ଦେଢ଼ ବର୍ଷରେ ଦୃଢ଼ସ୍ଥିତି, ୩ଥର ଶୁଭିଛି ଶଙ୍ଖ । ପ୍ରତିଥର ଭରସା ଜିତୁଛି, ଭୋଟ୍ ହାର ବଢୁଛି ।
କେବଳ ଏତିକି ନୁହେଁ ଗତ ସାଧାରଣ ନିର୍ବାଚନରେ ନବୀନଙ୍କ ଭୋଟ୍ ହାରକୁ ପଛରେ ପକାଇ ୬୦ ପ୍ରତିଶତରୁ ଅଧିକ ଭୋଟ୍ ବ୍ୟାଙ୍କ୍ ହାସଲ କରିଛି ବିଜେଡି ।
କନକ ବ୍ୟୁରୋ: ବିଜେପୁର: ରାଜ୍ୟ ରାଜନୀତିର ଏକ ଚର୍ଚ୍ଚିତ ଆସନ । ବିଗତ ଦେଢ଼ ବର୍ଷରେ ୩-୩ଟା ନିର୍ବାଚନ ଦେଖିଥିବା ଏହି ଆସନ ବିଜେଡି ପାଇଁ ଆଣିଛି ବଡ଼ ବିଜୟ । ଯେଉଁ ଆସନ ବିଜେଡି ପାଇଁ ଅଭେଦ୍ୟ ଦୁର୍ଗ ହୋଇ ରହିଥିଲା । ସେହି ଆସନ ଏବେ ବିଜେଡିର ଗଡ଼ ପାଲଟିଛି । ଏପରିକି ବିଜେପୁରରେ ବିଜେଡି ହ୍ୟାଟ୍ରିକ୍ ମାରିଛି । ୨୦୧୮ ଉପ-ନିର୍ବାଚନ କଥା ହେଉ କି ୨୦୧୯ରେ ହୋଇଥିବା ଦୁଇଟି ମତଦାନ , ପ୍ରତ୍ୟେକ ନିର୍ବାଚନରେ ଏଠାରେ ବିଜେଡିର ଭୋଟ୍ ହାର ମନ୍ଥର ଗତିରେ ବୃଦ୍ଧି ପାଇଥିବା ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଗତ ୨୦୧୮ରେ ଯେତେବେଳେ କଂଗ୍ରେସ ବିଧାୟକ ସୁବଳ ସାହୁଙ୍କ ବିୟୋଗ ହୋଇଥିଲା ସେତେବେଳେ ବିଜେଡି ତରଫରୁ ସୁବଳଙ୍କ ସ୍ତ୍ରୀ ରୀତା ସାହୁ ପ୍ରାର୍ଥୀ ହୋଇଥିଲେ ଆଉ ସେ ନିର୍ବାଚନରେ ବିଜେଡି ମୋଟ୍ ୧ ଲକ୍ଷ ୨ ହଜାର ୮୭୧ ଖଣ୍ଡ ଭୋଟ୍ ପାଇଥିବାବେଳେ ୪୧ ହଜାର ୯୩୩ ଖଣ୍ଡ ଭୋଟ୍ ବ୍ୟବଧାନରେ ବିଜୟ ହୋଇଥିଲା । ଆଉ ବିରୋଧୀଙ୍କୁ ମାତ୍ ଦେଇ ରୀତା ଦେଇଥିଲେ ବିଜେଡିକୁ ବିଜେପୁର ସ୍ୱାଦ । ଏହି ନିର୍ବାଚନରେ ବିଜେଡିର ଭୋଟ୍ ହାର ୫୬.୭୮ ପ୍ରତିଶତ ରହିଥିଲା ।
