ଆଜି ପବିତ୍ର ବଡଦିନ । ମଧ୍ୟରାତ୍ରୀରେ ଧରାପୃଷ୍ଠକୁ ଓହ୍ଲାଇଲେ ଯୀଶୁ, ସ୍ୱାଗତ କଲେ ଶ୍ରଦ୍ଧାଳୁ ।
କନକ ବ୍ୟୁରୋ : ଚଳଚଂଚଳ ଥିଲା ଚର୍ଚ୍ଚ ପରିସର । ରଙ୍ଗ ବେରଙ୍ଗର ଆଲୁରେ ଝଲସୁଥିଲା ଚର୍ଚ୍ଚ । ସବୁ ଚର୍ଚ୍ଚରେ ଖଚାଖଚ ଭିଡ । ଜାତି,ଧର୍ମ, ବର୍ଣ୍ଣ ନିିର୍ବିଶେଷରେ ସବୁ ବର୍ଗର ଲୋକେ ସାମିଲ ହୋଇଥିଲେ । ଚର୍ଚ୍ଚ ପରିସରରେ ଶୋଭା ପାଉଥିଲା ଖ୍ରୀଷ୍ଟମାସ ଲ୍ୟାମ୍ପ। ଝୁଲୁଥିଲା ଜିଙ୍ଗଲ ବେଲ। ଝଲସୁଥିଲା ବିଭିନ୍ନ ଉପହାର ଖଚିତ ଖ୍ରୀଷ୍ଟମାସ ବୃକ୍ଷ। ମଧ୍ୟରାତ୍ରି ପର୍ୟ୍ୟନ୍ତ ଚର୍ଚ୍ଚରୁ ଭାସି ଆସୁଥିଲା ସମବେତ କାରୋଲ ସଙ୍ଗୀତ। ଶ୍ରଦ୍ଧାଳୁମାନେ ଶୀତକୁ ଖାତିର ନକରି ଯୀଶୁଙ୍କ ବାଣୀ ଶୁଣିବାରେ ମସଗୁଲ ଥିଲେ। ଯୀଶୁଙ୍କ ଜନ୍ମ ବୃତ୍ତାନ୍ତକୁ ବ୍ୟାଖ୍ୟା କରୁଥିଲା ସ୍ୱତନ୍ତ୍ର ଭାବେ ନିର୍ମିତ ଏନ୍ତୁଡ଼ିଶାଳ।
Kanak News is now on WhatsApp
Join and get latest news updates delivered to you via WhatsApp
ବଡ଼ଦିନର ଏହି ମହାର୍ଘ୍ୟ ଅବସରରେ ରାଜଧାନୀର ଚର୍ଚରେ ବିଳମ୍ବିତ ରାତ୍ରି ପର୍ଯ୍ୟନ୍ତ ଲାଗିଥିଲା ଗହଳି ଚହଳି। କେବଳ ଖ୍ରୀଷ୍ଟିଆନ ନୁହନ୍ତି, ଅନ୍ୟ ଧର୍ମ ଓ ଜାତିର ଲୋକେ ଏହି ପବିତ୍ର ମୁହୂର୍ତକୁ ଉପଭୋଗ କରିବା ପାଇଁ ଏହି ସମାରୋହରେ ସାମିଲ ହୋଇଥିଲେ। ଶେଷରେ ମଧ୍ୟରାତ୍ରିରେ ଧରାବତରଣ କଲେ ଭଗବାନ ଯୀଶୁ। ଶ୍ରଦ୍ଧାଳୁମାନେ ଯୀଶୁଙ୍କ ପାଦ ଚୁମ୍ବନ କରି ସେମାନଙ୍କ ଶ୍ରଦ୍ଧା ନିବେଦନ କରିଥିଲେ। ତାଙ୍କୁ ସ୍ୱାଗତ କରିବା ତଥା ଭକ୍ତିଅର୍ଘ୍ୟ ଢାଳିବା ପାଇଁ ରାତି ପ୍ରାୟ ୩ଟା ପର୍ୟ୍ୟନ୍ତ ଚଳଚଞ୍ଚଳ ଥିଲା ସାରା ଖ୍ରୀଷ୍ଟିଆନ ସମ୍ପ୍ରଦାୟ ଓ ଚର୍ଚ୍ଚସମୂହ।
