ବିଜେଡିର ବିଧାୟକ ପ୍ରାର୍ଥୀ ଘୋଷଣା: ୨ ଆସନରେ ପ୍ରାର୍ଥୀ ଅଦଳବଦଳ କଲେ ନବୀନ ।
କନକ ବ୍ୟୁରୋ: ପ୍ରକାଶ ପାଇଛି ବିଜେଡିର ବିଧାନସଭା ପ୍ରାର୍ଥୀ ତାଲିକା । ଏଥିରେ ଖୋଦ ମୁଖ୍ୟମନ୍ତ୍ରୀଙ୍କ ପ୍ରାର୍ଥୀତ୍ୱ ସହ ଅନ୍ୟ ଗୁରୁତ୍ୱପୂର୍ଣ୍ଣ ଆସନ ପାଇଁ ପ୍ରାର୍ଥୀ ଘୋଷଣା ହୋଇଛି । ବିଶେଷ କରି ସମ୍ବଲପୁର ଆସନରେ ପ୍ରସନ୍ନ ଆଚାର୍ଯ୍ୟଙ୍କୁ ଦଳ ପୂର୍ବରୁ ପ୍ରାର୍ଥୀ କରିଥିବାବେଳେ ଏନେଇ ବିରୋଧର ସ୍ୱର ଉଠିଥିଲା । ସେଠିକାର ଅଞ୍ଚଳ ସହ ତାଙ୍କର ବିଶେଷ ସମ୍ପର୍କ ନଥାଇ ବି ତାଙ୍କୁ ସେଠାରୁ କିପରି ପ୍ରାର୍ଥୀ କରାଯାଇଛି ବୋଲି ଦଳ ପ୍ରତି ପ୍ରଶ୍ନ ଉଠିଥିଲା । ଏହାପରେ ବିଚାର ବିମର୍ଷ ପରେ ଏହି ଦଳ ପାଇଁ ପ୍ରାର୍ଥୀ ପରିବର୍ତ୍ତନ କରିଛନ୍ତି ବିଜେଡି ସୁପ୍ରିମୋ ।
Kanak News is now on WhatsApp
Join and get latest news updates delivered to you via WhatsApp
ସମ୍ବଲପୁରରେ ଦଳ ପ୍ରସନ୍ନ ଆଚାର୍ଯ୍ୟଙ୍କ ବଦଳରେ ରୋହିତ ପୂଜାରୀଙ୍କୁ ପ୍ରାର୍ଥୀ କରିଥିବାବେଳେ ପ୍ରସନ୍ନ ଆଚାର୍ଯ୍ୟଙ୍କୁ ମିଳିଛି ରେଢାଖୋଲ ଆସନ । ତେବେ ଦଳର ସୁପ୍ରିମୋ ହିସାବରେ ମୁଖ୍ୟମନ୍ତ୍ରୀ ଯାହା ନିଷ୍ପତ୍ତି ନେଇଛନ୍ତି ତାହାକୁ ଗ୍ରହଣ କରିବେ ବୋଲି କହିଛନ୍ତି ଉଭୟ ନେତା ପ୍ରସନ୍ନ ଆଚାର୍ଯ୍ୟ ଓ ରୋହିତ ପୂଜାରୀ । ରୋହିତ କହିଛନ୍ତି, ବିଧାନସଭା ନିର୍ବାଚନ କ୍ଷେତ୍ରର ଲୋକଙ୍କ ସହ ସବୁବେଳେ ସେ ରହିଆସିଛନ୍ତି । ତେଣୁ ଆଗାମୀ ନିର୍ବାଚନରେ ଭୋଟର ତାଙ୍କୁ ନିଶ୍ଚୟ ସହଯୋଗ କରିବେ ବୋଲି ଦୃଢ ବିଶ୍ୱାସ ରହିଛି ।
ତେବେ ୨୦୧୯ରେ ବିଜେପିର ଜୟ ନାରାୟଣ ମିଶ୍ର ଏହି ଆସନରୁ ବିଜେଡିର ରାଶେଶ୍ୱରୀ ଦେବୀଙ୍କୁ ୫୭ହଜାର ୩୪୯ ଭୋଟରେ ହରାଇ ବିଜୟୀ ହୋଇଥିଲେ । କିନ୍ତୁ ୫ ବର୍ଷ ଭିତରେ ବିଧାୟକ ନିଜ ଅଞ୍ଚଳ ପାଇଁ କୌଣସି ଆଖିଦୃଶିଆ କାର୍ଯ୍ୟ କରିନଥିବାବେଳେ ଲୋକେ ପରିବର୍ତ୍ତନ ଚାହୁଁଛନ୍ତି । ତେଣୁ ଏଥର ତାଙ୍କ ଉପରେ ଭୋଟରଙ୍କ ବିଶ୍ୱାସ ରହିଛି ବୋଲି କହିଛନ୍ତି ରୋହିତ ପୂଜାରୀ ।