍ତାବକୁ ବିଧିବଦ୍ଧ ଅନୁମୋଦନ ଦେବେ । ଏ ସଂକ୍ରାନ୍ତ ପ୍ରସ୍ତାବ ମନ୍ତ୍ରୀମାନଙ୍କୁ କ୍ୟାବିନେଟ୍ ବୈଠକରେ ହିଁ ଦିଆଯିବ । ସେହିଭଳି ପାରାଦୀପ ତୈଳ ବିଶୋଧନାଗାରର ଟିକସକୁ ନେଇ ରାଜ୍ୟ ସରକାର ଓ ଆଇଓସିଏଲ୍ ମଧ୍ୟରେ ହୋଇଥିବା ନୂଆ ବୁଝାମଣା ପ୍ରସ୍ତାବ କ୍ୟାବିନେଟ୍ ଅନୁମୋଦନ ପାଇଁ ଆସିବ । ଏହିପରି ମୋଟ ୮ଟି ପ୍ରସ୍ତାବ ଉପରେ ଆଲୋଚନା ହୋଇପାରେ ।
ଉଲ୍ଲେଖଯୋଗ୍ୟ, ଗତ ୧୮ ତାରିଖ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ମଧ୍ୟରେ ଆଲୋଚନା ପରେ ଦୀର୍ଘ ଦିନ ଧରି ଲାଗି ରହିଥିବା ଟିକସ ବିବାଦରେ ପୂର୍ଣ୍ଣଛେଦ ପଡିଥିଲା । ସ୍ଥିର ହୋଇଥିଲା, ଆଇଓସିଏଲର ପାରାଦୀପ ରିଫାଇନାରି ପାଇଁ ରାଜ୍ୟ ସରକାର ୧୫ବର୍ଷ ବିନା ସୁଧରେ ବାର୍ଷିକ ୭୦୦କୋଟିର ଋଣ ପ୍ରଦାନ କରିବେ । ବର୍ଷର ପ୍ରତ୍ୟେକ ଚାରିମାସରେ ଅର୍ଥାତ୍ ଚାରିଟି କିସ୍ତିରେ (୧୭୫ କୋଟି ଲେଖାଏଁ) ଏହି ଅର୍ଥ ଦିଆଯିବ । ୧୬ତମ ବର୍ଷରୁ ଆଇଓସିଏଲ୍ ଏହାକୁ ସୁଝିବା ଆରମ୍ଭ କରିବ ।
୨୦୧୬-୧୭ ଆର୍ଥିକ ବର୍ଷରେ ଆଇଓସିଏଲର ୨୨୦୦ କୋଟି ଟଙ୍କା ଆୟ ହୋଇଛି । ସେଥିରୁ ରାଜ୍ୟ ସରକାର ୭୦୦ କୋଟି ବିନା ସୁଧରେ ଦେବେ ଓ ବାକି ୧୫ଶହ କୋଟି ଟଙ୍କା ରାଜସ୍ୱ ଆକାରରେ ରହିବ । ତେବେ ୨୦୧୫-୧୬, ୨୦୧୬-୧୭ ଓ ୨୦୧୭-୧୮ ଆର୍ଥିକ ବର୍ଷରେ ଆଦାୟ ହୋଇଥିବା ଭାଟକୁ ଆଇଓସିଏଲ୍ ଜମା କରିବ । ଏହି ନିଷ୍ପତ୍ତି ଆଇଓସିଏଲ୍ ବୋର୍ଡରେ ଅନୁମୋଦନ ଲାଭ କରିବ । ସେହିଭଳି ରାଜ୍ୟ ସରକାର ମଧ୍ୟ ନିଷ୍ପତ୍ତିକୁ କ୍ୟାବିନେଟରେ ଅନୁମୋଦନ କରାଇବେ । ଏହାପରେ ଯାଇ ଉଭୟ ପକ୍ଷ ମଧ୍ୟରେ ସାନି ଚୁକ୍ତିନାମା ସ୍ୱାକ୍ଷର ସମ୍ଭବ ହୋଇପାରିବ ।