ସ୍ନାନପୂର୍ଣ୍ଣିମା ନେଇ ପୋଲିସର ପ୍ରସ୍ତୁତି : ଶ୍ରୀମନ୍ଦିରରେ ଲାଗିଛି ଚାରିପାଖେ ସିସିଟିଭି, ୧୨୪ ସେକ୍ସନ ଫୋର୍ସ ମୁତୟନ
କନକ ବ୍ୟୁରୋ : ଆଜି ପବିତ୍ର ଦେବସ୍ନାନ ପୂର୍ଣ୍ଣିମା । ସ୍ନାନ ବେଦୀରେ ବସିଛନ୍ତି ତିନି ଠାକୁର । ମହାପ୍ରଭୁଙ୍କୁ ସ୍ନାନବେଦୀରେ ଦର୍ଶନ କରିବା ପାଇଁ ଶ୍ରୀକ୍ଷେତ୍ରରେ ଶ୍ରଦ୍ଧାଳୁଙ୍କ ସମାଗମ ହୋଇଛି । ଟ୍ରାଫିକ୍ ବ୍ୟବସ୍ଥାକୁ ମଧ୍ୟ କଡ଼ାକଡ଼ି କରାଯାଇଛି । ଶୃଙ୍ଖଳିତ ଦର୍ଶନ ପାଇଁ ପ୍ରଶାସନ ପକ୍ଷରୁ କଡ଼ା ବ୍ୟବସ୍ଥା କରାଯାଇଛି । ସ୍ନାନ ପୂର୍ଣ୍ଣିମାରେ ଭିଡ଼କୁ ଦୃଷ୍ଟିରେ ରଖି ପୋଲିସ ପକ୍ଷରୁ କଡ଼ାକଡ଼ି ପ୍ରସ୍ତୁତି କରାଯାଇଛି । ଦେବସ୍ନାନ ପୂର୍ଣ୍ଣିମାର ଦିନକ ପୂର୍ବରୁ ଆଇନଶୃଙ୍ଖଳା ଉପରେ ପୁଲିସ ଆଇଜିଙ୍କ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା । ବୈଠକରେ ଉପସ୍ଥିତ ପୁଲିସ ଅଫିସରଙ୍କୁ ଦାୟିତ୍ୱ ବଣ୍ଟନ କରାଯାଇଛି।
Kanak News is now on WhatsApp
Join and get latest news updates delivered to you via WhatsApp
ଦେବସ୍ନାନ ପୂର୍ଣ୍ଣିମାକୁ ଶାନ୍ତିଶୃଙ୍ଖଳାର ସହ ଶେଷ ପାଇଁ ପୁରୀ ସହରରେ ୧୨୪ ସେକ୍ସନ୍ ଫୋର୍ସ ମୁତୟନ କରାଯାଇଛି । କେବଳ ଶ୍ରୀମନ୍ଦିର ଭିତରେ ୨୦ ସେକ୍ସନ୍ ଫୋର୍ସ ମୁତୟନ କରାଯାଇଥିବା ବେଳେ ଶ୍ରୀମନ୍ଦିର ବାହାରେ ୯୨ ସେକ୍ସନ୍ ଫୋର୍ସ ମୁତୟନ କରାଯାଇଛି । ଶ୍ରୀମନ୍ଦିର ଭିତରେ ଆଇନଶୃଙ୍ଖଳା ଓ ଟ୍ରାଫିକ୍ ପାଇଁ ୨ ଜଣ କମାଣ୍ଡାଣ୍ଟ, ୮ ଜଣ ଏଏସପି, ୧୧ ଜଣ ଡିଏସପି, ୧୨୨ ଜଣ ଏସ୍ଆଇ ଓ ଏଏସଆଇ, ୧୨ ଜଣ ହାବିଲଦାର, ୧୩୩ ଜଣ କନଷ୍ଟେବଳ ଓ ୧୦୮ଜଣ ହୋମଗାର୍ଡ଼ ନିୟୋଜିତ କରାଯାଇଛି ।
ଶ୍ରୀମନ୍ଦିର ବାହାରେ ଜଣେ କମାଣ୍ଡାଣ୍ଡ, ଜଣେ ଏଏସ୍ପି, ୪ ଜଣ ଡିଏସ୍ପି, ୫ ଜଣ ଏସ୍ଆଇ ଓ ଏଏସ୍ଆଇ, ୨୪ ଜଣ ହାବିଲଦାର, ୧୦ ଜଣ ଟ୍ରେନି ହାବିଲଦାର, ୧୧୯ ଜଣ କନଷ୍ଟେବଳ, ୪୪ ଜଣ ଟ୍ରେନି କନଷ୍ଟେବଳ, ୩୮୦ ଜଣ ହୋମଗାର୍ଡ଼ ନିୟୋଜିତ ହୋଇଛନ୍ତି । ଆତଙ୍କବାଦୀ ଆକ୍ରମଣ ଅବା ଅନ୍ୟ ଅଘଟଣକୁ ଏଡ଼ାଇବା ପାଇଁ ଶ୍ରୀମନ୍ଦିର ଚାରିପାଖରେ ସିସିଟିଭି ଲଗାଯାଇଛି । ୪ ଜଣ ସାଧା ପୋଷାକଧାରୀ ଦଳଙ୍କୁ ଶ୍ରୀମନ୍ଦିର ଭିତରେ ନିୟୋଜିତ କରାଯାଇଛି । ୬ଟି ଆଣ୍ଟି ସାବୋଟେଜ୍ ଟିମ୍, ଗୋଟିଏ ଏସଟିୟୁ ୟୁନିଟକୁ ବି ସୁରକ୍ଷା ଦାୟିତ୍ବରେ ନିୟୋଜିତ କରାଯାଇଛି । ଜରୁରୀକାଳୀନ ପରିସ୍ଥିତି ଏଡ଼ାଇବା ପାଇଁ ଷ୍ଟ୍ରାଇକିଂ ଫୋର୍ସ ମୁତୟନ କରାଯାଇଛି । ବେଳାଭୂମିରେ ଭକ୍ତଙ୍କ ସୁରକ୍ଷା ପାଇଁ ସମୁଦ୍ରକୂଳ ଥାନା ଅଧିକାରୀଙ୍କ ତତ୍ତ୍ବାବଧାନରେ ଲାଇଫ ଗାର୍ଡ଼ଙ୍କୁ ମୁତୟନ କରାଯାଇଛି ।