ରୁଷିଆ କବଜାରେ ‘ମାରିୟୁପୋଲ’: ୟୁକ୍ରେନର ବନ୍ଦର ସହରକୁ ଦଖଲ କରିବା ନେଇ ପୁଟିନ ଦାବି
କନକ ବ୍ୟୁରୋ: ୫୬ ଦିନର ଯୁଦ୍ଧ ପରେ ୟୁକ୍ରେନର ବନ୍ଦର ସହର ମାରିୟୁପୋଲକୁ ଦଖଲ କରିଛି ରୁଷିଆ ସେନା । ଅନ୍ତର୍ଜାତୀୟ ଖବର ସରବାରହ ସଂସ୍ଥା ଏଏଫପିର ରିପୋର୍ଟ ଅନୁସାରେ, ମାରୁୟୁପୋଲ ଦଖଲ ନେଇ ଘୋଷଣା କରିଛନ୍ତି ଆକ୍ରମଣକାରୀ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ । ରୁଷିଆ ରକ୍ଷା ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ, କେବଳ ଅଜୋଭସ୍ତଲ ପ୍ଲାଂଟ୍କୁ ଛାଡିଦେଲେ ବାକି ସମଗ୍ର ସହରକୁ ରୁଷିଆ ସେନା କବ୍ଜା କରି ନେଇଛି । କେବଳେ ସେତିକି ନୁହେଁ ସହରର ୯୦ ପ୍ରତିଶତ ଭାଗକୁ ଧ୍ୱଂସ କରିଦେଇଛି ପୁଟିନ୍ ବାହିନୀ । ଆଉ ଅଜୋଭସ୍ତଲ ଶିଳ୍ପାଂଚଳକୁ ଚାରିପଟୁ ଘେରାବନ୍ଦୀ କରିବାକୁ ରୁଷ ସେନାଙ୍କୁ ନିର୍ଦ୍ଦେଶ ଦେଇଛନ୍ତି ଆକ୍ରମଣକାରୀ ପୁଟିନ୍ । ଦୀର୍ଘଦିନ ଧରି ଯୁଦ୍ଧ ପରେ ମାରିୟୁପୋଲ ସହରକୁ ସ୍ୱାଧିନ କରାଯାଇଥିବା ପୁଟିନ୍ କହିଛନ୍ତି । ମାରିୟୁପୋଲକୁ ଦଖଲ କରିବା ପାଇଁ ଲଗାତର ବୋମାବର୍ଷା ଓ ନୃଶଂସ ଆକ୍ରମଣ କରିବାକୁ ନିର୍ଦ୍ଦେଶ ଦେଇଥିଲେ ପୁଟିନ୍ ।
Kanak News is now on WhatsApp
Join and get latest news updates delivered to you via WhatsApp
ମାରିୟୁପୋଲକୁ ରୁଷିଆ ସେନା ଦଖଲ କରିନେଇଥିବା ଖବର ରାଷ୍ଟ୍ରପତି ପୁଟିନ୍ଙ୍କୁ ଜଣାଇଥିଲେ ରୁଷ ପ୍ରତିରକ୍ଷା ମନ୍ତ୍ରୀ ସରଗଇ ସୋହିଗୁ । ଜବାବରେ ପୁଟିନ୍ କହିଥିଲେ ଯେପରି ଗୋଟିଏ ମାଛି ବି ସେଠାରୁ ବର୍ତି ନପାରେ ।
ମୋର ପ୍ରସ୍ତାବ ରହିବ ଏବେ ଶିଳ୍ପାଂଚଳ ଆଡକୁ କେନ୍ଦ୍ର କର..ପରିସ୍ଥିତି ଏବେ ଯେପରି ରହିଛି ଆମକୁ ଭଲାଭାବେ ଚିନ୍ତା କରି କୌଣସି ନିଷ୍ପତି ନେବାକୁ ହେବ । ଯେଉଁଠି ଆମେ ସେନାଙ୍କ ସ୍ୱାସ୍ଥ୍ୟ ଓ ଜୀବନ ପ୍ରତି ବିପଦ ଅଛି ସେଠାରେ ଅଜଥାରେ ମାଡି ହୋଇ ରହିବାର ଆବଶ୍ୟକତା ନାହିଁ । ହେଲେ ଶିଳ୍ପାଂଚଳକୁ ଚାରିପଟୁ ଘେରାବନ୍ଦୀ କର ଯେପରି ଗୋଟିଏ ମାଛି ବି ଖସି କି ନ ପଳାଏ ।
