କନକ ବ୍ୟୁରୋ : ଅଳ୍ପ ସଂଖ୍ୟକ ଛାତ୍ରଛାତ୍ରୀଙ୍କୁ ଉଚ୍ଚଶିକ୍ଷା ପାଇଁ ମିଳୁଥିବା ମୌଲାନା ଆଜାଦ ନ୍ୟାସନାଲ ