ଭୁବନେଶ୍ୱରରେ ଖୁଲମଖୁଲା ବୁଲୁଥିଲା ଦୁଷ୍କର୍ମ ଅଭିଯୁକ୍ତ: କୋହଭରା କଣ୍ଠରେ ପୀଡ଼ିତା କହିଲେ, ସେହି କାଳରାତିର କାହାଣୀ
କନକ ବ୍ୟୁରୋ: ରାଜଧାନୀରେ ୧୩ ବର୍ଷ ତଳର ଜଣେ ଦୁଷ୍କର୍ମ ଅଭିଯୁକ୍ତ ବ୍ରଜ କିଶୋର ସ୍ୱାଇଁ ଓରଫ ବାଜିଆକୁ ମହିଳା ଥାନା ପୁଲିସ ଗିରଫ କରିବା ପରେ ଏ ହେଉଛି ପ୍ରେସ ରିଲିଜ୍ । ଏଥିରେ ଲେଖା ଅଛି, ଫେରାର ହୋଇ ଯାଇଥିବା ଅଭିଯୁକ୍ତ କେସ୍ ବନ୍ଦ ହୋଇଥିବା ଭାବି ନିକଟ ଅତୀତରେ ନିଜ ଘରକୁ ଫେରିଥିଲେ । ବିଶେଷ ସୂତ୍ରରୁ ଖବର ପାଇବା ପରେ ଚଢ଼ାଉ କରି ବିଳମ୍ବିତ ରାତିରେ ଅଭିଯୁକ୍ତକୁ ଗିରଫ କରିଛି ମହିଳା ଥାନା ପୁଲିସ ।
Kanak News is now on WhatsApp
Join and get latest news updates delivered to you via WhatsApp
ଗଣମାଧ୍ୟମକୁ ଦିଆଯାଇଥିବା ଏହି ସୂଚନାର ଅର୍ଥ ହେଉଛି, ମାମଲା ଯେତେ ପୁରୁଣା ହେଲେ ବି ତା ଉପରେ ନଜର ରଖିଛି କମିସନରେଟ ପୁଲିସ । କିନ୍ତୁ ଏ ନେଇ ପୀଡ଼ିତା ଯାହା କହିଛନ୍ତି, ତାହା ଚମକାଇ ଦେବା ଭଳି । ତାଙ୍କର ଅଭିଯୋଗ, ଭୁବନେଶ୍ୱରରେ ଅଭିଯୁକ୍ତ ରହି ଆସୁଥିଲେ ବି ପୁଲିସ ତାକୁ ଗିରଫ କରୁନଥିଲା ।
ଦୁଷ୍ମର୍ମ ପୀଡ଼ିତା ଯେଉଁ ଅଭିଯୋଗ ଆଣିଛନ୍ତି କେତେ ଠିକ କେତେ ଭୁଲ, ତାହା ଏହି ଫଟୋଗୁଡିକୁ ଦେଖିଲେ ବୁଝିହେବ । ଯେଉଁ ବାଜିଆକୁ ଫେରାର ଦର୍ଶାଇ ଆସୁଥିଲା ପୁଲିସ, ସେ ଭୁବନେଶ୍ୱରରେ ଖୁଲମଖୁଲା ବୁଲୁଥିଲା । ନେତା, ବିଧାୟକ, କର୍ପୋରେଟରଙ୍କ ସହ ଫଟୋ ଉଠାଇ ଫେସବୁକ୍ରେ ଛାଡୁଥିଲା । ସ୍ଥାନୀୟ ଅଂଚଳରେ ନେତାଗିରି, ମାଫିଆ ଗିରି ଚଳାଉଥିଲା ବାଜିଆ । ତା’ର ଉପସ୍ଥିତି ବିଷୟରେ ସମସ୍ତେ ଜାଣିଥିଲେ, କେବଳ ପୁଲିସ ୧୩ ବର୍ଷ କାଳ ତାର ପତା ପାଉନଥିଲା ।
ବର୍ଷ ପରେ ବର୍ଷ ବିତି ଯାଇଛି, ଜୀବନ ସଂଘର୍ଷରେ ଅନେକ ବାଟ ଆଗେଇ ଆସିଥିଲେ ବି ପୀଡ଼ିତାଙ୍କ ଆଖିରୁ ଲୁହ ଶୁଖୁନି । ସେଦିନର କାଳ ରାତିର କଥା ମନେ ପଡିଲେ ଆଜି ବି କୋହ ରୋକି ହେଉନି ।
ଜାନୁଆରୀ ୧୧, ୨୦୦୯
ରାତି ଅଧରେ ପୀଡ଼ିତାଙ୍କ ଭଡ଼ା ଘର କବାଟ ବାଡେଇଥିଲେ ବାଜିଆଙ୍କ ସମେତ ୩ ଜଣ ଅଭିଯୁକ୍ତ । ସ୍ୱାମୀଙ୍କୁ ମାଡ଼ ମାରି ପୀଡ଼ିତାଙ୍କୁ ଘରୁ ଉଠାଇ ନେଇଥିଲେ । ଗଣଦୁଷ୍କର୍ମ ସହ ପୀଡ଼ିତାଙ୍କୁ ଅକଥନୀୟ ନିର୍ଯାତନା ଦିଆଯାଇଥିଲା । ଏହି କଥା କହିବା ବେଳେ କାନ୍ଦି ପକାଇଥିଲେ ପୀଡ଼ିତା ।
ମାମଲାରେ ଜଣେ ଗିରଫ ହୋଇଥିଲେ । ବାଜିଆଙ୍କ ସମେତ ୨ ଜଣ ଅଭିଯୁକ୍ତ ଫେରାର ହୋଇଥିଲେ । ଅଭିଯୁକ୍ତ ରବି ଓରଫ ବଳଭଦ୍ର ସୁନ୍ଦରାୟ ସଡ଼କ ଦୁର୍ଘଟଣାରେ ପ୍ରାଣ ହରାଇଥିବା ବେଳେ ବାଜିଆ ଖୁଲମଖୁଲା ବୁଲୁଥିଲା । ନ୍ୟାୟ ପାଇବା ପାଇଁ କିଛି ଦିନ ସଂଘର୍ଷ କରିବା ପରେ ଶେଷରେ ଆଶା ଛାଡି ଦେଇଥିଲେ ପୀଡ଼ତା । ୧୩ ବର୍ଷ ପରେ ଗିରଫ ହୋଇଛି ଅଭିଯୁକ୍ତ । ଏବେ ଅପେକ୍ଷା ତାର ପାପ କର୍ମ ପାଇଁ କେବେ ମିଳିବ ସଜା ।