ମାରିୟୁପୋଲ ଦଖଲ ପାଇଁ ଗତ କିଛିଦିନ ହେବ ଜୋରଦାର ଆକ୍ରମଣ କରୁଥିଲା ରୁଷିଆ ସେନା । ଲଗାତର ବୋମାବର୍ଷା ଓ ନୃଶଂସ ଆକ୍ରମଣ ସତ୍ୱେ ମାରିୟୁପୋଲରେ ଆତ୍ମସମର୍ପଣ କରିବାକୁ ପ୍ରସ୍ତୁତ ନଥିଲେ ଜେଲେନସ୍କିଙ୍କ ସେନା । ମଙ୍ଗଳବାର ଅପରାହ୍ନ ସୁଦ୍ଧା ପ୍ରଥମେ ମାରିୟୁପୋଲ ସେନାକୁ ଆତ୍ମସମର୍ପଣ କରିବା ପାଇଁ ସମୟ ଦେଇଥିଲା ରୁଷିଆ । ଏହା ପରେ ଆକ୍ରମଣକୁ ଜୋରଦାର କରି ପୁଣି ବୁଧବାର ଅପରାହ୍ନ ସୁଦ୍ଧା ଆତ୍ମସମର୍ପଣ କରିବା ପାଇଁ ଚେତାବନୀ ଦେଇଥିଲା କ୍ରେମଲିନ । କିନ୍ତୁ ଜଣେ ହେଲେ ସୈନିକ ଅସ୍ତ୍ର ତ୍ୟାଗ କରିନଥିଲେ । ୟୁକ୍ରେନ ମାରିୟୁପୋଲରେ ଆତ୍ମସମର୍ପଣ କରିବ ନାହିଁ ବୋଲି ବାରମ୍ବାର ଦୋହରାଇ ଆସୁଥିଲେ ରାଷ୍ଟ୍ରପତି ଜେଲେନସ୍କି । ଫଳରେ ଏହି ବନ୍ଦର ସହରରେ ଅତି ସାଂଘାତିକ ମାନବୀୟ ବିପର୍ଯ୍ୟୟ ସୃଷ୍ଟି ହୋଇଛି । ମାରିୟୁପୋଲ ଦଖଲ ପାଇଁ ଯୁଦ୍ଧର ଭୟଙ୍କର ସ୍ଥିତି ଦେଖିବାକୁ ମିଳିଛି ।
ମାରିୟୁପୋଲ ଉପରେ ଜୋରଦାର ଆକ୍ରମଣ
– ବୁଧବାର ମାରିୟୁପୋଲରେ ୧୧୦୦ଥର ଆକ୍ରମଣ କରିଛି ରୁଷିଆ ସେନା
– ୟୁକ୍ରେନ ସେନା ଓ ସାଧାରଣ ନାଗରିକଙ୍କ ଉପରେ ଆଖିବୁଜା ଗୁଳିବର୍ଷା କରିଛି ରୁଷ
– ମିଜାଇଲ ଆକ୍ରମଣରେ ସହରର ୯୦%ଅଂଚଳକୁ ଧ୍ୱଂସ କରିଦେଇଛି ରୁଷୀୟ ସେନା
ଦିନକୁ ଦିନ ନୃଶଂସ ହେବାରେ ଲାଗିଛନ୍ତି ପୁଟିନ । ମାରିୟୁପୋଲ ଦଖଲ କରିବା ରାଷ୍ଟ୍ରପତି ପୁଟିନ୍ ନିଜର ଏକ ବଡ ସଫଳତା ବୋଲି ମନେ କରୁଛନ୍ତି । ଦୀର୍ଘ ଦିନ ଧରି ଏଠାରେ ଦୁଇ ଦେଶର ସେନାଙ୍କ ମଧ୍ୟରେ ସଂଘର୍ଷ ଲାଗି ରହିଥିଲା । ଆଉ ଏହାକୁ ଦଖଲକୁ ନେବାକୁ ନିଜ ସେନା ସମେତ ଅନ୍ୟଦେଶର ସୈନିକଙ୍କୁ ବି ନିୟୋଜିତ କରିଥିଲେ ପୁଟିନ୍ ।
