କନକ ବ୍ୟୁରୋ: ଏବେ ଏୟାର ଇଣ୍ଡିିଆକୁ ନେଇ ଖବର ଜୋର ଧରୁଛି । ତେବେ ଏୟାର ଇଣ୍ଡିଆର ଏପରି ବି ଏକ ଅଧ୍ୟାୟ ଥିଲା ଯେତେବେଳେ ଏହାର କକପିଟକୁ ସମ୍ଭାଳୁଥିଲେ ଦେଶର ଜଣେ ପୂର୍ବ ପ୍ରଧାନମନ୍ତ୍ରୀ । ପାଇଲଟ୍ ହେବା ତାଙ୍କର ସ୍ୱପ୍ନ ଥିଲା । ଆକାଶରେ ବିମାନ ଉଡାଇବା ବେଳେ ନିଜକୁ ଏକ ମୁକ୍ତ ବିହଙ୍ଗ ବୋଲି ଭାବୁଥିଲେ । କିନ୍ତୁ ଭାଗ୍ୟ ତାଙ୍କୁ ଟାଣି ଆଣିଲା ରାଜନୀତି ବଳୟ ଭିତରକୁ । ରାଜନୀତି କୁ ଆସିବା ପୂର୍ବରୁ ଯେତେବେଳେ ତାଙ୍କୁ ପାଇଲଟ ଚାକିରି ଛାଡିବାକୁ କୁହାଗଲା।
Kanak News is now on WhatsApp
Join and get latest news updates delivered to you via WhatsApp
ଏହି ପ୍ରଧାନମନ୍ତ୍ରୀ ଜଣକ ହେଉଛନ୍ତି ନେହେରୁ- ଗାନ୍ଧୀ ପରିବାରର ଶେଷ ପ୍ରଧାନମନ୍ତ୍ରୀ ରାଜୀବ ଗାନ୍ଧୀ । ଯିଏ ରାଜନୀତିକୁ ଆସିବା ପୂର୍ବରୁ ଏୟାର ଇଣ୍ଡିଆରେ ପାଇଲଟ ଭାବେ କାମ କରୁଥିଲେ । ଡେରାଡୁନରୁ ସ୍କୁଲ ପଢା ଶେଷ ପରେ ରାଜୀବ ଗାନ୍ଧୀ ବିଦେଶ ଗଲେ । ସେଠାରେ କେମ୍ବ୍ରିଜର ଟ୍ରିନିଟି କଲେଜରେ ଇଂଜିନିଅରିଙ୍ଗ ପଢିବାକୁ ନାମ ଲେଖାଇଲେ । ହେଲେ ଏଥିରେ ତାଙ୍କର ମନ ଲାଗିଲା ନାହିଁ । ପୁଣି ଦିଲ୍ଲୀ ଫେରି ଆସିଲେ । ଏଠାରେ ଦିଲ୍ଲୀ ଫ୍ଲାଇଙ୍ଗ କ୍ଲବରୁ ପାଇଲଟ୍ ଟ୍ରେନିଙ୍ଗ ନେଲେ । ଏହାପରେ ସେ ଏୟାର ଇଣ୍ଡିଆରେ ପାଇଲଟ୍ ଭାବେ ଯୋଗ ଦେଲେ ।
୧୯୭୦ରେ ଏୟାର ଇଣ୍ଡିଆ କମ୍ପାନୀରେ ରାଜୀବ ଗାନ୍ଧୀଙ୍କୁ ଡୋମେଷ୍ଟିକ୍ ରୁଟରେ ପାଇଲଟ୍ ଭାବେ ନିଯୁକ୍ତି ମିଳିଲା । ସେ ଅଧିକାଂଶତଃ ଦିଲ୍ଲୀ- ଜୟପୁର ରୁଟରେ ବିମାନ ଉଡାଣ କରୁଥିଲେ । ସେତେବେଳେ ତାଙ୍କର ଦରମା ଥିଲା ୫୦୦୦ ଟଙ୍କା । ସେତେବେଳେ ତାଙ୍କ ମା’ ଇନ୍ଦିରା ଗାନ୍ଧୀ ଥିଲେ ଦେଶର ପ୍ରଧାନମନ୍ତ୍ରୀ । ମା’ ପ୍ରଧାନମନ୍ତ୍ରୀ ହୋଇଥିଲେ ବି ପାଇଲଟ ଭାବେ ଚାକିରି କରିବାକୁ ପସନ୍ଦ କରୁଥିଲେ ରାଜୀବ । କାରଣ ଏହା ତାଙ୍କର ନିଶା ଥିଲା । ରାଜନୀତିରେ ରାଜୀବଙ୍କର ଆଦୌ ରୁଚି ନଥିଲେ ବି ଭାଇ ସଂଜୟ ଗାନ୍ଧୀଙ୍କ ମୃତ୍ୟୁ ପରେ ତାଙ୍କୁ ରାଜନୀତିକୁ ଆସିବାକୁ ପଡିଲା । ଆଉ ପଛରେ ରହିଗଲା ଆକାଶରେ ଉଡିବାର ଇଚ୍ଛା ।