ବିଦେଶୀଙ୍କୁ ଚକାନୟନ ସହ ଆଖି ମଳାଇବାକୁ ମିଳୁ ଅନୁମତି । ପ୍ରସ୍ତାବ ଦେଲେ ରାଜ୍ୟପାଳ ପ୍ରଫେସର ଗଣେଶୀ ଲାଲ
ସେବାୟତ, ଜଗତଗୁରୁ ଶଙ୍କରାଚାର୍ଯ୍ୟ ଓ ଗଜପତି ମହାରାଜଙ୍କୁ ନିବେଦନ କଲେ ରାଜ୍ୟପାଳ
କନକ ବ୍ୟୁରୋ: ଜଗତର ନାଥ ଜଗନ୍ନାଥ । ଯାହାଙ୍କୁ ସାରା ବିଶ୍ୱର ଦେବତା ବୋଲି କୁହାଯାଏ । କିନ୍ତୁ ଶ୍ରୀମନ୍ଦିରର ନୀତି ଓ ପରମ୍ପରା ଅନୁସାରେ, ମନ୍ଦିର ଭିତରକୁ ବିଦେଶୀ ନାଗରିକଙ୍କ ଯିବା ଉପରେ କଟକଣା ରହିଛି । ସେହିପରି ଇସଲାମ, ଖ୍ରୀଷ୍ଟିୟାନ, ପାର୍ସି ଧର୍ମାବଲମ୍ବୀମାନଙ୍କ ମନ୍ଦିର ପ୍ରବେଶକୁ ବାରଣ କରାଯାଇଛି । ରଥଯାତ୍ରା ସମୟରେ ସେମାନେ ବଡଦାଣ୍ଡରେ ମହାପ୍ରଭୁଙ୍କ ଦର୍ଶନ କରିଥାନ୍ତି । ହେଲେ ସମୟ ବଦଳୁଥିବାରୁ ବିଦେଶରୁ ଆସୁଥିବା ଲୋକଙ୍କୁ ଚକାନୟନ ସହ ଆଖି ମିଳାଇବାକୁ ଅନୁମତି ଦେବାକୁ ପ୍ରସ୍ତାବ ଦେଇଛନ୍ତି ରାଜ୍ୟପାଳ ପ୍ରଫେସର ଗଣେଶୀ ଲାଲ ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀମନ୍ଦିରକୁ ବିଦେଶୀ ନାଗରିକଙ୍କୁ ପ୍ରବେଶ ପାଇଁ ଅନୁମତି ଦେବାକୁ ରାଜ୍ୟପାଳଙ୍କ ପ୍ରସ୍ତାବ ଏବେ ସାରା ରାଜ୍ୟରେ ଚର୍ଚ୍ଚାର ପ୍ରସଙ୍ଗ ପାଲଟିଛି । ଅବସର ଥିଲା ଓଡିଶା ଅର୍ଥନୈତିକ ସଂଘ, ନାଇଜର ଓ ଉକ୍ରଳ ବିଶ୍ୱବିଦ୍ୟାଳର ଅର୍ଥନୀତି ବିଭାଗର ମିଳିତ ସହଯୋଗରେ ଆୟୋଜିତ ଓଡିଶା ଭିଜନ-୨୦୩୬ ସମ୍ମିଳନୀର ଉଦଘାଟନୀ ଉତ୍ସବ । ଏହି କାର୍ଯ୍ୟକ୍ରମରେ ଯୋଗ ଦେଇ ରାଜ୍ୟପାଳ ଓଡିଶାର ମହାନ ସଂସ୍କୃତି ଓ ଉଜ୍ୱଳ ଭବିଷ୍ୟତକୁ ନେଇ ନିଜର ମତ ରଖିଥିଲେ । ଆଉ ଏହି ଅବସରରେ ରାଜ୍ୟପାଳ କହିଥିଲେ, ଏଠାକାର ସଂସ୍କୃତି ମହାନ । ଜଗନ୍ନାଥଙ୍କ ନାଁ ଯେତେବେଳେ ନିଆଯାଏ, ସେତେବେଳେ ସାରା ବିଶ୍ୱର ସଂସ୍କୃତି ଆଖି ଆଗରେ ଝଲସି ଉଠେ । ଏଥିସହ କୌଣସି ବିଦେଶୀ ନାଗରିକ ଯଦି ଓଡି଼ଶା ଆସି ଶଙ୍କରାଚାର୍ଯ୍ୟ, ସେବାୟତ ଓ ଗଜପତିଙ୍କୁ ଭେଟି ପାରୁଛନ୍ତି , ତେବେ ସେମାନଙ୍କୁ ଚକାନୟନ ସହ ଆଖି ମିଳାଇବା ଲାଗି ଅନୁମତି ଦିଆଯାଉ ।