ସେପଟେ ଯୁଦ୍ଧ ପରିସ୍ଥିତି ଅତ୍ୟନ୍ତ ଜଟିଳ ଓ ଅପରିବର୍ତିତ ରହିଛି ବୋଲି ୟୁକ୍ରେନ ରାଷ୍ଟ୍ରପତି ଭୋଲଦେମିର ଜେଲେନସ୍କି କହିଛନ୍ତି । ଆଗକୁ ପରିସ୍ଥିତି ଆହୁରି ଖରାପ ହେବ ବୋଲି ସେ ଆଶଂକା ପ୍ରକାଶ କରିିଛନ୍ତି । ମାରିୟୁପୋଲ ଷ୍ଟିଲ ପ୍ଲାଂଟରେ ବଙ୍କର ବିଧ୍ୱଂସି ବୋମା ବ୍ୟବହାର କରି ଆକ୍ରମଣ କରୁଛି ରୁଷିଆ । ସେପଟେ ଆନ୍ତର୍ଜାତୀୟ ସହାୟତା ପାଇଁ ମାରିୟୁପୋଲର ମେରାଇନ କମାଣ୍ଡର ଅପିଲ କରିଛନ୍ତି । ଏକ ଭିଡିଓ ବାର୍ତା ଜାରି କରି ମେଜର ସେରହି ଭୋଲିନା କହିଛନ୍ତି ତାଙ୍କ ସୈନ୍ୟ ଦଳ ଆତ୍ମସମର୍ପଣ କରିବ ନାହିଁ । କିନ୍ତୁ ଷ୍ଟିଲ ପ୍ଲାଂଟରେ ଲୁଚି ରହିଥିବା ୫ଶହ ଆହତ ସୈନିକ ଏବଂ ଶତାଧିକ ମହିଳା ଓ ଶିଶୁଙ୍କ ପାଇଁ ସେ ଆନ୍ତର୍ଜାତୀୟ ସହାୟତା ଚାହୁଁଛନ୍ତି । ଜେଲେନସ୍କି ମସ୍କୋକୁ ଅନୁରୋଧ କରିଛି, ରୁଷୀୟ ସେନାଙ୍କ ମୃତଦେହ ବଦଳରେ ଷ୍ଟିଲପାଂଟରେ ଆଶ୍ରୟ ନେଇଥିବା ନାଗରିକ, ଶିଶୁ ଓ ସୈନିକଙ୍କୁ ସୁରକ୍ଷିତ ଭାବେ ଛାଡିଦିଆଯାଉ ।
ୟୁକ୍ରେନର ନାଗରିକଙ୍କୁ ଉଦ୍ଧାର କରିବା ପାଇଁ ଏବଂ ମାନବୀୟ ସହଯୋଗ ପଠାଇବା ପାଇଁ ଜାତିସଂଘ ମୁଖ୍ୟ ଆଂଟୋନିଓ ଗୁଟେରସ ୪ଦିନ ଯୁଦ୍ଧବିରତି ପାଇଁ କହିଥିଲେ । ମାତ୍ର ଯୁଦ୍ଧ ବିରତି ପାଇଁ ଜାତିସଂଘର ଅପିଲକୁ ରୁଷ ପ୍ରତ୍ୟାକ୍ଷାନ କରିଦେଇଛି । ଆଉ ଷ୍ଟିଲପାଂଟରୁ ଯେପରି ଏକ ମାଛି ବି ବର୍ତି ନପାରେ ନିଜ ରକ୍ଷା ମନ୍ତ୍ରୀଙ୍କୁ ପୁଟିନ୍ ନିର୍ଦ୍ଦେଶ ଦେଇଛନ୍ତି ।
ଦିନକୁ ଦିନ ଅମାନବିୟ ହେବାରେ ଲାଗିଛନ୍ତି ପୁଟିନ । ୟୁକ୍ରେନ ଉପରେ ବିଜୟ ଘୋଷଣା ପାଇଁ ଏତେ ବ୍ୟାକୁଳ ହୋଇଯାଇଛନ୍ତି ଯେ, ପୋକ ମାଛି ପରି ଲୋକଙ୍କୁ ମାରିବାକୁ ବି ପଛାଉ ନାହାଁନ୍ତି । ଅନ୍ତର୍ଜାତୀୟ କଟକଣା, ପାଶ୍ଚାତ୍ୟ ଦେଶର ଆର୍ଥିକ ପ୍ରତିବନ୍ଧକ ତାଙ୍କୁ କିଛି ଫରକ ପକାଉନାହିଁ । ଆଉ ସେ କୌଣସି ବି ହାଲତରେ ଯୁଦ୍ଧକୁ ଜିତିବା ପାଇଁ ଲାଗି ପଡିଛନ୍ତି ।