ନବରଙ୍ଗପୁର ଉମରକୋଟରେ ଡାକ୍ତର ବଦଳିକୁ ନେଇ ରାଜନୀତି: ଡାକ୍ତର ବଦଳି ଦାବି କରି ଧାରଣା ଦେଇଛି କଂଗ୍ରେସ
କନକ ବ୍ୟୁରୋ: ଡାକ୍ତର ବଦଳିକୁ ନେଇ ରାଜନୀତି, କଂଗ୍ରେସ ବଦଳି ଦାବି କରୁଥିବା ବେଳେ ବଦଳିକୁ ବିରୋଧ କରୁଛି ନାଗରିକ ମଂଚ । ଡାକ୍ତରଙ୍କ ବଦଳି ଦାବି କରି ଉମରକୋଟ ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ର ସମ୍ମୁଖରେ କଂଗ୍ରେସ ଧାରଣା ଦେଇଥିବା ବେଳେ ଅପରପକ୍ଷେ ଆଶା କର୍ମୀ ସଂଘ ଓ ଉମରକୋଟ ନାଗରିକ ମଂଚ ତରଫରୁ ସମ୍ପୃକ୍ତ ଡାକ୍ତରଙ୍କ ସପକ୍ଷରେ ଧାରଣା ଦେଇଛନ୍ତି । ଉମରକୋଟ ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ର ସମ୍ମୁଖରେ ଏକ ରୋଚକ ପରିସ୍ଥିତି ସୃଷ୍ଟି ହେଇଛି । ସୂଚନ । ଅନୁସାରେ, ଗତ ୧୫ ତାରିଖରେ ଜଣେ ଗର୍ଭବତୀ ଉମରକୋଟ ଗୋଷ୍ଟି ସ୍ୱାସ୍ଥ୍ୟ କେନ୍ଦ୍ରରେ ଭର୍ତି ହୋଇଥିଲେ, ତାଙ୍କ ସ୍ୱାସ୍ଥ୍ୟବସ୍ଥା ଗୁରୁତର ଥିଲା । ମହିଳାଙ୍କ ପାଇଁ ରକ୍ତ ସହ ଅପରେସନ୍ର ଆବଶ୍ୟକ ହେଉଥିଲା । ତେବେ ଉମରକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ରକ୍ତ ଭଣ୍ଡାରରେ ରକ୍ତ ନଥିବାରୁ ମହିଳାଙ୍କୁ ନବରଙ୍ଗପୁର ଜିଲ୍ଲା ସ୍ୱାସ୍ଥ୍ୟ କେନ୍ଦ୍ରକୁ ସ୍ଥାନାନ୍ତର କରିଥିଲେ ଡାକ୍ତର ସୁମନ୍ତ ରାହୁଳ । ଗର୍ଭବତୀଙ୍କୁ ନବରଙ୍ଗପୁରକୁ ନେବା ବାଟରେ ରାସ୍ତାରେ ତାଙ୍କର ମୃତ୍ୟୁ ହୋଇଥିଲା । ଏହାକୁ ନେଇ ଚିକିତ୍ସକଙ୍କ ଅବହେଳା ଯୋଗୁଁ ଗର୍ଭବତୀଙ୍କ ମୃତ୍ୟୁ ହୋଇଥିବା ପରିବାର ଲୋକ ଅଭିଯୋଗ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସ ଏହାକୁ ସମର୍ଥନ କରିବା ସହ ଚିକିତ୍ସକଙ୍କ ବଦଳି ଦାବିରେ ଆଜି ଉମରକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ସମ୍ମୁଖରେ ଧାରଣାରେ ବସିଛନ୍ତି । ଅନ୍ୟପକ୍ଷରେ ଆଶା କର୍ମୀ ସଙ୍ଘ ଓ ଓ ଉମରକୋଟ ନାଗରିକ ମଂଚ ଡାକ୍ତର ସୁମନ୍ତ ରାହୁଳଙ୍କୁ ବଦଳି ନକରିବା ଦାବୀରେ ଧାରଣା ଦେଇଛନ୍ତି । ଶତାଧିକ ମହିଳା ଓ ପୁରୁଷ ମଧ୍ୟ ସୁମନ୍ତ ରାହୁଳଙ୍କୁ ବଦଳି ନକରିବା ଦାବୀରେ ଧାରଣାରେ ବସିଛନ୍ତି । ତେବେ କଂଗ୍ରେସ ଆକ୍ରୋଶ ମୂଳକ ଭାବେ ଡାକ୍ତରଙ୍କ ବଦଳି ଦାବି କରୁଥିବା ଉମରକୋଟ ନାଗରିକ ମଂଚ ପକ୍ଷରୁ କୁହାଯାଇଛି । କଂଗ୍ରେସ ପକ୍ଷରୁ ଗତ ୧୦ ତାରିଖରେ ଡାକ୍ତରଙ୍କୁ ଟଙ୍କା ମଗାଯାଇଥିଲା । ଡାକ୍ତର ଟଙ୍କା ନଦେବାରୁ ତାଙ୍କ ବିରୋଧରେ ବାହାରିଛି କଂଗ୍ରେସ । ସେପଟେ କଂଗ୍ରେସ କର୍ମୀ ଏହାକୁ ଖଣ୍ଡନ କରିଛନ୍ତି । ଉମରକୋଟ ପରି ଉପାନ୍ତ ଅଂଚଳରେ ଜଣେ ମାତ୍ର ସ୍ତ୍ରୀ ଓ ପ୍ରସୁତୀ ବିଶେସଜ୍ଞ ଡାକ୍ତର ଅଛନ୍ତି । ଜଣେ ଡାକ୍ତର ୪ଟି ବ୍ଲକକୁ ସମ୍ଭାଳୁଥିବା ବେଳେ ଯଦି ଡାକ୍ତରକୁ ବଦଳି କରାଯାଏ ତାହେଲେ ଲୋକ ବିଭିନ୍ନ ଅସୁବିଧାରେ ସମୁଖୀନ ହେବେ । ଏହି ଘଟଣାକୁ ରାଜନୀତି ନକରି ଡାକ୍ତରଙ୍କୁ ରହିବାକୁ ଦିଆଯାଉ ବୋଲି ଉମରକୋଟ ବିଧାୟକ ନିତ୍ୟାନନ୍ଦ ଗଣ୍ଡ କହିଛନ୍ତି ।