ବ୍ୟାଗରେ ୨୫ ହଜାର ଟଙ୍କାର ଖୁଚୁରା ପଇସା ନେଇ ଜିଲ୍ଲାପାଳଙ୍କ କାର୍ଯ୍ୟଳୟରେ ପହଂଚିଲେ ପ୍ରାର୍ଥୀ । ନାମାଙ୍କନ ଭରିବାକୁ ମାଗିଲେ ଫର୍ମ
କନକ ବ୍ୟୁରୋ : ଲୋକସଭା ନିର୍ବାଚନ ଭିତରେ ଉତ୍ତର ପ୍ରଦେଶ ବାରଣାସୀରୁ ଅଜବ ଗଜବ ଖବର ସାମ୍ନାକୁ ଆସୁଛି । କିଏ ଜୀବିତ ରହିଛି ବୋଲି ପ୍ରମାଣ କରିବାକୁ ନିର୍ବାଚନ ଲଢୁଛି ତ କିଏ ଅନ୍ୟ ପାର୍ଟିକୁ ହରାଇବାକୁ ନିର୍ବାଚନ ଲଢୁଛି । ଏସବୁ ମଧ୍ୟରେ ଏକ ରୋଚକ ଚିତ୍ର ସାମ୍ନାକୁ ଆସିଛି । ଶୁକ୍ରବାର ଦିନ ବାରଣାସୀ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଜଣେ ବ୍ୟକ୍ତି ୨୫ ହଜାର ଟଙ୍କାର ଖୁଚୁରା ପଇସା ନେଇ ହଠାତ ପ୍ରବେଶ କରିଥିଲେ । ବ୍ୟକ୍ତି ଜଣଙ୍କ ହେଉଛନ୍ତି ବୈଧ୍ୟରାମ ଗୁପ୍ତା । ସେ ସ୍ୱାଧୀନ ଭାବେ ନାମାଙ୍କନ ଭରିବାକୁ ଏତେଗୁଡିଏ ଖୁଚୁରା ପଇସା ନେଇ ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଂଚିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଜିଲ୍ଲାପାଳଙ୍କ କାର୍ଯ୍ୟାଳୟ ବାହାରେ ଗଣମାଧ୍ୟମ ସାମ୍ନାରେ ବୈଧ୍ୟରାମ ବ୍ୟାଗ ଖୋଲି ୨୫ ହଜାର ଟଙ୍କାର ଖୁଚୁରା ପଇସା ଲୋକଙ୍କ ଆଗରେ ରଖିଥିଲେ । ସେ ଏକା ନଥିଲେ, ତାଙ୍କ ସହ ତାଙ୍କ ଓକିଲ ମଧ୍ୟ ଥିଲେ । କୁହାଯାଉଛି କି, ଏହା ପୂର୍ବରୁ ବୈଧ୍ୟରାମ ଏହି ଖୁଚୁରା ପଇସାକୁ ନେଇ ବିକାଶ ଭବନ ସ୍ଥିତ ନିର୍ବାଚନ କାର୍ଯ୍ୟାଳୟ ଯାଇଥିଲେ । ଏହି ଖୁଚୁରା ପଇସା ଭର୍ତ୍ତି ବ୍ୟାଗକୁ ସେ ଅଫିସରଙ୍କ ସାମ୍ନାରେ ରଖିଲେ । ଏହାକୁ ନେଇ ଅନେକ ଦିନ ଚର୍ଚ୍ଚା ଲାଗି ରହିଥିଲା ।
ବୈଧ୍ୟରାମ କହିଛନ୍ତି କି, ସେ କାହା ବିରୋଧରେ ନିର୍ବାଚନ ଲଢିବାକୁ ଯାଉନାହାଁନ୍ତି ବରଂ ଲୋକତନ୍ତ୍ରର ଅଧିକାର କ୍ରମରେ ସେ ନିର୍ବାଚନ ଲଢିବାକୁ ଯାଉଛନ୍ତି । ନାମାଙ୍କନ ପତ୍ର ପାଇଁ ସେ ପୁରା ୨୫ ହଜାର ଟଙ୍କା ଆଣିଛନ୍ତି । ଏବେ ଏହା ଜିଲ୍ଲାପାଳଙ୍କ କାର୍ଯ୍ୟାଳୟର କର୍ମଚାରୀଙ୍କ ପାଇଁ ମୁଣ୍ଡବିନ୍ଧାର କାରଣ ପାଲଟିଛି । କାରଣ ଏହି ଖୁଚୁରା ପଇସା ମଧ୍ୟରେ ସର୍ବାଧିକ ୧,୨,୫ ଓ ୧୦ ଟଙ୍କିଆ ମୁଦ୍ରା ରହିଛି ।
ବାରଣାସୀ ଲୋକସଭା ପାଇଁ ଆଜି ଅନେକ ପ୍ରାର୍ଥୀ ନାମାଙ୍କନ ଭରିଛନ୍ତି । ସେମାନଙ୍କ ମଧ୍ୟରେ ରହିଛନ୍ତି ଇଣ୍ଡିଆ ମେଣ୍ଟର ପ୍ରାର୍ଥୀ ଅଜୟ ରାୟ । ବାରଣାସୀ ଲୋକସଭା ପାଇଁ ନାମାଙ୍କନ ଭରିବାର ଶେଷ ତାରିଖ ହେଉଛି ଚଳିତ ମାସ ୧୪ ତାରିଖ । ୧୪ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନାମାଙ୍କନ ଭରିବେ ।