ବିଜୟ ପାଇଁ ବିଜେପିର ହୋମଯଜ୍ଞ । ସୂର୍ଯ୍ୟବଂଶୀ ସୁରଜଙ୍କ ବିଜୟ ପାଇଁ ଭଦ୍ରକାଳୀଙ୍କ ପୀଠରେ ପୂଜାର୍ଚ୍ଚନା । ସେପଟେ ସୁଦଶା ବ୍ରତ କରି ଭୋଟ୍ ଦେଲେ ଅବନ୍ତୀ ଦାସ ।
କନକ ବ୍ୟୁରୋ: ଆଜି ଧାମନଗରରେ ଭୋଟ୍ ପଡିବାବେଳେ କିଛି ରୋଚକ ଦୃଶ୍ୟ ସାମ୍ନାକୁ ଆସିଥିଲା । ଗୋଟିଏ ପଟେ ବିଜେଡି ପ୍ରାର୍ଥୀଙ୍କ ସୁଦଶା ବ୍ରତ ପାଇଁ ପୂଜା, ଆଉ ଗୋଟିଏ ପଟେ ବିଜେପି ପ୍ରାର୍ଥୀଙ୍କ ବିଜୟ ପାଇଁ ହୋମ ଯଜ୍ଞ ଚର୍ଚ୍ଚାର ବିଷୟ ହୋଇଛି । ଭୋଟ୍ ଦେବା ପାଇଁ ଯିବା ପୂର୍ବରୁ ବିଜେଡି ପ୍ରାର୍ଥୀ, ବଡ଼ି ଭୋର ଉଠି ମା’ ଲକ୍ଷ୍ମୀଙ୍କ ସୁଦଶା ବ୍ରତ କରିଥିଲେ । ଆଉ ସ୍ୱାମୀଙ୍କ ଆର୍ଶୀବାଦ ନେଇ ଭୋଟ ଦେବାକୁ ଯାଇଥଲେ । ସେପଟେ ଉପ-ନିର୍ବାଚନରେ ଦଳୀୟ ପ୍ରାର୍ଥୀଙ୍କ ବିଜୟ କାମନା କରି ଯଜ୍ଞ କରିଛନ୍ତି ବିଜେପି ନେତୃବୃନ୍ଦ । ଧାମନଗରରେ ସୂର୍ଯ୍ୟବଂଶୀ ସୁରଜଙ୍କ ବିଜୟ ପାଇଁ ମା’ ଭଦ୍ରକାଳୀ ପୀଠରେ ଆଳତୀ ଓ ଯଜ୍ଞ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଭୋଟ୍ ରାଜନୀତିର କୋଳାହଳ ଭିତରେ ବେଳେବେଳେ ଏମିତି ରୋଚକ ଦୃଶ୍ୟ ସାମ୍ନାକୁ ଆସେ, ଯାହା ଭାବପ୍ରବଣତାକୁ ଛୁଇଁବା ପାଇଁ ବେଶ ଖୋରାକ୍୍ ଯୋଗାଏ । ଗୋଟିଏ ପଟେ ବିଜେଡି ପ୍ରାର୍ଥୀଙ୍କ ସୁଦଶା ବ୍ରତ ପାଇଁ ପୂଜା, ଆଉ ଗୋଟିଏ ପଟେ ବିଜେପି ପ୍ରାର୍ଥୀଙ୍କ ବିଜୟ ପାଇଁ ହୋମ ଯଜ୍ଞ । ଭୋଟ୍ ଦେବା ପାଇଁ ଯିବା ପୂର୍ବରୁ ବିଜେଡି ପ୍ରାର୍ଥୀ, ବଡ଼ି ଭୋର ଉଠି ମା’ ଲକ୍ଷ୍ମୀଙ୍କ ସୁଦଶା ବ୍ରତ କରିଥିଲେ । ଏହା ପରେ ସ୍ୱାମୀଙ୍କ ଆର୍ଶୀବାଦ ନେଇ, ନିଜର ମତଦାନ ସାବ୍ୟସ୍ତ କରିବା ପାଇଁ ବାହାରିଥିଲେ । ଶ୍ୱେତବସ୍ତ୍ର ପରିଧାନ କରି ଯିବା ସମୟରେ କାହାକୁ ବାଟରେ ମୁଣ୍ଡିଆ ମାରୁଥିଲେ ତ’ କାହାକୁ ନମସ୍କାର ପକାଉଥିଲେ । ଏହାରି ଭିତରେ ମତଦାନ କରିଥିଲେ । ତେବେ ବିଜେଡି ପ୍ରାର୍ଥୀ ଅବନ୍ତୀ ଦାସ କହିଛନ୍ତି, ତାଙ୍କ ଉପରେ ମା’ ଲକ୍ଷ୍ମୀଙ୍କ ଆର୍ଶୀବାଦ ରହିଛି ।
ଏପଟେ ଉପ-ନିର୍ବାଚନରେ ଦଳୀୟ ପ୍ରାର୍ଥୀଙ୍କ ବିଜୟ କାମନା କରି ଯଜ୍ଞ କରିଛନ୍ତି ବିଜେପି ନେତୃବୃନ୍ଦ । ଧାମନଗରରେ ସୂର୍ଯ୍ୟବଂଶୀ ସୁରଜଙ୍କ ବିଜୟ ପାଇଁ ମା’ ଭଦ୍ରକାଳୀ ପୀଠରେ ଆଳତୀ ଓ ଯଜ୍ଞ କରାଯାଇଛି । ଯଜ୍ଞ ସମୟରେ ରାଜ୍ୟ ବିଜେପି ସଭାପତି ସମୀର ମହାନ୍ତି , ବରିଷ୍ଠ ନେତା ମନମୋହନ ସାମଲ, ସାଂସଦ ପ୍ରତାପ ଷଡଙ୍ଗୀ, ରାଜ୍ୟ ସାଧାରଣ ସମ୍ପାଦକ ଗୋଲକ ମହାପାତ୍ର, ବିଧାୟକ ଲାଲିତେନ୍ଦୁ ବିଦ୍ୟାଧର ମହାପାତ୍ର, ରାଜ୍ୟ ସମ୍ପାଦକ ତଥା ଜିଲ୍ଲା ପ୍ରଭାରୀ କାଳନ୍ଦି ସାମଲ, ଠାକୁର ରଣଜୀତ ଦାସ ପ୍ରମୁଖ ଉପସ୍ଥିତ ଥିଲେ ।
ଭୋଟ ରାଜନୀତିରେ ଭାବପ୍ରବଣତାର ଏହି ସ୍ରୋତ କେଉଁ ରୂପରେ ସାମ୍ନାକୁ ଆସିବ, ତାହା ଆସନ୍ତା ୬ ତାରିଖରେ ସ୍ପଷ୍ଟ ହୋଇଯିବ, ଯେତେବେଳେ ଉପ-ନିର୍ବାଚନର ଫଳାଫଳ ଆସିବ । ତେବେ ଦେଖିବାର କଥା, ବିଜେଡି ପ୍ରାର୍ଥୀ ଅବନ୍ତୀ ଦାସଙ୍କ ସୁଦଶା ବ୍ରତ ଶୁଭ ଖବର ଆଣୁଛି ନା’ ବିଜେପିର ଯଜ୍ଞ ପାଠ ଭଲ ଖବର ଆଣୁଛି ।