କନକ ବ୍ୟୁରୋ : ଋଷ –ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ଥମିବାର ନାଁ ନେଉନି । ଗୋଟିଏ ପଟେ ଋଷ ସେନା ୟୁକ୍ରେନର ଗୋଟିଏ ପରେ ଗୋଟିଏ ସହର ଦଖଲ କରିଚାଲିଥିବା ବେଳେ ଦିନକୁ ଦିନ ୟୁକ୍ରେନ ସେନା ଅସହାୟ ହୋଇପଡୁଥିବା ଦେଖିବାକୁ ମିଳିଛି । ଏହାରି ମଧ୍ୟରେ ନ୍ୟୁଜ ଏଜେନ୍ସି ଏପି ମୁତାବକ ଏବେ ଋଷ ସେନା ୟୁକ୍ରେନର ମାରିୟୋପୋଲରେ ଥିବା ଏକ ବୃହତ ଇସ୍ପାତ କାରଖାନାରେ ପ୍ରବେଶ କରିବାକୁ ଚେଷ୍ଟା କରୁଛନ୍ତି । ଏହି କାରଖାନା ଭିତରେ ୟୁକ୍ରେନର କିଛି ନାଗରିକ ଜୀବନ ବଞ୍ଚାଇବାକୁ ଲୁଚି ରହିଥିବା ସୂଚନା ରହିଛି । ଏସବୁ ଭିତରେ ଆମେରିକାର ଦୁଇଜଣ ବରିଷ୍ଠ ମନ୍ତ୍ରୀ ଖୁବଶୀଘ୍ର ୟୁକ୍ରେନର ରାଷ୍ଟ୍ରପତି ବୋଲଦିମିର ଜେଲେନସ୍କିଙ୍କୁ ଭେଟିବେ ବୋଲି ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଏନେଇ ଜେଲେନସ୍କି କହିଛନ୍ତି କି, ରବିବାର ଦିନ ରାଜଧାନୀ କ୍ୱିବ ଠାରେ ଆମେରିକାର ବିଦେଶ ମନ୍ତ୍ରୀ ଏଣ୍ଟନି ବ୍ଲିଙ୍କନ ଓ ରକ୍ଷାମନ୍ତ୍ରୀ ଲୟଡ ଅଷ୍ଟିନଙ୍କ ସହ ଭେଟ କରିବେ । ଏହି କ୍ରମରେ ଜେଲେନସ୍କି ଆମେରିକା ଠାରୁ କିଛି ଅତ୍ୟାବଶକୀୟ ସାମଗ୍ରୀ ସହ ଯୁଦ୍ଧାସ୍ତ୍ର ଆଶା କରୁଥିବା କହିଛନ୍ତି । ଏହାସହ ଗଣମାଧ୍ୟମ ସହ ଆଲୋଚନା ବେଳେ ଜେଲେନସ୍କି ଦୃଢୋକ୍ତି ପ୍ରକାଶ କରି କହିଛନ୍ତି କି ମୃତ୍ୟୁ ଉପରେ ଜୀବନର ବିଜୟ ହେବ ଓ ମିଛକୁ ହରାଇ ସୈତାନଙ୍କୁ ଦଣ୍ଡିତ କରାଯିବ ।
ସେପଟେ ଯୁଦ୍ଧ ଭିତରେ ଆମେରିକାର ଦୁଇ ବରିଷ୍ଠମନ୍ତ୍ରୀ ୟୁକ୍ରେନ ଯିବାକୁ ନେଇ ରାଜନୈତିକ ମହଲରେ ଚହଳ ପଡିଛି । କୁହାଯାଉଛି କି ଆମେରିକା ୟୁକ୍ରେନ ସମର୍ଥନର ଏକ ନିଦର୍ଶନ ଦେବାକୁ ମନ୍ତ୍ରୀଙ୍କୁ କ୍ୱିବ ପଠାଉଛି ।