ଧୋକାଦେଉଛି ମୌସୁମୀ, ସାରା ରାଜ୍ୟରେ ଅସହ୍ୟ ତାତି । ଓଡ଼ିଶାକୁ ବିଳମ୍ବ ହୋଇପାରେ ଦକ୍ଷିଣ-ପଶ୍ଚିମ ମୌସୁମୀ ବାୟୁପ୍ରବାହ ।
କନକ ବ୍ୟୁରୋ: ଆକାଶରୁ ଯେଭଳି ନିଆଁ ବର୍ଷା ହେଉଛି, ତାକୁ ଦେଖିଲେ ସ୍ପଷ୍ଟ ଜଣାପଡୁଛି ଯେ, ମୌସୁମୀ ଆସିବାକୁ ଆହୁରି ସମୟ ବାକିଅଛି । ଏଥର ମୌସୁମୀ ଆଗୁଆ ଆସିବ ଏବଂ ପ୍ରାକ ମୌସୁମୀ ବର୍ଷାରେ ଓଡିଶା ଭିଜିବ ବୋଲି ପାଣିପାଗ ବିଭାଗ ଯେଉଁ ଆକଳନ କରିଥିଲା ତାହା ବର୍ତମାନ ସୁଦ୍ଧା ଭୁଲ ପ୍ରମାଣିତ ହୋଇଛି । ବାୟୁମଣ୍ଡଳରେ ଏମିତି ପରିସ୍ଥିତି ସୃଷ୍ଟି ହୋଇଛି ଯେ, ମୌସୁମୀ ଓଡିଶା ଛୁଇଁବା ତ ଦୂରର କଥା ପ୍ରାକ ମୌସୁମୀ ବର୍ଷାର ବି ଦେଖାନାହିଁ ।
Kanak News is now on WhatsApp
Join and get latest news updates delivered to you via WhatsApp
ଚଳିତବର୍ଷ ୩ ଦିନ ଆଗରୁ କେରଳରେ ପହଞ୍ଚିଥିଲା ଦକ୍ଷିଣ-ପଶ୍ଚିମ ମୌସୁମୀ ବାୟୁ । ସାଧାରଣତଃ କେରଳରେ ମୌସୁମୀ ଛୁଇଁବାର ୨ ସପ୍ତାହେ ଭିତରେ ଓଡିଶାକୁ ଆସୁଥିବାରୁ ଜୁନ ୧୦ରୁ ୧୨ ମଧ୍ୟରେ ମୌସୁମୀ ବର୍ଷା ଆରମ୍ଭ ହେବାକଥା । ଏହା ପୂର୍ବରୁ ପ୍ରାକ ମୌସୁମୀ ବର୍ଷାରେ ଭିଜିବା କଥା ରାଜ୍ୟର ଅଧିକାଂଶ ସ୍ଥାନ । କିନ୍ତୁ ଏଯାଏ ସେଭଳି କିଛି ସଂକେତ ଦେଖାଯାଉ ନାହିଁ । ତେବେ କାହିଁକି ଓଡିଶାକୁ ମୌସୁମୀ ଆସିବାରେ ବିଳମ୍ବ ହେଉଛି ସେନେଇ କିଛି ଗୁରୁତ୍ୱପୂର୍ଣ୍ଣ ଦିଗ ଉପରେ ଆଲୋକପାତ କରିଛନ୍ତି ପାଣିପାଗ ବିଜ୍ଞାନୀ ।
କାହିଁକି ବିଳମ୍ବ ହେଉଛି ମୌସୁମୀ?
- ଉତ୍ତର ଓ ପଶ୍ଚିମରେ ଶୁଷ୍କ ଓ ଉତ୍ତପ୍ତ ବାୟୁ ପ୍ରବାହିତ ହେଉଛି
- ଫଳରେ ଗୁଜରାଟ, ମଧ୍ୟପ୍ରଦେଶ, ରାଜସ୍ଥାନ ଓ ଦିଲ୍ଲୀରେ ପ୍ରବଳ ଗ୍ରୀଷ୍ମପ୍ରବାହ ଅନୁଭୂତ ହେଉଛି
- ଭାରତ ମହାସାଗରରେ ପଶ୍ଚିମରୁ ପୂର୍ବକୁ ପବନର ଗତି ବାଧାପ୍ରାପ୍ତ ହେଉଛି
- ସେହିପରି ମେଘ ଖଣ୍ଡଗୁଡିକର ଉତ୍ତରାୟଣ ଗତିରେ ମଧ୍ୟ ବାଧା ସୃଷ୍ଟି ହେଉଛି
- ତେଣୁ ମୌସୁମୀ ଅଗ୍ରସର ହେବାରେ ବାଧା ଉପୁଜିବା ସହ ଆକାଶରେ ବାଦଲଖଣ୍ଡ ସୃଷ୍ଟି ହୋଇପାରୁନି
ରାଜ୍ୟରେ ପାରମ୍ପରିକ ଭାବେ ଅକ୍ଷୟ ତୃତୀୟାରେ ଚାଷ କାମ ଆରମ୍ଭ ହୋଇଥିବାବେଳେ ବର୍ଷା ଅଭାବରୁ ଧାନ ଗଛସବୁ ନଷ୍ଟ ହେବାକୁ ବସିଲାଣି । କାରଣ ଜୁନ ପ୍ରଥମ ସପ୍ତାହରେ ୭୩ ପ୍ରତିଶତ ନିଅଣ୍ଟିଆ ବର୍ଷା ହୋଇଛି ।
ବର୍ଷା ନାହିଁ, ନଷ୍ଟ ହୋଇଯିବ ଧାନ ଗଛ
- ଚଳିତବର୍ଷ ମାର୍ଚ୍ଚରୁ ମେ‘ ମଧ୍ୟରେ ୨୯% କମ୍ ବର୍ଷା ରେକର୍ଡ କରାଯାଇଥିଲା
- ଜୁନରେ ସ୍ୱାଭାବିକଠାରୁ ଅଧିକ ବର୍ଷା ହେବ ବୋଲି ଆକଳନ ହୋଇଥିଲା
- ହେଲେ ଜୁନ୍ ପ୍ରଥମ ସପ୍ତାହରେ ୭୩% ନିଅଣ୍ଟିଆ ବର୍ଷା ରେକର୍ଡ କରାଯାଇଛି
- ୪ ଜିଲ୍ଲା ବରଗଡ, ସୋନପୁର, ମାଲକାନଗିରି ଓ ନୂଆପଡାରେ ଆଦୌ ବର୍ଷା ହୋଇନାହିଁ
- ଓଡିଶାର ଭାତହାଣ୍ଡି କୁହାଯାଉଥିବା ବରଗଡ ଜିଲ୍ଲାରେ ବର୍ଷାର ୧୦୦% ନିଅଂଟିଆ ସ୍ଥିତି ରହିଛି
- ୧୮ଟି ଜିଲ୍ଲାରେ ନିଅଣ୍ଟିଆ ବର୍ଷାର ପରିମାଣ ଯଥେଷ୍ଟ ଅଧିକ ରହିଛି