ପ୍ରୟାଗରାଜରେ ନବଙ୍କ ଅସ୍ଥି ବିସର୍ଜନ କଲେ ପୁଅ ବିଶାଳ ଦାସ । ଏଯାଏଁ ହତ୍ୟାକାଣ୍ଡର କାରଣ ଖୋଜି ପାଉନି କ୍ରାଇମବ୍ରାଞ୍ଚ ।
କନକ ବ୍ୟୁରୋ :ସ୍ୱାସ୍ଥ୍ୟମନ୍ତ୍ରୀ ନବ ଦାସଙ୍କ ମୃତ୍ୟୁକୁ ଆଜି ଦଶ ଦିନ ପୁରିଛି । ଆଉ ଦଶାହ କ୍ରିୟାକର୍ମ ପାଇଁ ପ୍ରୟାଗରାଜରେ ଅଛନ୍ତି ପୁଅ ବିଶାଳ ଦାସ । ଦଶାହ କ୍ର୍ରିୟାକର୍ମ ପୂର୍ବରୁ ପ୍ରୟାଗରାଜର ତ୍ରିବେଣୀ ସଙ୍ଗମରେ ନବ ଦାସଙ୍କ ଅସ୍ଥି ବିସର୍ଜନ କରିଛନ୍ତି ପୁଅ । ତ୍ରିବେଣୀ ସଙ୍ଗମରେ ବୁଡ ପକାଇବା ନବଙ୍କ ଅସ୍ଥି ବିସର୍ଜନ କରିଛନ୍ତି ପୁଅ । ବିଶ୍ୱାସ ରହିଛି ତ୍ରିବେଣୀ ସଙ୍ଗମରେ ଅସ୍ଥି ବିସର୍ଜନ କଲେ ଆତ୍ମାକୁ ମୋକ୍ଷ ମିଳିଥାଏ । ଯେଉଁଥିପାଇଁ ୨ ଦିନ ପୂର୍ବେ ପ୍ରୟାଗରାଜରେ ପହଞ୍ଚିଥିଲେ ପୁଅ ବିଶାଳ । ପଣ୍ଡିତଙ୍କ ସହ ଆଲୋଚନା ପରେ ଅସ୍ଥି ବିସର୍ଜନ ସହ ଦଶାହ କ୍ରିୟାକର୍ମ କରିଛନ୍ତି ପୁଅ ବିଶାଳ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ନବ ଦାସଙ୍କ ହତ୍ୟାକୁ ୧୦ ଦିନ ବିତି ଯାଇଥିଲେ ମଧ୍ୟ କ୍ରାଇମବ୍ରାଞ୍ଚ ଏହି ହତ୍ୟା ପଛର ପ୍ରକୃତ କାରଣ ଏଯାଏଁ ଖୋଜି ପାରିନାହିଁ । ଅଭିଯୁକ୍ତ ଗୋପାଳ ଏଯାଏଁ ମୁହଁ ଖୋଲୁନଥିବା ବେଳେ ନବଙ୍କ ମୃତ୍ୟୁକୁ ନେଇ ଅନେକ ପ୍ରଶ୍ନବାଚୀ ଛିଡା ହେଲାଣି । ବିଭିନ୍ନ ଦିଗରୁ କ୍ରାଇମବ୍ରାଞ୍ଚ ତଦନ୍ତ ଜାରି ରଖିଥିବା ବେଳେ ବିରୋଧୀ ଏବେ ଶାସକ ବିଜେଡି ଆଡକୁ ଆଙ୍ଗୁଳି ଉଠାଇବା ଆରମ୍ଭ କଲେଣି । ନବଙ୍କ ହତ୍ୟା ପଛରେ ରାଜନୈତିକ ଓ ବ୍ୟବସାୟିକ ଉଦ୍ଦେଶ୍ୟ ଥାଇପାରେ ବୋଲି ବିରୋଧୀ ଅଭିଯୋଗ କରୁଛନ୍ତି । ଏପରିକି ବିଜେଡି ଦଳରୁ କେହି ତାଙ୍କର ଶତ୍ରୁ ଏଭଳି କରିଥାଇପାରନ୍ତି ବୋଲି ବିରୋଧୀ କହିଛନ୍ତି । ଯାହା ଏବେ ନବଙ୍କ ହତ୍ୟାକାଣ୍ଡ ମାମଲାକୁ ଆହୁରି ସନ୍ଦେହ ଘେରକୁ ଟାଣି ନେଇଛି ।