ଅନାଥ ଭାଇ-ଭଉଣୀଙ୍କୁ ସାହା ହୁଅନ୍ତୁ ସରକାର । ବାପା-ମାଆଙ୍କ ମୃତ୍ୟୁ ପରେ ପର ଘରେ କାମ କରି ପେଟ ପୋଷୁଛନ୍ତି ରୁବି ଓ ରାକେଶ । ଅଧାରେ ଅଟକିଛି ପାଠପଢା ।
କନକ ବ୍ୟୁରୋ: ଯେତେବେଳେ ପିଲାଙ୍କ ମୁଣ୍ଡ ଉପରୁ ବାପା-ମାଆଙ୍କ ହାତ ହଟିଯାଏ, ସେମାନେ ହତବାକ୍ ହୋଇଯାଆନ୍ତି । ସେମାନଙ୍କ ଦୁନିଆରେ ଘନ ଅନ୍ଧାର ଘୋଟିଯାଏ, ଆଗକୁ କେମିତି ବଢିବେ, କଣ କରିବେ କିଛି ବାଟଘାଟ ପାଆନ୍ତି ନାହିଁ । ଠିକ୍ ସେମିତି ଏବେ ବାଟବଣା ହୋଇ ଯାଇଛନ୍ତି ଢେଙ୍କାନାଳ ଜିଲ୍ଲା ମୁଣ୍ଡିଆପଶି ଗାଁର ଦୁଇ ଅନାଥ ଭାଇ ଭଉଣୀ ରୁବି ଓ ରାକେଶ ।
Kanak News is now on WhatsApp
Join and get latest news updates delivered to you via WhatsApp
ବାପା ମା’ ଦୁଇ ଜଣ ପରପାରିକୁ ଚାଲିଯିବା ପରେ ପର ଘରେ ପାଇଟି କରି, ଗାଈ ଚରାଇ ଜୀବନ ଜିଉଁଛନ୍ତି ଦୁଇ ଭାଇ ଭଉଣୀ । ଏତିକିରେ ଦୁଃଖ ସରି ଯାଇନି, ମୁଣ୍ଡ ଗୁଞ୍ଜିବାକୁ ଥିବା ବାସ ବି ବାତ୍ୟାରେ ଭାଙ୍ଗି ଯାଇଛି । ଯାହାକୁ ନେଇ ଦୁଇ ଭାଇ ଭଉଣୀ ଏବେ ଦୁଃଖ ଭିତରେ ସମୟ କାଟୁଛନ୍ତି ।
ଦାରିଦ୍ୟର ଯନ୍ତ୍ରଣା ଭିତରେ ଅଟକି ଯାଇଛି ରୁବି ଓ ରାକେଶଙ୍କ ପାଠପଢା । ଅଷ୍ଟମରୁ ରୁବିଙ୍କ ଶିକ୍ଷାଗତ ଜୀବନରେ ପୂର୍ଣ୍ଣଛେଦ ପଡିଥିବା ବେଳେ ଚତୁର୍ଥ ଶ୍ରେଣୀରେ ଅଟକି ଯାଇଛି ସାନ ଭାଇର ପାଠ । ବାପା-ମାଆଙ୍କୁ ହରାଇ ସଂପୂର୍ଣ୍ଣ ଅସହାୟ ପାଲଟି ଯାଇଥିବା ଭାଇ-ଭଉଣୀଭଙ୍କ ପାଖରେ ପହଞ୍ଚି ପାରିନାହିଁ ସରକାରୀ ଯୋଜନା । ଏମାନଙ୍କୁ ନାଁ ମିଳିଛି ପକ୍କା ଘର, ନା ମିଳୁଛି ପିଡିଏସ ସାମଗ୍ରୀ । ସବୁଠାରୁ ବଡ କଥା ହେଉଛି ୨ ଭାଇ ଭଉଣୀଙ୍କ ଆଧାର କାର୍ଡ କି ପରିଚୟ ପତ୍ରଟିଏ ବି ନାହିଁ । ତେଣୁ ରୁବି ଓ ରାକେଶର ଥଇଥାନ ଲାଗି ପ୍ରଶାସନକୁ ନିବେଦନ କରିଛନ୍ତି ଗ୍ରାମବାସୀ ।