କନକ ବ୍ୟୁରୋ: ରାଜଧାନୀର ସୁନ୍ଦରପଦା ଅଞ୍ଚଳରେ ଦୀପକ ରାଉତରାୟଙ୍କ ହତ୍ୟାକାଣ୍ଡକୁ ନେଇ ହଇଚଇ । ନୂଆ ବର୍ଷ ଭୋଜିକୁ ବିରୋଧ କରିବାରୁ ଗଡ଼ିଲା ମୁଣ୍ଡ । ବୁଧମଣ୍ଡପ ହଜ୍ ପୋଖରୀ ସୁରକ୍ଷା ଦାୟିତ୍ୱରେ ଥିବା ଦୀପକ ରାଉତରାୟ ନୂଆବର୍ଷ ରାତିରେ ପୋଖରୀ ପାଖରେ ଥିଲେ । ଏହି ସମୟରେ ଏଠାକୁ ଭୋଜି ପାଇଁ ଆସିଥିବା ଦୁଇଗୋଷ୍ଠୀ ମଧ୍ୟରେ ଆରମ୍ଭ ହୋଇଯାଇଥିଲା ପାଟିତୁଣ୍ଡ, ଆଉ ଏହି ଗଣ୍ଡଗୋଳକୁ ବିରୋଧ କରିଥିଲେ ଦୀପକ ।
Kanak News is now on WhatsApp
Join and get latest news updates delivered to you via WhatsApp
ଏହାପରେ ଗୋଟିଏ ଗୋଷ୍ଠୀ ସେଠାରୁ ପଳାଇଯାଇଥିବା ବେଳେ ଅନ୍ୟ ଗୋଷ୍ଠୀର ଯୁବକ ଦୀପକଙ୍କ ଉପରେ ଆରମ୍ଭ କରି ଦେଇଥିଲେ ଆକ୍ରମଣ । ମୁଖ୍ୟ ଅଭିଯୁକ୍ତ କୁହାଯାଉଥିବ ଭିକି ମଲିକା ନିଜ ସାଙ୍ଗଙ୍କ ସହ ମିଶି ପାଇପରେ ପିଟି ପିଟି ଦୀପକଙ୍କୁ ମାରିଦେଇଥିବା ଅଭିଯୋଗ କରିଛନ୍ତି ପରିବାର ଲୋକ । ତେବେ ଘଟଣାସ୍ଥଳରେ ପୋଲିସ ଓ ସାଇଣ୍ଟିଫିକ୍ ଟିମ୍ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ହତ୍ୟାକାଣ୍ଡ ପରେ ଏବେ ଫେରାର ଅଛନ୍ତି ମୁଖ୍ୟ ଅଭିଯୁକ୍ତ କୁହାଯାଉଥିବା ଭିକି ମଲିଆ ଓ ଅନ୍ୟ ୩ ସହଯୋଗୀ । ଭିକି ନାଁ ଅନେକ ଅପରାଧିକ ମାମଲା ରହିଛି । ଏପରିକି ହାତରେ ଖଣ୍ଡା ଧରି ସେ ଫେସବୁକରେ ଛାଡ଼ିଥିବା ଫଟୋ ସାମ୍ନାକୁ ଆସିଛି ।
ସେପଟ ହତ୍ୟାକାଣ୍ଡ ପ୍ରତିବାଦରେ ତାତିଛନ୍ତି ସାଧାରଣ ଲୋକ । ଅଭିଯୁକ୍ତକୁ ଗିରଫ ଦାବିରେ ଟାୟାର ଜାଳି ରାସ୍ତା ଅବରୋଧ କରିଛନ୍ତି । ଜଟଣୀ- ସୁନ୍ଦରପଦା ରାସ୍ତାର ଶଙ୍କର ବଜାର ଛକରେ ବିକ୍ଷୋଭ ପ୍ରଦର୍ଶନ କରାଯାଇଛି । ଏହି ଅଞ୍ଚଳରେ ଦୀର୍ଘଦିନ ଧରି ଉତେଜନା ଲାଗି ରହିଥିଲା, ପୋଖରୀ ନିକଟରେ ତିଆରି ଚାଲିଥିବା ପାର୍କ ଉପରେ ମାଲିକାନାକୁ ନେଇ ଚାଲିଥିଲା ଛକାପଞ୍ଝା । ଆଶଙ୍କା କରାଯାଉଛି ଆଗାମୀ ଦିନରେ ଏହା ଆହୁରି ଉତ୍ତେଜନାମୂଳକ ସ୍ଥିତି ସୃଷ୍ଟି କରିପାରେ । ତେବେ ହତ୍ୟାକାଣ୍ଡ ନେଇ ଏୟାରଫିଲ୍ଡ ଥାନାରେ ମାମଲା ରୁଜୁ ହୋଇଥିବା ବେଳେ ବରିଷ୍ଠ ପୋଲିସ୍ ଅଧିକାରୀମାନେ ଏହି ତଦନ୍ତ କରୁଛନ୍ତି ।