ସାମନାକୁ ଆସିଲା ଶରଣାର୍ଥୀ ଶିବିରର ସତ! କର୍ଣ୍ଣାଟକରେ ଶିବିର ନିର୍ମାଣ ଶେଷ, ଆସାମରେ ଆଗେଇ ଚାଲିଛି ନିର୍ମାଣ କାର୍ଯ୍ୟ ।
କନକ ବ୍ୟୁରୋ: ଶରଣାର୍ଥୀ ଶିବିର ନେଇ ଖୋଲିବାରେ ଲାଗିଛି ଗୁମର । ସାରା ଦେଶରେ ଏନଆରସି ଲାଗୁ ହେବା ନେଇ କୌଣସି ନିଷ୍ପତି ନିଆଯାଇନଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିବା ପରେ ସାମନାକୁ ଆସିଛି ସତ । କର୍ଣ୍ଣାଟକରେ ଏକ ଶରଣାର୍ଥୀ ଶିବିରକୁ ଉନ୍ମୋଚନ କରିଛନ୍ତି ସ୍ଥାନୀୟ ପ୍ରଶାସନ । ଆଉ ସେପଟେ ଆସାମରେ ଜୋରସୋରରେ ଆଗେଇ ଚାଲିଛି ଶରଣାର୍ଥୀ ଶିବିରର ନିର୍ମାଣ କାର୍ଯ୍ୟ ।
Kanak News is now on WhatsApp
Join and get latest news updates delivered to you via WhatsApp
ଦେଶରେ ଶରଣାର୍ଥୀ ଶିବିର ନଥିବା ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିବାର ଦିନକ ପରେ ସାମନାକୁ ଆସିଛି ସତ । କର୍ଣ୍ଣାଟକ ବେଙ୍ଗାଲୁର ଠାରୁ ୪୦ କିଲୋମିଟର ଦୂର ଗାଁରେ ଏକ ଶରଣାର୍ଥୀ ଶିବିରର ନିର୍ମାଣ କାର୍ଯ୍ୟ ଶେଷ ହୋଇଥିବା ଦେଖିବାକୁ ମିଳିଛି । ତେବେ ଏହି ଶିବିର ଜାନୁଆରୀ ମାସରେ ଖୋଲାଯିବ ବୋଲି ଜଣାପଡିଛି । ସେହିପରି ଆସାମର ୬ଟି ଜିଲ୍ଲାରେ ବହୁତଳ ପ୍ରାସାଦ ବିଶିଷ୍ଟ ଶରଣାର୍ଥୀ ଶିବିରର ନିର୍ମାଣ କାର୍ଯ୍ୟ ଜୋରସୋରରେ ଆଗେଇ ଚାଲିଥିବା ଖବର ସାମାନକୁ ଆସିଛି । କେନ୍ଦ୍ର ସରକାର ନିର୍ଦ୍ଦେଶ ଦେବା ପରେ ଏହି ସବୁ ଶରଣାର୍ଥୀ ଶିବିର ଖୋଲାଯିବ । ଯେଉଁମାନେ ଜାତୀୟ ପଞ୍ଜିକରଣ ତାଲିକାରୁ ବାଦ ପଡିବେ ସେମାନେ ଏହି ଶରଣାର୍ଥୀ ଶିବିରରେ ରହିବେ ବୋଲି କୁହାଯାଉଛି ।
ରବିବାର ଦିଲ୍ଲୀ ରାମଲୀଳା ମୈଦାନରେ ଆୟୋଜିତ ଧନ୍ୟବାଦ ରାଲିରେ ଯୋଗ ଦେଇ ନାଗରିକତା ସଂଶୋଧନ ଆଇନ ଓ ଏନଆରସି ପ୍ରସଙ୍ଗରେ ବିରୋଧୀ ଲୋକମାନଙ୍କୁ ଭ୍ରମିତ କରୁଛନ୍ତି ବୋଲି କହିଥିଲେ ମୋଦି । ଏହା ସହିତ ଏନଆରସି ଲାଗୁ ହେଲେ ବାଦ ପଡୁଥିବା ଲୋକମାନଙ୍କୁ ଶରଣାର୍ଥୀ ଶିବିରରେ ରହିବାକୁ ପଡିବ ବୋଲି ହେଉଥିବା ଚର୍ଚ୍ଚାକୁ ଖଣ୍ଡନ କରିଥିଲେ । ଏବଂ ଦେଶରେ ଏଭଳି କୌଣସି ଶରଣାର୍ଥୀ ଶିବର ନାହିଁ ବୋଲି କହିଥିଲେ ।
ଗୋଟିଏ ପଟେ ମୋଦିଙ୍କ ବୟାନ ଅନ୍ୟପଟେ ଶରଣାର୍ଥୀ ଶିବିରର ସତ ସାମନାକୁ ଆସିବା ପରେ ଏହା ସାଧାରଣ ଜନତାକୁ ଦ୍ୱନ୍ଦ୍ୱରେ ପକାଇଛି । ତେଣୁ ସହଜରେ ସରକାର ଉପରେ ବିଶ୍ୱାସ କରିପାରୁନାହାଁନ୍ତି ଲୋକେ । ଯେଉଁଥିପାଇଁ ଦୀର୍ଘ ଦିନ ହେବ ଜଳୁଛି ସାରା ଦେଶ ।