କନକ ବ୍ୟୁରୋ: ଛାତ ଉପରେ ଆଶ୍ରୟ ନେଇଛନ୍ତି । ଏଭଳି ଦୃଶ୍ୟ ଖୋର୍ଦ୍ଧା ଜିଲ୍ଲା ଶରଧାପୁର ଗାଁରୁ ଆସିଛି । ପୁରା ଗାଁ ଏବେ ପାଣି ଘେରରେ । ଗାଁ ମଝିରେ ଏବେବି ଆଣ୍ଠୁଏ ଉଚ୍ଚର ପାଣି । ଘରେ ବି ପାଣି ପଶିଯାଇଛି । ଫଳରେ ଲୋକ ଏବେ ଛାତ ଉପରେ ଆଶ୍ରୟ ନେଉଛନ୍ତି । ଦିନ ରାତି ବନ୍ୟା ବିପନ୍ନଙ୍କ ସମୟ କଟୁଛି ଛାତ ଉପରେ । ସରକାରଙ୍କ ପକ୍ଷରୁ ଏବେ ଦୁଇ ଓଳି ରନ୍ଧା ଖାଦ୍ୟ ଯୋଗାଇ ଦିଆଯାଉଛି । ଖାଲି ଶରଧାପୁର ନୁହେଁ, କୁରୁମପଡ଼ା, ମାନପୁର, ବଳପୁର, ଧବଳପୁର, ଓରପି ପରି ଗାଁ ଏବେ ବନ୍ୟା ପାଣି ଘେରରେ ।
Kanak News is now on WhatsApp
Join and get latest news updates delivered to you via WhatsApp
ସେହି ସମାନ ଚିତ୍ର ଖୋର୍ଦ୍ଧା ଜିଲ୍ଲା ହରିମୂଳ ଗାଁର । ପୁରା ଗାଁ ଜଳବନ୍ଦୀ ହୋଇ ରହିଛି । ବନ୍ୟା ପାଣି କମିଛି, ହେଲେ ଏବେ ରାସ୍ତା ଉପରେ ଆଣ୍ଠୁଏ ଉଚ୍ଚର ପାଣି । ଗାଁ ଚାରିପଟେ ବନ୍ୟା ପାଣି ଘେରି ରହିଥିବାରୁ ଲୋକେ ଡଙ୍ଗାରେ ଯିବାଆସିବା କରୁଛନ୍ତି । ରାଜୁଆ ନଦୀରେ ବନ୍ୟା ଯୋଗୁଁ ଖୋର୍ଦ୍ଧା ଜିଲ୍ଲାର ଓରବରସିଂ, ନରଣଗଡ଼, ବ୍ରଜମୋହନପୁର ପଞ୍ଚାୟତର ୧୫ଟି ଗାଁ ଜଳବନ୍ଦୀ ହୋଇ ରହିଥିଲା । ସ୍ଥିତିରେ ଧୀରେ ଧୀରେ ସୁଧାର ଆସୁଥିବା ବେଳେ କିଛି ଘରକୁ ଫେରୁଛନ୍ତି ।
ସୁବର୍ଣ୍ଣରେଖା ବନ୍ୟା ସ୍ଥିତିରେ ସୁଧାର ଆସୁଛି । ହେଲେ ଏବେବି ଭୋଗରାଇ ଓ ବାଲିଆପାଳ ବ୍ଲକର ଅନେକ ଗାଁର ଲୋକେ ଏବେ ବି ପାଣି ଘେରରେ ରହିଛନ୍ତି । ବନ୍ୟା ବିପନ୍ନଙ୍କ ପାଖରେ ଅତ୍ୟାବଶ୍ୟକୀୟ ସାମଗ୍ରୀ ପଠାଇବା ପାଇଁ ସରକାରୀ ଉଦ୍ୟମ ଜାରି ରହିଛି । ସେପଟେ ବନ୍ୟାପାଣି ହେକ୍ଟର ହେକ୍ଟର ଜମିର ଚାଷ ମଧ୍ୟ ଉଜାଡ଼ି ଦେଇଛି ।