କନକ ବ୍ୟୁରୋ : ରାଜସ୍ଥାନ ବାରୋଁ ବିଧାନସଭାର କଂଗ୍ରେସ ବିଧାୟକ ପାନାଚନ୍ଦ ମେଘୱାଲ ଆଜି ବିଧାୟକ ପଦରୁ ଇସ୍ତଫା ଦେଇଛନ୍ତି । ସେ କହିଛନ୍ତି କି ସ୍ୱାଧୀନତାର ୭୫ ବର୍ଷ ପରେ ରାଜ୍ୟରେ ଦଳିତମାନଙ୍କ ଉପରେ ହେଉଥିବା ଅତ୍ୟାଚାରରେ ବ୍ୟଥିତ ହୋଇ ସେ ଇସ୍ତଫା ଦେଇଛନ୍ତି । ଏନେଇ ସେ ତାଙ୍କର ଇସ୍ତଫା ପତ୍ର ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ନିକଟକୁ ପଠାଇ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଧାୟକ ମୁଖ୍ୟମନ୍ତ୍ରୀଙ୍କ ନିକଟକୁ ପଠାଇଥିବା ଇସ୍ତଫା ପତ୍ରରେ ଲେଖିଛନ୍ତି କି, ଏବେ ଦେଶ ସ୍ୱାଧୀନତାର ୭୫ ବର୍ଷ ପୂର୍ତ୍ତି ପାଳନ କରୁଛି । ଏହି କ୍ରମରେ ମୁଁ ଦେଶବାସୀଙ୍କୁ ଶୁଭେଚ୍ଛା ଜଣାଉଛି । ହେଲେ ସ୍ୱାଧୀନତାର ୭୫ ବର୍ଷ ପରେ ରାଜ୍ୟରେ ଦଳିତ ଓ ପଛୁଆ ବର୍ଗଙ୍କ ଉପରେ ଲଗାତର ଭାବେ ହେଉଥିବା ଅତ୍ୟାଚାରରେ ବ୍ୟଥିତ ହୋଇଛି । ମୋ ସମାଜ ଆଜି ବି ଯେଉଁ ପ୍ରକାର ନିର୍ଯ୍ୟାତନାରେ ଶିକାର ହେଉଛି ତାହାକୁ ମୁଁ ଶବ୍ଦରେ କହିପାରିବ ନାହିଁ ।
କେବଳ ସେତିକି ନୁହେଁ ପାନାଚନ୍ଦ ମେଘୱାଲ କହିଛନ୍ତି କି, ରାଜ୍ୟରେ ଦଳିତ ଓ ପଛୁଆ ବର୍ଗମାନେ ମାଠିଆରୁ ପାଣି ପିଇଲେ ଦଣ୍ଡ ମିଳୁଛି । ସେମାନେ ଘୋଡାରେ ଚଢିଲେ ଆକ୍ରମଣ କରାଯାଉଛି । ଦଳିତ ପୁରୁଷ ନିଶ ରଖିଲେ ସେମାନଙ୍କୁ ଉପହାସ କରାଯାଉଛି । ଏନେଇ ଅଭିଯୋଗ କଲେ ଯାଂଚ କରିବା ଆଳରେ ଫାଇଲକୁ ଏପଟ ସେପଟ କରାଯାଉଛି । ଏସବୁ ଦେଖିବା ପରେ ପ୍ରତୀତ ହେଉଛି କି ବାବା ସାହେବଙ୍କ ସମ୍ବିଧାନରେ ଦଳିତ ଓ ପଛୁଆବର୍ଗଙ୍କୁ ଯେଉଁ ସମାନତାର ଅଧିକାର ଦିଆଯାଇଥିଲା ତାହାକୁ ରକ୍ଷା କରିବାକୁ କେହି ନାହିଁ ।
କହିରଖୁ କି ରାଜସ୍ଥାନର ବାରୋଁ ବିଧାନସଭାରେ ଏକ ବିଦ୍ୟାଳୟରେ ଜଣେ ଦଳିତ ଛାତ୍ର ସ୍କୁଲ ମାଠିଆରୁ ପାଣି ପିଇବାରୁ ସ୍କୁଲର ପ୍ରଧାନ ଶିକ୍ଷକ ତାଙ୍କୁ ଅମାନବୀୟ ଭାବେ ପିଟିଥିଲେ । ଏଥିରେ ଛାତ୍ର ଜଣଙ୍କ ଗୁରୁତର ଭାବେ ମେଡିକାଲରେ ଚିକିତ୍ସିତ ହେଉଥିବା େବେଳ ତାଙ୍କର ମୃତ୍ୟୁ ହୋଇଛି । ଏହାକୁ ନେଇ ରାଜସ୍ଥାନ ରାଜନୀତି ଏବେ ଜୋର ଧରିଛି ।