କନକ ବ୍ୟୁରୋ: ଦେଶରେ ଲୋକସଭା ନିର୍ବାଚନ ଚାଲିଥିବାବେଳେ ହରିୟାଣାରେ ବିଜେପି ସରକାରକୁ ଶକ୍ତ ଝଟକା ଲାଗିଛି । ରାଜ୍ୟର ନାଏବ ସିଂ ସୈନି ସରକାରରୁ ସମର୍ଥନ ପ୍ରତ୍ୟାହାର କରିଛନ୍ତି ୩ ନିର୍ଦ୍ଦଳୀୟ ବିଧାୟକ । ହରିୟାଣା କଂଗ୍ରେସ ସଭାପତି ଉଦୟ ଭାନ ଓ ପୂର୍ବତନ ମୁଖ୍ୟମନ୍ତ୍ରୀ ଭୂପିନ୍ଦର ସିଂ ହୁଡ୍ଡାଙ୍କ ଉପସ୍ଥିତିରେ ଏହି ୩ ନିର୍ଦ୍ଦଳୀୟ ବିଧାୟକ ବିଜେପି ସରକାରରୁ ସମର୍ଥନ ପ୍ରତ୍ୟାହାର କରି କଂଗ୍ରେସକୁ ସମର୍ଥନ ଦେବେ ବୋଲି ଘୋଷଣା କରିଛନ୍ତି । ରୋହତକରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ୩ ବିଧାୟକ ଏହି ଘୋଷଣା କରିଛନ୍ତି । ଫଳରେ ହରିୟାଣାର ବିଜେପି ସରକାର ସଂଖ୍ୟାଲଘୁରେ ପରିଣତ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ହରିୟାଣାର ପୂର୍ବତନ ମୁଖ୍ୟମନ୍ତ୍ରୀ ଭୂପିନ୍ଦର ସିଂ ହୁଡ୍ଡା ରାଜ୍ୟରେ ରାଷ୍ଟ୍ରପତି ଶାସନ ଲାଗୁ କରିବା ସହ ତୁରନ୍ତ ବିଧାନସଭା ନିର୍ବାଚନ କରିବାକୁ ଦାବି କରିଛନ୍ତି । ୧୨ ମାର୍ଚରେ ହିଁ ହରିୟଣାରେ ମୁଖ୍ୟମନ୍ତ୍ରୀ ପରିବର୍ତନ କରିଥିଲା ବିଜେପି । ମନୋହର ଲାଲ ଖଟ୍ଟରଙ୍କ ସ୍ଥାନରେ ନାଏବ ସିଂ ସୈନି ମୁଖ୍ୟମନ୍ତ୍ରୀ ହୋଇଥିଲେ । ୧୩ ମାର୍ଚରେ ସରକାର ବିରୋଧରେ ଅନାସ୍ଥା ପ୍ରସ୍ତାବ ଆଣିଥିଲେ ବିରୋଧୀ । ବିଧାନସଭାରେ ଏହି ପ୍ରସ୍ତାବ କାଟ ଖାଇଥିଲା । ନିୟମ ଅନୁସାରେ ଏବେ ଆଉ ୬ ମାସ ଯାଏଁ ଅନାସ୍ଥା ପ୍ରସ୍ତାବ ଅଣାଯାଇପାରିବ ନାହିଁ । ତେଣୁ ବିଜେପି ସରକାର ଅଳ୍ପମତରେ ଥିଲେ ବି ବଡ ଦଳ ଭାବେ ରହିବ । ହରିୟାଣାରେ ଚଳିତବର୍ଷ ଶେଷ ଆଡକୁ ବିଧାନସଭା ନିର୍ବାଚନ ହେବାର ଅଛି । ହରିୟାଣାର ବିଜେପି ସରକାରକୁ ସ୍ଥାନୀୟ ଆଂଚଳିକ ଦଳ ଜେଜେପି ସମର୍ଥନ ଦେଉଥିଲା । କିନ୍ତୁ ଏ ବର୍ଷ ପ୍ରାରମ୍ଭରେ ହିଁ ଜେଜେପି ବିଜେପି ସରକାରରୁ ସମର୍ଥନ ପ୍ରତ୍ୟାହାର କରିସାରିଛି ।
ହରିୟାଣା ବିଧାନସଭାର ସ୍ଥିତି କଣ
ମୋଟ ଆସନ: ୯୦
ବର୍ତ୍ତମାନ ସଦସ୍ୟ: ୮୮
ସଂଖ୍ୟାଗରିଷ୍ଠତା ପାଇଁ ଆବଶ୍ୟକ: ୪୫
ବିଜେପି+
ବିଜେପି: ୪୦
ସ୍ୱାଧୀନ ଓ ଅନ୍ୟାନ୍ୟ:୨
କଂଗ୍ରେସ+
କଂଗ୍ରେସ: ୩୦
ନିର୍ଦ୍ଦଳୀୟ:୪
ଅନ୍ୟାନ୍ୟ
ଜେଜେପି:୧୦
ଅନ୍ୟ:୨