ରାଜ୍ୟ ସରକାରଙ୍କ ବିଜ୍ଞାପନ ବନାମ ସେଲର ବିଜ୍ଞାପନ । ଶ୍ରେୟକୁ ନେଇ ଆରମ୍ଭ ହେଲା ରାଜନୀତି ।
କନକ ବ୍ୟୁରୋ : ତେଜିଲା ଶ୍ରେୟ ରାଜନୀତି । ବିଜେଡି-ବିଜେପି ମୁହାଁମୁହିଁ । ଶନିବାର ଦିନ ରାଉରକେଲାକୁ ବିମାନ ଉଡିଲା । କିନ୍ତୁ କିଏ ଶ୍ରେୟ ନେବ, ଏହାକୁ ନେଇ ଦୁଇ ଦିନ ଧରି ସରଗରମ ହେବାରେ ଲାଗିଛି ରାଜ୍ୟ ରାଜନୀତି । ଖବର କାଗଜରେ ପ୍ରକାଶିତ ଦୁଇଟି ବିଜ୍ଞାପନ ଚର୍ଚ୍ଚାର କେନ୍ଦ୍ରରେ ରହିଛି । ଗୋଟିଏ ପଟେ ଶନିବାର ଦିନ ପ୍ରକାଶ ପାଇଥିବା ରାଜ୍ୟ ବାଣିଜ୍ୟ ଓ ପରିବହନ ବିଭାଗର ବିଜ୍ଞାପନ, ଅନ୍ୟପଟେ କେନ୍ଦ୍ର ସରକାରଙ୍କ ଅଧୀନ ଷ୍ଟିଲ୍ ଅଥରିଟି ଅଫ୍ ଇଣ୍ଡିଆ ପକ୍ଷରୁ ରବିବାର ପ୍ରକାଶ ପାଇଥିବା ବିଜ୍ଞାପନ । ରାଜ୍ୟ ବିଜ୍ଞାପନରେ ପ୍ରଧାନମନ୍ତ୍ରୀଙ୍କ ନରେନ୍ଦ୍ର ମୋଦୀଙ୍କ ଫଟୋ ନଥିବାରୁ କ୍ଷୋଭ ପ୍ରକାଶ କରିଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଏପଟେ ଷ୍ଟିଲ୍ ଅଥରିଟି ଅଫ୍ ଇଣ୍ଡିଆ ପକ୍ଷରୁ ପ୍ରକାଶ ପାଇଥିବା ବିଜ୍ଞାପନରେ ରାଉରକେଲାକୁ ବିମାନ ଚଳାଚଳ ପାଇଁ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଦିଆଯାଇଛି । ଏବଂ ଏଥିରେ କେବଳ ମୋଦୀଙ୍କ ଫଟୋ ପ୍ରକାଶ ପାଇଛି । ଯାହାକୁ ହଜମ କରିପାରିନାହିଁ ବିଜେଡି । ଧର୍ମେନ୍ଦ୍ରଙ୍କ ମହାନତା କୁଆଡ଼େ ଗଲା ବୋଲି ପ୍ରଶ୍ନ କରିଛନ୍ତି ମନ୍ତ୍ରୀ ଅଶୋକ ପଣ୍ଡା । ଏହାର ପ୍ରତିକ୍ରିୟାରେ ବିରୋଧୀ ଦଳ ନେତା କହିଛନ୍ତି, ବାରମ୍ବାର ଅପମାନିତ କରି ସୌଜନ୍ୟତା ଆଶା କରିବା ବେକାର । ଅନ୍ୟପଟେ କଂଗ୍ରେସ ବିଧାୟକ ସୁର ରାଉତରାୟ କହିଛନ୍ତି, କ୍ଷମତା ପାଇଁ ଉଭୟ ବିଜେଡି ଓ ବିଜେପି ଶସ୍ତା ରାଜନୀତି କରୁଛନ୍ତିି ।
Kanak News is now on WhatsApp
Join and get latest news updates delivered to you via WhatsApp
ସାଧାରଣ ନିର୍ବାଚନକୁ ଆହୁରି ୧୫ ମାସ ବାକି ଥିବା ବେଳେ ରାଜ୍ୟରେ ରାଜନୈତିକ ବାତାବରଣ ଉଷ୍ଣ ହେବାରେ ଲାଗିଛି । ଦୁଇ ପ୍ରମୁଖ ଦଳ ମଧ୍ୟରେ ଲାଗି ରହିଛି କଥା କଟାକଟି ।