ତେଜୁଛି ନାଗରିକତା ନିଆଁ, ବଢ଼ୁଛି ହିଂସା । ସଂଶୋଧିତ ଆଇନ୍ ଓ ଏନଆରସିକୁ ବିରୋଧ କରି ବିହାର ବନ୍ଦ, ମୋଦି ସରକାରଙ୍କୁ ଘେରିଲା ଆରଜେଡି । ସେପଟେ ଉତ୍ତରପ୍ରଦେଶ ପ୍ରତିବାଦରେ ଲାଗିଲା ରକ୍ତର ଛିଟା, ଗଲାଣି ୧୪ଜଣଙ୍କ ଜୀବନ ।
କନକ ବ୍ୟୁରୋ : ନାଗରିକତା ସଂଶୋଧନ ଆଇନକୁ ନେଇ ତୀବ୍ର ହେବାରେ ଲାଗିଛି ପ୍ରତିବାଦ । ସାରା ଦେଶରେ ଅସ୍ଥିରତା । ଦିଲ୍ଲୀ, ଉତ୍ତର ପ୍ରଦେଶ, ପଶ୍ଚିମବଙ୍ଗ, ଆସାମ ପରେ ବିହାରରେ ଠପ୍ ହୋଇଯାଇଛି ଜୀବନ ଯାତ୍ରା । ଆନ୍ଦୋଳନକାରୀ ରେଳ ରୋକ କରିବା ସହ ରାସ୍ତା ଉପରେ ଟାୟାର ଜାଳି ଅବରୋଧ କରିଛନ୍ତି । ଏପଟେ କଟକ ଓ ଭୁବନେଶ୍ୱର ପରେ ଓଡ଼ିଶାର ଜିଲ୍ଲା ଓ ବ୍ଲକ୍ ସ୍ତରରେ ପହଂଚିଛି ପ୍ରତିବାଦ ।
Kanak News is now on WhatsApp
Join and get latest news updates delivered to you via WhatsApp
ନାଗରିକତା ଆଇନକୁ ବିରୋଧ କରି ଚାଲିଥିବା ପ୍ରତିବାଦ ଏବେ ସାରା ଦେଶରେ ଏକ ପ୍ରକାରର ଅସ୍ଥିରତା ସୃଷ୍ଟି କରିଦେଇଛି । ଉତ୍ତରପ୍ରଦେଶ, ଦିଲ୍ଲୀ, ଗୁଜୁରାଟ, କର୍ଣ୍ଣାଟକ, ପଶ୍ଚିମବଙ୍ଗ, ଆସାମ ଓ କେରଳ ଭଳି ରାଜ୍ୟରେ ଆଜି ପ୍ରତିବାଦ ଆହୁରି ତୀବ୍ର ହୋଇଛି । ଆଉ ଏହି ସବୁ ରାଜ୍ୟଗୁଡ଼ିକ ଠାରୁ ବଳି ଯାଇଛି ବିହାରରେ ଆରଜେଡିର ପ୍ରତିବାଦ ।
ଆରଜେଡିର ପ୍ରତିବାଦ, ବିହାର ବନ୍ଦ । ରାସ୍ତା ଉପରେ ପ୍ରତିବାଦ, ଅଟକିଲା ଟ୍ରେନ୍ । ଆରଜେଡି ନେତା ତେଜସ୍ୱୀ ଯାଦବଙ୍କ ନେତୃତ୍ୱରେ ଦିଆଯାଇଥିବା ବିହାର ବନ୍ଦ ଡାକରା ଯୋଗୁଁ ରାଜ୍ୟର ବିଭିନ୍ନ ସ୍ଥାନରେ ଜୀବନଯାତ୍ରା ସଂପୂର୍ଣ୍ଣ ଠପ୍ ହୋଇଯାଇଛି । ରାସ୍ତା ଉପରେ ଟାୟର ଜାଳି ଆରଜେଡି କର୍ମୀମାନେ ନାଗରିକତା ଆଇନ୍ ଓ ପ୍ରସ୍ତାବିତ ଏନଆରସିକୁ ବିରୋଧ କରିବା ସହ ବିଭିନ୍ନ ସ୍ଥାନରେ ଟ୍ରେନ୍ ରୋକ୍ କରି ପ୍ରତିବାଦ କରିଛନ୍ତି । ଦରଭଙ୍ଗାରେ ଆରଜେଡି କର୍ମୀ ସାର୍ଟ ଖୋଲି ଖୋଲାଦେହରେ ପ୍ରତିବାଦ କରିଥିବା ବେଳେ ବୈଶାଳୀରେ ରାସ୍ତାରେ ମଇଁଷି ରଖି ରାସ୍ତା ରୋକ୍ କରିଛନ୍ତି ।
ଏପଟେ ଉତ୍ତରପ୍ରଦେଶ ନାଗରିକତା ଆଇନର ପ୍ରତିବାଦରେ ଲାଗିଛି ରକ୍ତର ଛିଟା । ପ୍ରତିବାଦ ଯୋଗୁଁ ହେଉଥିବା ହିଂସା, ପୁଲିସ୍ କାର୍ଯ୍ୟାନୁଷ୍ଠାନ ଏବଂ ଦଳାଚକଟା କାରଣରୁ ଯାଉଛି ଗୋଟିଏ ପରେ ଗୋଟିଏ ଜୀବନ । ପୁଲିସ୍ ଦେଇଥିବା ସୂଚନା ଅନୁସାରେ,
– ଉତ୍ତରପ୍ରଦେଶରେ ମୃତ୍ୟୁ ସଂଖ୍ୟା ୧୪ରେ ପହଂଚିଛି
– ମିରଟରେ ୫ଜଣ, କାନପୁର, ବିଜନୌର ଓ ଫିରୋଜବାସରେ ୨ଜଣ ଲେଖାଏଁ ବ୍ୟକ୍ତିଙ୍କ ମୃତ୍ୟୁ ହୋଇଛି
-ସେହିପରି ମୁଜାଫର ନଗର, ସଂଭଲ ଏବଂ ବାରଣାସୀରେ ଜଣେ ଲେଖାଏଁ ବ୍ୟକ୍ତିଙ୍କ ମୃତ୍ୟୁ ହୋଇଛି
-ମୃତକଙ୍କ ମଧ୍ୟରେ ଜଣେ ୮ବର୍ଷର ନାବାଳକ ମଧ୍ୟ ଅଛନ୍ତି
ସାରାଦେଶରେ ନାଗରିକତା ଆଇନ୍ ଓ ଏନଆରସିକୁ ନେଇ ପ୍ରତିବାଦ ଚାଲିଥିବା ବେଳେ ଏହାର ପ୍ରଭାବ ଓଡ଼ିଶାରେ ବି ଦେଖିବାକୁ ମିଳିଛି । କଟକ ଓ ଭୁବନେଶ୍ୱର ପରେ ଓଡ଼ିଶାର ଜିଲ୍ଲା ଓ ବ୍ଲକ୍ ସ୍ତରକୁ ପହଂଚିଛି ଏହି ପ୍ରତିବାଦ । ଆଜି ଅସ୍ତରଙ୍ଗ ଓ ବସ୍ତାରେ ସଂଶୋଧିତ ଆଇନକୁ ବିରୋଧ କରି ରାସ୍ତାକୁ ଓହ୍ଲାଇଛନ୍ତି ଲୋକ । ଆଉ ଏହାରି ଭିତରେ ବାଲେଶ୍ୱରରେ ଏନଆରସିକୁ ସମର୍ଥନ କରୁଥିବା ମଧ୍ୟ ଦେଖିବାକୁ ମିଳିଛି ।