ରାଜ୍ୟପାଳଙ୍କ ନିବେଦନ ପରେ ପ୍ରତିକ୍ରିୟା ରଖିଛନ୍ତି ବରିଷ୍ଠ ସେବାୟତ । କହିଛନ୍ତି, ଏହା ରାଜ୍ୟପାଳଙ୍କ ବ୍ୟକ୍ତିଗତ ମତ । ଶ୍ରୀମନ୍ଦିର ପରମ୍ପରା ଅନୁସାରେ ଏଗୁଡିକ ଗ୍ରହଣୀୟ ନୁହେଁ । ଶଙ୍କରାଚାର୍ଯ୍ୟ, ଗଜପତି ଓ ସେବାୟତ ହେଲେ ବ୍ୟକ୍ତିବିଶେଷ, କିନ୍ତୁ ମହାପ୍ରଭୁ ହେଉଛନ୍ତି ଠାକୁର । ତେବେ ରାଜ୍ୟପାଳ ଲିଖିତ ଭାବେ ଅନୁରୋଧ କଲେ ପରମ୍ପରା ଅନୁସାରେ ପରିଚାଳନା କମିଟିରେ ଆଲୋଚନା ହେବ ବୋଲି ଗଜପତିଙ୍କ ପକ୍ଷରୁ ସୂଚନା ମିଳିଛି ।
ରାଜ୍ୟପାଳଙ୍କ ପ୍ରସ୍ତାବକୁ ନେଇ ରାଜନୈତିକ ପ୍ରତିକ୍ରିୟା ମଧ୍ୟ ପ୍ରକାଶ ପାଇଛି । ବିରୋଧୀ ଦଳ ନେତା ଜୟନାରାୟଣ ମିଶ୍ର କହିଛନ୍ତି, ମୁକ୍ତିମଣ୍ଡପ ନିଷ୍ପତି ଉପରେ ଏହା ନିର୍ଭର କରେ । ମୁକ୍ତିିମଣ୍ଡପ ଯାହା ନିଷ୍ପତି ନେବ ଆମେ ତାକୁ ଗ୍ରହଣ କରୁଛୁ । କିନ୍ତୁ ସନାତନ ଧର୍ମ ଆଉ ଡିଫେନସିଭ୍ ହେବାର ନାହିଁ । କଂଗ୍ରେସ ବିଧାୟକ ସୁର ରାଉତରାୟ କହିଛନ୍ତି, ଜଗନ୍ନାଥଙ୍କର ଯେଉଁ ପରମ୍ପରା ରହିଛି, ସେ ପରମ୍ପରାକୁ ଭାଙ୍ଗିବାକୁ ସୁଯୋଗ ଦିଆଯିବନି ।
ଶ୍ରୀମନ୍ଦିରକୁ ବିଦେଶୀ ନାଗରିକଙ୍କ ପ୍ରବେଶ ଉପରେ କଟକଣା ରହିଛି । ସେହିପରି ଇସଲାମ, ଖ୍ରୀଷ୍ଟିୟାନ, ପାର୍ସି ଧର୍ମାବଲମ୍ବୀମାନଙ୍କ ପାଇଁ ମନ୍ଦିର ପ୍ରବେଶ ଉପରେ ବାରଣ ରହିଛି । କେବଳ ହିନ୍ଦୁ ମାନଙ୍କୁ ମନ୍ଦିର ପ୍ରବେଶ ଅଧିକାର ରହିଥିବା ପ୍ରଶାସନ ପକ୍ଷରୁ ସ୍ପଷ୍ଟ ଭାବେ ସୂଚନା ଦିଆଯାଇଛି । ତେବେ ମହାପ୍ରଭୁଙ୍କ ଦର୍ଶନ କରିବାକୁ ଆସୁଥିବା ବିଦେଶୀ ଓ ଅନ୍ୟ ଧର୍ମାବଲମ୍ବୀମାନେ ବାହାରୁ ରହି ପତିତପାବନ କରିଥାନ୍ତି । ଏବଂ ଶ୍ରୀଗୁଣ୍ଡିଚାରେ ନିଜେ ମହାପ୍ରଭୁ ରତ୍ନ ସିଂହାସନରୁ ଓହ୍ଲାଇ ଆସି ରଥ ଉପରେ ପତିତଜନଙ୍କୁ ଦର୍ଶନ ଦେଇଥାନ୍ତି । ତେବେ ରାଜ୍ୟପାଳ ଏଭଳି ପ୍ରସ୍ତାବ କାହିଁକି ଦେଲେ ତାକୁ ନେଇ ଆରମ୍ଭ ହୋଇଛି ଚର୍ଚ୍ଚା ।