ବିଦେଶ ଗସ୍ତବେଳେ ବିଭିନ୍ନ ପଦାଧିକାରୀଙ୍କୁ ମୋଦୀ ଦେଲେ ଦେଶୀ ଉପହାର, ଜାଣନ୍ତୁ କାହାକୁ ଦେଲେ କେଉଁ ଜିନିଷ
କନକ ବ୍ୟୁରୋ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୦୨୨ ମସିହାରେ ପ୍ରଥମ ଥର ପାଇଁ ବିଦେଶ ଗସ୍ତ କରିଛନ୍ତି । ଏହି ଅବସରରେ ସେ ଡେନମାର୍କ, ଜାପାନ ଓ ଫ୍ରାନ୍ସର ବିଭିନ୍ନ ବରିଷ୍ଠ ପଦାଧିକାରୀଙ୍କ ସହ ଭେଟ କରି ଭାରତ ସହ ସେମାନଙ୍କ ବାଣିଜ୍ୟିକ. ଅର୍ଥନୈତିକ ଓ ବିଭିନ୍ନ ସମସ୍ୟା ଉପରେ ଆଲୋଚନା କରୁଛନ୍ତି । ହେଲେ ସବୁଠାରୁ ବଡକଥା କି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଚଳିତ ବିଦେଶ ଗସ୍ତ ବେଳେ ଭାରତୀୟ କଳାକୃତିର ପ୍ରଚାର ପ୍ରସାର ପାଇଁ ବିଭିନ୍ନ ଭାରତୀୟ ସାମଗ୍ରୀକୁ ସେଠିକାର ପଦାଧିକାରୀଙ୍କୁ ଉପହାର ସ୍ୱରୂପ ପ୍ରଦାନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି କ୍ରମରେ ସେ ସ୍ୱେଡନର ପ୍ରଧାନମନ୍ତ୍ରୀ ମାଗଡେଲେନା ଆଣ୍ଡରସନଙ୍କୁ କାଶ୍ମୀର ପଶ୍ଚିମିନା ଷ୍ଟୁଲ ସହ ପାଇପର ମ୍ୟାଚ ବକ୍ସ ଉପହାର ଦେଇଛନ୍ତି । କହିରଖୁ କି ଏହା କାଶ୍ମୀରର ଏକ ସ୍ୱତନ୍ତ୍ର କଳାକୃତି । ଏହା କାଶ୍ମୀରର ଏକ ସ୍ୱତନ୍ତ୍ର ଛେଳି ଲୋମରୁ ପ୍ରସ୍ତୁତ କରାଯାଇଥାଏ ।
ସେହିଭଳି ଡେନମାର୍କ ଗସ୍ତ ବେଳେ ସେଠିକାର ପ୍ରଧାନମନ୍ତ୍ରୀଙ୍କୁ ମୋଦୀ ଏକ କାନ୍ଥରେ ଟଙ୍ଗା ଯାଉଥିବା କଚ୍ ଏମ୍ବ୍ରୋଡରୀ ଉପହାର ଭାବେ ପ୍ରଦାନ କରିଛନ୍ତି । ସୂଚନା ଥାଉକି ଗୁଜୁରାଟର କଚ ଅଞ୍ଚଳରେ ରହୁଥିବା ଆଦିବାସୀମାନଙ୍କ ଦ୍ୱାରା ପ୍ରସ୍ତୁତ କରାଯାଇଥାଏ ।
ଅନ୍ୟପଟେ ନରୱେ ଗସ୍ତବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନରୱେର ପ୍ରଧାନମନ୍ତ୍ରୀଙ୍କୁ ଏକ ଢାଲ ଉପହାର ଦେଇଛନ୍ତି । ରାଜସ୍ଥାନର କୋଫ୍ଟଗିରୀ କଳାର ଏହା ଏକ ପ୍ରତୀକ ବୋଲି କୁହାଯାଏ । ରାଜା ରାଜୁଡା ଶାସନ ବେଳେ ଏହି ଢାଲକୁ ଯୁଦ୍ଧ ସମୟରେ ରାଜସ୍ଥାନବାସୀ ବ୍ୟବହାର କରନ୍ତି ବୋଲି କୁହାଯାଏ ।
ଫିନଲ୍ୟାଣ୍ଡର ପ୍ରଧାନମନ୍ତ୍ରୀଙ୍କୁ ମୋଦୀ ଏକ ପିତଳର ଗଛ ଉପହାରରେ ଦେଇଛନ୍ତି । ଏହାକୁ ଜୀବନର ଅଭିବୃଦ୍ଧିର ପ୍ରତୀକ ଭାବେ ଗ୍ରହଣ କରାଯାଏ । ଏହି ଗଛର ଶାଖାଗୁଡିକ ଉପରକୁ ଉଠି ବିକଶିତ ହୋଇଥାଏ ।
ଅନ୍ୟପଟେ ଡେନମାର୍କର ରାଜକନ୍ୟାଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏକ ମିନାକାରୀ ପକ୍ଷୀ ଚିତ୍ର ଉପହାର ଦେଇଛନ୍ତି । ଏହା ରୂପାରେ ନିର୍ମିତ ହୋଇଥିବା ବେଳେ ଏହା ବାରଣାସୀର କଳାକୃତି ବୋଲି କୁହାଯାଇଛି ।
ସେହିଭଳି ଡେନମାର୍କର ରାଣୀ ମାଦଗ୍ରେଥେଙ୍କୁ ପ୍ରଧାନମନ୍ତ୍ରୀ ଗୁଜୁରାଟର ପ୍ରସ୍ତୁତ ଏକ ପ୍ରିଣ୍ଟିଙ୍ଗ କପଡା ଉପହାର ଦେଇଛନ୍ତି । ଏହି କପଡା ଉପରେ ସିଝାତେଲ ଓ ପରିବା ଦ୍ୱାରା କିଛି ଚିତ୍ର ଅଙ୍କା ଯାଇଛି ।
କେବଳ ସେତିକି ନୁହେଁ ଛତିଶଗଡର ଡୋକ୍ରା ଆଦିବାସୀଙ୍କ ଦ୍ୱାରା ପ୍ରସ୍ତୁତ ଏକ ମରୟର ଆକୃତିର ଡଙ୍ଗା ବି ସାଥିରେ ନେଇଥିଲେ ପ୍ରଧାନମନ୍ତ୍ରୀ । ଏହାକୁ ସେ ଡେନମାର୍କର ରାଣୀଙ୍କୁ ଉପହାର ଦେଇଛନ୍ତି ।