କନକ ବ୍ୟୁରୋ: ପ୍ରାୟ ୨୦ଦିନ ହେବ ବନ୍ଦ ରହିବା ପରେ ବୁଧବାର ଦାରୁଠେଙ୍ଗସ୍ଥିତ ଭୁଆଶୁଣି ଡମ୍ପିଂୟାର୍ଡକୁ ଯାଇଛି ଭୁବନେଶ୍ୱର ମହାନଗର ନିଗମ ଅଞ୍ଚଳର ଅଳିଆ । ଦାରୁଠେଙ୍ଗବାସୀ ରାଜି ହେବା ପରେ ଗାଡକଣସ୍ଥିତ ଅସ୍ଥାୟୀ ଡମ୍ପିଂୟାର୍ଡରୁ ଅଳିଆ ଉଠାଯାଇ ଭୁଆଶୁଣି ଡମ୍ପିଂୟାର୍ଡକୁ ସ୍ଥାନାନ୍ତର କରାଯାଇଛି । ଅଳିଆ ଉଠିବା ପରେ ଦାରୁଠେଙ୍ଗବାସୀଙ୍କୁ ଧନ୍ୟବାଦ ଦେଇଛନ୍ତି ବିଏମସି ମେୟର ।
Kanak News is now on WhatsApp
Join and get latest news updates delivered to you via WhatsApp
ରାଜଧାନୀର ଅଳିଆ ଉଠିବା ପରେ ବିଏମସି କମିଶନର ଦାରୁଠେଙ୍ଗବାସୀଙ୍କୁ ଧନ୍ୟବାଦ ଦେବା ସହ କହିଛନ୍ତି, ଟ୍ରକ ଯୋଗେ ଜମା ହୋଇଥିବା ଅଳିଆକୁ ଉଠାଯାଇଛି । ଦୈନିକ ଦୁଇଶହ ଟ୍ରକରେ ଅଳିଆ ଉଠାଯାଇ ସ୍ଥାନାନ୍ତର କରାଯିବ । ଜମା ହୋଇଥିବା ଅଳିଆ ସଫା ହେବା ପରେ ପର୍ଯ୍ୟାୟକ୍ରମେ ଟ୍ରକ ସଂଖ୍ୟାକୁ ହ୍ରାସ କରାଯିବ । ୯ମାସ ମଧ୍ୟରେ ଅଧିକ କ୍ଷମତା ବିଶିଷ୍ଟ ଏମସିସି ବା ମାଇକ୍ରୋ କମ୍ପୋଷ୍ଟ ସେଣ୍ଟର ପ୍ରତିଷ୍ଠା କରାଯିବ । ସହରରୁ ବାହାରୁ ଥିବା ଅଳିଆକୁ ଭୁବନେଶ୍ୱର ଭିତରେ ଏମସିସିରେ ପୃଥକୀକରଣ ଓ ପକ୍ରିୟାକରଣ କରି ପରିଚାଳନା କରାଯିବ ।
ତେବେ ଡମ୍ପିଂୟାର୍ଡର ସ୍ଥାୟୀ ସମାଧାନ ପାଇଁ ବିଏମସି ନିର୍ଦ୍ଧାରିତ ସମୟ ମଧ୍ୟରେ କଣ ପଦକ୍ଷେପ ନେଉଛି, ନିୟମିତ ବ୍ୟବଧାନରେ ତାର ସମୀକ୍ଷା କରିବାକୁ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ସଚିବଙ୍କୁ ଦାୟିତ୍ୱ ଦିଆଯାଇଛି । ସେହିଭଳି ବିଏମସି କମିସନର ଓ ଦାରୁଠେଙ୍ଗ ସରପଞ୍ଚଙ୍କ ମଧ୍ୟରେ ନିୟମିତ ବ୍ୟବଧାନରେ ସମନ୍ୱୟ ବୈଠକ କରିବାକୁ କୁହାଯାଇଛି ।
ଗତ ୨୦ଦିନ ହେଲା ଦାରୁଠେଙ୍ଗବାସୀଙ୍କ ବିରୋଧ ଯୋଗୁଁ ଭୁବନେଶ୍ୱର ମହାନଗର ଅଞ୍ଚଳରୁ ଅଳିଆ ଉଠିପାରୁନଥିଲା । ସହରର ଅଳିଆ ଯୋଗୁଁ ସେମାନେ କାହିଁକି କ୍ଷତି ସହିବେ ବୋଲି କହି ଭୁଆଶୁଣି ଡମ୍ପିଂୟାର୍ଡକୁ ଅଳିଆ ଗାଡିକୁ ଛାଡୁ ନଥିଲେ । ଆଉ ଏପଟେ ସହର ଭିତରେ ବଢ଼ି ଚାଲିଥିଲା ଅଳିଆ ଗଦା । ଶେଷରେ ମଙ୍ଗଳବାର ରାଜ୍ୟ ସରକାର ମୁଣ୍ଡ ପୂରାଇବା ପରେ ବିବାଦର ସମାଧାନ ହୋଇଛି । ୯ମାସ ପରେ ଅର୍ଥାତ ମେ ୨୦୨୩ ପରେ ଦାରୁଠେଙ୍ଗକୁ ଆଉ ଅଳିଆ ଯିବ ନାହିଁ ବୋଲି ବୋଲି ଲିଖିତ ପ୍ରତିଶ୍ରୁତି ମିଳିବା ପରେ ରାଜି ହୋଇଥିଲେ ଦାରୁଠେଙ୍ଗବାସୀ । ତେବେ ଅଳିଆ ଯିବା ବନ୍ଦ ହେବା ପରେ ଦାରୁଠେଙ୍ଗ ସରପଞ୍ଚ ଓ ବିଏମସି କମିଶନରଙ୍କ ମଧ୍ୟରେ ବାୟୋମାଇନିଂ ପ୍ରକଳ୍ପ ସମ୍ପର୍କରେ ଆଲୋଚନା କରାଯାଇ କାର୍ଯ୍ୟ ଆରମ୍ଭ କରିବାକୁ ନିଷ୍ପତି ନିଆଯାଇଛି ।