ସେହିପରି ଏହାର କିଛି ମାସ ପରେ ବିଜେପୁର ଦେଖିଥିଲା ଆଉ ଏକ ନିର୍ବାଚନ । ବର୍ଷ ଆରମ୍ଭରୁ ଅର୍ଥାତ୍ ୨୦୧୯ରେ ହେଲା ସାଧାରଣ ନିର୍ବାଚନ ପାଇଁ ଜୋରଦାର ଲଢ଼େଇ । ଆଉ ପ୍ରଥମଥର ପାଇଁ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଦୁଇଟି ବିଧାନସଭା ଆସନରୁ ଲଢ଼ିବାକୁ ନିଷ୍ପତି ନେଇଥିଲେ । ସେଥିମଧ୍ୟରେ ଥିଲା ତାଙ୍କ ପାରମ୍ପାରିକ ଆସନ ହିଞ୍ଜିଳି ସହ ବିଜେପୁର ବିଧାନସଭା ସିଟ୍ । ଆଉ ନବୀନଙ୍କୁ ମୋଟ୍ ୧ଲକ୍ଷ ୧୦ ହଜାର ୬୦୬ ଖଣ୍ଡ ଭୋଟ୍ ମିଳିଥିବାବେଳେ, ୫୬ ହଜାର ୧୨୨ ଖଣ୍ଡ ଭୋଟ୍ ବ୍ୟବଧାନରେ ବିଜେପୁରରେ ଲଗାତାର ଦ୍ୱିତୀଥର ପାଇଁ ବିଜୟୀ ହୋଇଥିଲେ । ଆଉ ଏହି ନିର୍ବାଚନରେ ବିଜେଡିର ଭୋଟ୍ ହାର ୩ ପ୍ରତିଶତ ଅଧିକ ଅର୍ଥାତ୍ ୫୯.୭୮ ପ୍ରତିଶତ ବୃଦ୍ଧି ପାଇଥିଲା ।
ହେଲେ ଆଜିର ଫଳାଫଳ ଗତ ଦୁଇଟି ନିର୍ବାଚନର ସମସ୍ତ ରେକର୍ଡ ଭାଙ୍ଗି ଦେଇଛି । ବିରୋଧୀଙ୍କୁ ଚିତ୍ କରି ବିଜେଡି ପ୍ରାର୍ଥୀ ରୀତା ଇତିହାସ ରଚିଛନ୍ତି । ମୋଟ୍ ୧ ଲକ୍ଷ ୩୫ ହଜାର ୯୪୯ ଖଣ୍ଡ ଭୋଟ୍ ପାଇ ସବୁ ରେକର୍ଡ ଭାଙ୍ଗିଛନ୍ତି । କୌଣସି ବିଧାନସଭା ନିର୍ବାଚନରେ ରାଜ୍ୟ ରାଜନୀତିରେ ଏଭଳି ସଂଖ୍ୟକ ଭୋଟ୍ କାହାକୁ ମିଳିନାହିଁ । ଏପରିକି ୯୭ ହଜାର ୯୯୪ ଖଣ୍ଡ ଭୋଟ୍ ବ୍ୟବଧାନରେ ବିରୋଧୀଙ୍କୁ ମାଟି କାମୁଡାଇଛନ୍ତି ରୀତା । କେବଳ ଏତିକି ନୁହେଁ ଗତ ସାଧାରଣ ନିର୍ବାଚନରେ ନବୀନଙ୍କ ଭୋଟ୍ ହାରକୁ ପଛରେ ପକାଇ ୬୦ ପ୍ରତିଶତରୁ ଅଧିକ ଭୋଟ୍ ବ୍ୟାଙ୍କ୍ ହାସଲ କରିଛି ବିଜେଡି । ତେବେ ଏହା ଦର୍ଶାଉଛି ଯେ, ବିଜେଡିର ଲୋକପ୍ରିୟତା ବିଜେପୁରରେ ପ୍ରତି ନିର୍ବାଚନରେ ମନ୍ଥର ଭାବେ ବୃଦ୍ଧି ପାଉଛି ।