ରସଗୋଲା ଲଢେଇ ପାଇଁ ଜାଗିଲେ ସରକାର ! ଜିଆଇ ମାନ୍ୟତା ଲାଗି ୮ଜଣିଆ କମିଟିର ଆଜି ବସିବ ବୈଠକ
କନକ ବ୍ୟୁରୋ: ରସଗୋଲାକୁ ଜିଆଇ ମାନ୍ୟତା ପ୍ରସଙ୍ଗରେ ରାଜ୍ୟ ସରକାର ତତ୍ପର । ଆଜି ବସୁଛି ୮ ଜଣିଆ କମିଟିର ବୈଠକ । ରସଗୋଲାର ଉତ୍ପତିସ୍ଥଳ ହାସଲ ପାଇଁ ତର୍ଜମା କରିବ କମିଟି । ବିଭିନ୍ନ ତଥ୍ୟକୁ ତର୍ଜମା କରି କମିଟି ଜିଆଇ ମାନ୍ୟତା ପାଇଁ ଆବେଦନ କରିବ । ଏଥିସହ ପାହାଳଠାରେ ଏକ ରସଗୋଲା କ୍ଲଷ୍ଟର ପ୍ରତିଷ୍ଠା କରିବାକୁ ନିଷ୍ପତ୍ତି ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଉଲ୍ଲେଖଯୋଗ୍ୟ, ପାହାଳ ରସଗୋଲାକୁ ଜିଆଇର ମାନ୍ୟତା ଦେବା ପାଇଁ ରାଜ୍ୟ ସରକାର ଏବେ ଆବେଦନ କରିବାକୁ ଅଣ୍ଟା ଭିଡ଼ିଛନ୍ତି । ଗତକାଲି ଶିଳ୍ପ ନିର୍ଦେଶକଙ୍କୁ ପକ୍ଷରୁ ଏମଏସଏମଇ ବିଭାଗର ସ୍ୱତନ୍ତ୍ର ସଚିବଙ୍କୁ ଏକ ଚିଠି ଦିଆଯାଇଛି । ତେବେ କେଉଁଭଳି ଭାବେ ଜିଆଇ ପାଇଁ ଆବେଦନ କରାଯିବ ସେଥିପାଇଁ ଏକ ୮ଜଣିଆ କମିଟି ଗଠନ କରାଯାଇଛି । ଏହି କମିଟିରେ ଶିଳ୍ପ ନିର୍ଦେଶକ ଅଧ୍ୟକ୍ଷ ରହିଛନ୍ତି । ଏହାସହ ବିଜ୍ଞାନ ଓ ବୈଷୟିକ ବିଭାଗରୁ ୨ଜଣ, ଶିଳ୍ପ ବିଭାଗ, ସଂସ୍କୃତି ବିଭାଗ, କୃଷି ଓ କୃଷକ ସଶକ୍ତିକରଣ ବିଭାଗ ଓ ଓୟୁଏଟିରୁ ଜଣେ ଏହି କମିଟିରେ ସଦସ୍ୟଭାବେ ରହିଛନ୍ତି । ଶିଳ୍ପ ବିଭାଗର ଅତିରିକ୍ତ ନିର୍ଦେଶକ ଆବାହକ ଭାବେ ଦାୟିତ୍ୱ ତୁଲାଇବେ ।
ରସଗୋଲାକୁ ନେଇ ଓଡ଼ିଶା ଓ ପଶ୍ଚିମବଙ୍ଗ ମଧ୍ୟରେ ଦୁଇବର୍ଷ ତଳେ ଲଢ଼େଇ ଆରମ୍ଭ ହୋଇଥିଲା । ପଶ୍ଚିମବଙ୍ଗ ସରକାର ସ୍ଥାନୀୟ ରସଗୋଲାକୁ ଜିଆଇର ମାନ୍ୟତା ଦେବା ପାଇଁ ଚେନ୍ନାଇସ୍ଥିତ ଭାରତୀୟ ଭୌତ୍ତିକ ସଂପତ୍ତି କାର୍ଯ୍ୟାଳୟରେ ଏଥିପାଇଁ ଆବେଦନ କରିସାରିଛନ୍ତି । ତେବେ ରାଜ୍ୟ ସରକାର ଓଡ଼ିଶାରେ ରସଗୋଲାର ଉତ୍ପତ୍ତିକୁ ନେଇ ବିଜ୍ଞାନ ଓ ବୈଷୟିକ ବିଭାଗକୁ ଦାୟିତ୍ୱ ଦେଇଥିଲେ। ବିଭାଗ ପକ୍ଷରୁ ଏଥିପାଇଁ କମିଟି ଗଠନ କରାଯାଇ ରସଗୋଲାର ଉତ୍ପତ୍ତି ସଂପର୍କରେ ଖୋଳତାଡ଼ ଆରମ୍ଭ ହୋଇଥିଲା । କମିଟି ପକ୍ଷରୁ ବର୍ଷେ ହେବ ରସଗୋଲାର ଉତ୍ପତ୍ତି ସଂପର୍କିତ ଐତିହାସିକ ପ୍ରମାଣ ଦେଇଥିଲେ ହେଁ, ସରକାର ଏହା ଉପରେ ବିଶେଷଭାବେ ଆଗେଇ ନ ଥିଲେ। ବରଂ ବିଜ୍ଞାନ ଓ ବୈଷୟିକ ବିଭାଗ ଏହି ଦାୟିତ୍ୱ ପୁଣିଥରେ ଶିଳ୍ପ ବିଭାଗକୁ ହସ୍ତାନ୍ତର କରିଥିବା ଜଣାପଡ଼ିଛି ।
