ପତ୍ନୀଙ୍କ ସହ ରହିବାକୁ ଜେଲରେ ଉପବାସ ରହି ଅନଶନ କରୁଛନ୍ତି ସୁକେଶ ଚନ୍ଦ୍ରଶେଖର, ଅଡୁଆରେ ଜେଲ ପ୍ରଶାସନ
କନକ ବ୍ୟୁରୋ : ୨୦୦ କୋଟି ଟଙ୍କାରୁ ଅଧିକ ଠକି ନେଇ ବଲିଉଡର ହିରୋଇନମାନଙ୍କୁ ଉପହାର ଦେଇଥିବା ମହାଠକ ସୁକେଶ ଚନ୍ଦ୍ରଶେଖର ଏବେ ଜେଲରେ ନୂଆ ବାହାନା ଦେଖାଉଛନ୍ତି । ଦିଲ୍ଲୀ ତିହାର ଜେଲରେ ଥିବା ସୁକେଶ ଏବେ ନିଜ ପତ୍ନୀଙ୍କ ସହ ରହିବାକୁ ଜେଲରେ ଉପବାସ ରହି ଅନଶନ ଜାରି ରଖିଛନ୍ତି । ତିହାର ଜେଲର ଡିଜି କହିଛନ୍ତି କି ସୁକେଶ ଦାବି କରିଛନ୍ତି ଜେଲର ୬ ନମ୍ବର ମହିଳା କୋଠରୀରେ ବନ୍ଦିଥିବା ତାଙ୍କ ପତ୍ନୀ ଲୀନା ମାରିୟାଙ୍କ ସହ ରହିବାକୁ ଜିଦ୍ କରିଛନ୍ତି । ଏଭଳି କିଛି ଦାବି ଏବେ ଜେଲ ପ୍ରଶାସନର ମୁଣ୍ଡବିନ୍ଧାର କାରଣ ପାଲଟିଛି ।
Kanak News is now on WhatsApp
Join and get latest news updates delivered to you via WhatsApp
ଜେଲ ଡିଜିଙ୍କ କହିବାକୁ ମୁତାବକ ଜେଲରେ ସ୍ତ୍ରୀ ସହିତ ରହିବାକୁ ଜିଦ କରି ସୁକେଶ ୨୩ ଏପ୍ରିଲ ରୁ ମଇ ୨ ତାରିଖ ପର୍ଯ୍ୟନ୍ତ ଉପବାସରେ ଅନଶନ କରିଥିଲେ । ଏବେ ପୁଣି ମଇ ୪ ତାରିଖରୁ ୧୨ ତାରିଖ ମଧ୍ୟରେ ସେ ଅନଶନ କରିଛନ୍ତି । ଏହି ଅନଶନ ବେଳେ ସୁକେଶ ଖାଦ୍ୟ ପାନୀୟ ବର୍ଜନ କରିଥିଲେ । ଏହାକୁ ନଜରରେ ରଖି ଜେଲ ପକ୍ଷରୁ ତାଙ୍କୁ ତରଳ ଗ୍ଲୁକୋଜ ଦିଆଯାଇଥିଲା ।
କହିରଖୁ କି ମହାଠକ ସୁକେଶ ୧୭ ବର୍ଷ ବୟସରୁ ନିଜର ଅପରାଧିକ କାର୍ଯ୍ୟକଳାପ ଆରମ୍ଭ କରିଥିଲେ । ସେ ନିଜକୁ ଜଣେ ବରିଷ୍ଠ ଅଧିକାରୀର ପରିଚୟ ଦେଇ ଲୋକଙ୍କ ଠାରୁ ଫୋନ ମାଧ୍ୟମରେ କୋଟି କୋଟି ଟଙ୍କା ଚାନ୍ଦା ଆଦାୟ କରୁଥିଲେ । ଏହି ଚାନ୍ଦା ଅର୍ଥରେ ସେ ବଲିଉଡର କିଛି ହିରୋଇନଙ୍କୁ ଦାମୀ ଉପହାର ଦେଇ ସେମାନଙ୍କ ସହ ପ୍ରେମ ସଂପର୍କ ରଖିଥିବା କଥା ଏବେ ଇଡି ଖୋଲାସା କରିଛି ।