ଯୋଗାସନ କଲେ ପ୍ରଧାନମନ୍ତ୍ରୀ ଓ ରାଷ୍ଟ୍ରପତି: ବିଶ୍ୱକୁ ଦେଲେ ଆରୋଗ୍ୟ ରହିବାର ମନ୍ତ୍ର
କନକ ବ୍ୟୁରୋ: ଭାରତ ସମେତ ସାରା ବିଶ୍ୱ ପାଳନ କରିଛି ଅଷ୍ଟମ ଅନ୍ତରାଷ୍ଟ୍ରୀୟ ଯୋଗ ଦିବସ । ବିଶ୍ୱ ଯୋଗ ଦିବସରେ କାଶ୍ମୀରରୁ କନ୍ୟାକୁମାରୀ ଯାଏଁ ଯୋଗର ଧୁମ ଦେଖିବାକୁ ମିଳିଛି । ବିଶ୍ୱ ଯୋଗ ଦିବସରେ କର୍ଣ୍ଣାଟକର ମହୀଶୂର ରାଜପ୍ରାସାଦ ଗାର୍ଡେନରେ ଆୟୋଜିତ କାର୍ଯ୍ୟକ୍ରମରେ ସାମିଲ ହୋଇଥିଲେ ପ୍ରଧାନମନ୍ତ୍ରୀ । ପା୧୫ ହଜାର ଲୋକଙ୍କ ସହ ପାଖାପାଖି ୪୫ ମିନିଟ ଧରି ଯୋଗ କରିଥିଲେ ନରେନ୍ଦ୍ର ମୋଦୀ । ଏହି ଅବସରରେ ପ୍ରଧାନମନ୍ତ୍ରୀ କହିଛନ୍ତି ଯୋଗ ଏବେ ଅନ୍ତର୍ଜାତୀୟ ପର୍ବରେ ପରିଣତ ହୋଇଛି । ସେପଟେ ରାଷ୍ଟ୍ରପତି ଭବନରେ ଯୋଗସନ କରିଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ ।
Kanak News is now on WhatsApp
Join and get latest news updates delivered to you via WhatsApp
ଅନ୍ତର୍ଜାତୀୟ ଯୋଗ ଦିବସରେ ହରିଦ୍ୱାର ପତଞ୍ଜଳି ଯୋଗପୀଠରେ ଶତାଧିକ ଲୋକଙ୍କ ସହ ଯୋଗଭ୍ୟାସ କରିଛନ୍ତି ଯୋଗ ଗୁରୁ ବାବା ରାମଦେବ । ଏହି କାର୍ଯ୍ୟକ୍ରମରେ ଛୋଟ ପିଲା ଓ ମହିଳାମାନେ ମଧ୍ୟ ସାମିଲ ହୋଇଥିଲେ । ଭୋରରୁ ସକାଳ ୮ଟା ପର୍ଯ୍ୟନ୍ତ ଚାଲିଥିଲା ଯୋଗାଭ୍ୟାସ ।
ଓଡ଼ିଶାରେ ତିନି ଜଣ କେନ୍ଦ୍ରମନ୍ତ୍ରୀ ଯୋଗ କାର୍ଯ୍ୟକ୍ରମରେ ସାମିଲ ହୋଇଥିଲେ । କୋଣାର୍କରେ ଅନୁଷ୍ଠିତ ଯୋଗ ଦିବସରେ ସାମିଲ ହୋଇଥିଲେ କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ । ଶହ ଶହ ଲୋକଙ୍କ ସହ କୋଣାର୍କରେ ଅନ୍ତର୍ଜାତୀୟ ଯୋଗ ଦିବସ ପାଳନ କରିଛନ୍ତି କେନ୍ଦ୍ରମନ୍ତ୍ରୀ । ମୟୂରଭଂଜ ଖିଚିଂରେ ଅନୁଷ୍ଠିତ ଯୋଗ ଶିବିରରେ କେନ୍ଦ୍ର ମନ୍ତ୍ରୀ ବିଶ୍ୱେଶ୍ୱର ଟୁଡୁ ଓ ପୁରୀ ବ୍ଲୁ ଫ୍ଲାଗ ବିଚ୍ରେ ଆୟୋଜିତ ଯୋଗ ଦିବସରେ ସାମିଲ ହୋଇଥିଲେ କେନ୍ଦ୍ର ମନ୍ତ୍ରୀ ମହେନ୍ଦ୍ର ନାଥ ପାଣ୍ଡେ ।
ପାଣି ଭିତରେ ଭାସମାନ ଅବସ୍ଥାରେ ଯୋଗାସନ କରିଛନ୍ତି ଓଡ୍ରାଫ୍ ଯବାନ । ଭୁବନେଶ୍ୱର ସେଭେନଥ ବାଟାଲିୟନରେ ଦେଖିବାକୁ ମିଳିଛି ଏପରି ନିଆରା ଯୋଗାଭ୍ୟାସ । ସେପଟେ ଭାରତ- ତିବତ୍ ସୀମାରେ ଆଇଟିବିପିର ବୀର ଯବାନମାନେ ବରଫାବୃତ ପାହାଡରେ ଯୋଗ କରିଛନ୍ତି । ଲଦାଖର ୧୭ ହଜାର ଫୁଟ ଉଚ୍ଚ ବରଫ ଉପରେ ଯୋଗ ଦିବସ ପାଳନ କରିଛନ୍ତି ଆଇଟିବିପି ଯବାନ । ସେହିପରି ଉତରାଖଣ୍ଡରେ ୧୬ ହଜାର ଫୁଟ ଉପରେ ଯୋଗ ପାଳନ କରିଛନ୍ତି ଯବାନ ।
ଯୋଗର ଉପକାରିତାକୁ ସାରା ବିଶ୍ୱ ଉପଲବ୍ଧି କରିବା ପରଠୁ ୨୦୧୫ ଜୁନ ୨୧ ତାରିଖରୁ ବିଶ୍ୱ ଯୋଗ ଦିବସ ପ୍ରତିବର୍ଷ ଭାରତ ସମେତ ବିଭିନ୍ନ ରାଷ୍ଟ୍ରରେ ପାଳିତ ହୋଇ ଆସୁଛି । ଅନ୍ତର୍ଜାତୀୟ ଯୋଗ ଦିବସକୁ ଭବ୍ୟ କରିବା ପାଇଁ ବୈଦେଶିକ ମନ୍ତ୍ରାଳୟ ପକ୍ଷରୁ ମଧ୍ୟ ବିଶେଷ ପଦକ୍ଷେପ ନିଆଯାଇଛି ।