ଅପରପକ୍ଷରେ ପାହାଳଠାରେ ଏକ ରସଗୋଲା କ୍ଲଷ୍ଟର ଗଠନ ପାଇଁ ନିଷ୍ପତ୍ତି ହୋଇଛି । ଏଥିପାଇଁ ୭କୋଟି ୭୦ଲକ୍ଷ ଟଙ୍କାର ବ୍ୟୟ ଅଟକଳ କରାଯାଇଛି । ଜିଆଇ ମାନ୍ୟତା ଦେବା ପୂର୍ବରୁ ଏହି କ୍ଲଷ୍ଟର ଗଠନ କରାଯିବ । ଏହି ଦୃଷ୍ଟିରୁ ପ୍ରତିଷ୍ଠା ହେବାକୁ ଥିବା ସିୟୁସିରେ କଞ୍ଚାମାଲ ସଂଗ୍ରହ, ସଂରକ୍ଷଣ ଓ ଯୋଗାଣ ପାଇଁ ବ୍ୟବସ୍ଥା ରହିବା ସହିତ ଗୁଣାତ୍ମକ ପାଣି ଓ ପ୍ରଯୋଗଶାଳାର ବ୍ୟବସ୍ଥା ହେବ । ପାହାଳ ରସଗୋଲାକୁ ବିଶ୍ୱସ୍ତରରେ ପହଞ୍ଚାଇବାକୁ ହେଲେ ଗୁଣାତ୍ମକ ପାଣି ଓ ଉଚ୍ଚମାନର ସମାଗ୍ରୀ ବ୍ୟବହୃତ ହେବା ଆବଶ୍ୟକ ।
ଏହାସହ ଏହି କେନ୍ଦ୍ରରେ ଶୀତଳୀକରଣ ମୋଟରଯାନ, ଛେନା ରଖିବା ପାଇଁ ଶୀତଳଭଣ୍ଡାର, କଞ୍ଚାମାଲ ବ୍ୟାଙ୍କ, ଛେନା ପରୀକ୍ଷଣ କେନ୍ଦ୍ର, ଦୁଗ୍ଧ ପରୀକ୍ଷା ବ୍ୟବସ୍ଥା, ଦୁଗ୍ଧରୁ ଛେନା ପ୍ରସ୍ତୁତ କରିବା ପାଇଁ ଅତ୍ୟାଧୁନିକ ଯନ୍ତ୍ର ଆଦି ରହିବ। ବ୍ୟବସାୟିକ ଆଲୋଚନା ପାଇଁ ସୂଚନାକେନ୍ଦ୍ର ଓ ଆନୁଷାଙ୍ଗିକ ସମ୍ମିଳନୀ କକ୍ଷର ବ୍ୟବସ୍ଥା ମଧ୍ୟ କରାଯିବ। ବୃହତକାୟ ପାଣି ଟାଙ୍କି ଓ ଏହାକୁ ଚଳାଇବା ପାଇଁ ସୌରଚାଳିକ ପମ୍ପସେଟ ରହିବ । ଏଥିପାଇଁ ଖର୍ଚ୍ଚ ହେବାକୁ ଥିବା ଅର୍ଥର ସିଂହ ଭାଗ କେନ୍ଦ୍ର ସରକାରଙ୍କଠାର ଆଣିବା ପାଇଁ ଯୋଜନା ରହିଛି । କେନ୍ଦ୍ର ସରକାର ଏହି ଧରଣର କ୍ଲଷ୍ଟରକୁ ପ୍ରୋତ୍ସାହିତ କରୁଛନ୍ତି ।
ତେବେ ଏଥିପାଇଁ ଆରମ୍ଭରୁ ଜମି ସମସ୍ୟା ଦେଖାଦେଇଛି । ପ୍ରଥମରେ ରସଗୋଲା ବ୍ୟବସାୟୀଙ୍କୁ ଏହି ଜାଗା ଠିକ୍ କରିବା ପାଇଁ କୁହାଯାଇଥିଲେ ହେଁ ତାହା ହୋଇପାରି ନ ଥିଲା । ପାହାଳର ଆଖାପଖର ୪/୫ କି.ମି ବ୍ୟବଧାନରେ ଏଥିପାଇଁ ଏକ ଜାଗା ଠିକ୍ କରିବା ପାଇଁ ଶିଳ୍ପ ବିଭାଗ ପକ୍ଷରୁ ନିଷ୍ପତ୍ତି ହୋଇଛନ୍ତି। ଉପଯୁକ୍ତ ଜାଗା ଚିହ୍ନଟ ହେବା ପରେ ଇଡକୋ ସହିତ ଜାଗା ପାଇଁ ଆଲୋଚନା କରାଯିବ ବୋଲି ବିଭାଗର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।