ବଡ଼ଦିନର ଏହି ପର୍ବକୁ ଧୁମଧାମରେ ପାଳନ କରିବା ପାଇଁ ସତ୍ୟନଗରସ୍ଥିତ ‘ଭିନସେଣ୍ଟ କ୍ୟାଥଲିକ ଚର୍ଚ୍ଚ’ରେ ଜମିଥିଲା ଅସମ୍ଭାଳ ଭିଡ଼। ରାତି ପ୍ରାୟ ୧୦ଟାରୁ ଆରମ୍ଭ ହୋଇଥିଲା ସମବେତ କାରୋଲ ଗାନ। ରାତି ୧୧ଟାରୁ ଆରମ୍ଭ ହୋଇଥିଲା ମହାଜାଗରଣି ଦିବ୍ୟଯଜ୍ଞ । ବିଶ୍ୱାସ ଅନୁଯାୟୀ ଠିକ ମଧ୍ୟ ରାତ୍ରିରେ ପ୍ରତୀକଧର୍ମୀ ଗୁହାଳ ଭିତରେ ମଦର ମେରିଙ୍କ ଗର୍ଭରୁ ଯୀଶୁ ଅବତରଣ କରିଥିଲେ । ଏହାପରେ ଆରମ୍ଭ ହୋଇ ଯାଇଥିଲା ଶୁଭେଚ୍ଛାର ପର୍ବ। ପରସ୍ପରକୁ କୋଳାଗ୍ରତ କରି ଜଣାଇଥିଲେ ବଡ଼ଦିନର ଶୁଭେଚ୍ଛା। ପ୍ରାୟ ରାତି ୩.୩୦ ସରିଥିଲା ଏହି ପର୍ବ। ସେହିଭଳି ୟୁନିଟ-୪ ସ୍ଥିତ ଖ୍ରୀଷ୍ଟ ଚର୍ଚ ତଥା ୟୁନିୟନ ଚର୍ଚରେ ମଧ୍ୟ ରାତି ସାଢ଼େ ୧୦ଟାରୁ ମଧ୍ୟରାତ୍ରି ପ୍ରାର୍ଥନା ହୋଇଥିଲା।
ଓଡ଼ିଆ ଓ ଇଂରାଜୀରେ ସଂଗୀତ ଦଳ ପ୍ରାର୍ଥନା ପରିବେଷଣ କରିଥିଲେ। ପରେ ବାଇବେଲ ପାଠ ଓ ପ୍ରାର୍ଥନା କରାଯାଇଥିଲା। ମଦର ମେରିଙ୍କୁ ସ୍ମରଣ କରି ଅନେକ ଖ୍ରୀଷ୍ଟିଆନ ଓ ହିନ୍ଦୁ ଭାଇଭଉଣୀ ମହମବତି ଜାଳିଥିଲେ। ଉତ୍ସବରେ ବିଳମ୍ବିତ ରାତି ଯାଏଁ ସାମିଲ ହୋଇଥିଲେ ହଜାର ହଜାର ଶ୍ରଦ୍ଧାଳୁ। ଏତେ ସଂଖ୍ୟକ ଭିଡ଼କୁ ସମ୍ଭାଳିବା ତଥା ଆଇନଶୃଙ୍ଖଳା ରକ୍ଷା ନିମନ୍ତେ ରାଜଧାନୀର ବିଭିନ୍ନ ଚର୍ଚ୍ଚରେ ୫ ପ୍ଲାଟୁନ ପୁଲିସ ମୁତୟନ ହୋଇଥିଲେ ବୋଲି କହିଛନ୍ତି ଭୁବନେଶ୍ୱର ଡିସିପି ସତ୍ୟବ୍ରତ ଭୋଇ।