କନକ ବ୍ୟୁରୋ: ବିଶ୍ୱ ପଖାଳ ଦିବସ ପାଳନ କରିଛି ସାରା ଓଡିଶା । ଓଡିଆଙ୍କ ପାରମ୍ପରିକ ଓ ପ୍ରିୟ ଖାଦ୍ୟ ପଖାଳ । ପଖାଳ ଦିବସରେ ନେତା, ଜନତା ସମସ୍ତେ ସୁସ୍ୱାଦୁ ବ୍ୟଞ୍ଜନ ସହ ପଖାଳର ମଜା ନେଉଥିବା ଦେଖିବାକୁ ମିଳିଛି । ପଖାଳ କଂସା, ଚାରିପାଖେ ସୁସ୍ୱାଦୁ ବ୍ୟଞ୍ଜନ ସହ ବିଶ୍ୱ ପଖାଳ ଦିବସ ପାଳନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଉ କହିଛନ୍ତି ପଖାଳ ତାଙ୍କର ପସନ୍ଦର ଖାଦ୍ୟ ।
Kanak News is now on WhatsApp
Join and get latest news updates delivered to you via WhatsApp
ସେପଟେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଓଡିଆଙ୍କ ପାରମ୍ପରକି ଖାଦ୍ୟ ପଖାଳ ଖାଇ, ପଖାଳ ଦିବସ ପାଳନ କରିଛନ୍ତି । ଧର୍ମେନ୍ଦ୍ର ତାଙ୍କ ଟ୍ୱିଟର ଆକାଉଣ୍ଟରେ ପଖାଳ ଦିବସର ଅଭିନନ୍ଦନ ଜଣାଇଛନ୍ତି । ଲେଖିଛନ୍ତି, ପଖାଳର ସ୍ଥାନ ସ୍ୱତନ୍ତ୍ର । ଏହା କେବଳ ଆମ ପାଇଁ ଖାଦ୍ୟ ନୁହେଁ ବରଂ ଖାଦ୍ୟ ପାଇଁ ଥିବା ଆମର ଭଲପାଇବା, ଶ୍ରଦ୍ଧା ଓ ସଦିଚ୍ଛାର ନିଚ୍ଛକ ପ୍ରମାଣ । ସେହିପରି ବୟାନ ପାଇଁ ସର୍ବଦା ଚର୍ଚ୍ଚିତ କଂଗ୍ରେସ ବିଧାୟକ ସୁର ରାଉତରାୟ ମଧ୍ୟ ପରିବାର ସହ ଘରେ ପଖାଳ ଦିବସ ପାଳନ କରିଛନ୍ତି । ସୁର ନିଜେ ପଖାଳ ଖାଇବା ସହ ଅନ୍ୟମାନଙ୍କୁ ମଧ୍ୟ ପଖାଳ ଖୁଆଇଛନ୍ତି ।
ବରିଷ୍ଠ ବିଜେଡି ନେତା ପ୍ରସନ୍ନ ପାଟ୍ଟଶାଣୀ ପରିବାରର ସମସ୍ତ ସଦସ୍ୟଙ୍କ ସହ ପଖାଳ ଖାଇ ପଖାଳ ଦିବସ ପାଳନ କରିଛନ୍ତି । କଦଳୀ ପତ୍ରରେ ବଡି ଚୁରା, ମାଝ ଭଜା, ଶାଗ ଭଳି ସୁସ୍ୱାଦୁ ବ୍ୟଞ୍ଜନ ଓ କଂସାରେ ପଖାଳ । ଭୂଇଁରେ ବସି ପଖାଳର ମଜା ନେଇଛନ୍ତି ପୂର୍ବତନ ସାଂସଦ ପ୍ରସନ୍ନ ପାଟ୍ଟଶାଣୀ । ସେହିପରି ବାଲେଶ୍ୱର ସାଂସଦ ପ୍ରତାପ ଷଡଙ୍ଗୀଙ୍କ ଘରେ ପଖାଳ ଦିବସ ପାଳନ ପାଇଁ ଏ ପ୍ରସ୍ତୁତି । ମାଛ ଭଜା ହେଉଛି, ଶାଗ ଖରଡା ଚାଲିଛି । ଆଉ ରୋଷେଇ ସରିବା ପରେ ପରିବାର ଲୋକଙ୍କ ସହ ବସି ପଖାଳ ଖାଇ ବିଶ୍ୱ ପଖାଳ ଦିବସ ପାଳନ କରିଛନ୍ତି ସାଂସଦ ପ୍ରତାପ ଷଡଙ୍ଗୀ ।
ଓଡିଆଙ୍କ ପାରମ୍ପାରିକ ଖାଦ୍ୟ ହେଉଛି ପଖାଳ । ସେ ଗରିବ ହେଉ କି ଧନୀ, ସମସ୍ତ ଓଡିଆଙ୍କ ଏହା ହେଉଛି ପସନ୍ଦର ଖାଦ୍ୟ । ଖଟି ଖିଆର ଭାତହାଣ୍ଡିରୁ ମନ୍ଦିର ଏପରିକି ସୌଖିନ ହୋଟେଲ ଯାଏଁ ମେନ୍ୟୁରେ ଏବେ ସ୍ଥାନ ପାଉଛି ପଖାଳ । ତେବେ ଏହି ପଖାଳର ପ୍ରଚାର ପ୍ରସାର ପାଇଁ ୨୦୧୫ରୁ ମାର୍ଚ୍ଚ ୨୦ ତାରିଖକୁ ବିଶ୍ୱ ପଖାଳ ଦିବସ ଭାବେ ପାଳନ କରାଯାଇ ଆସୁଛି ।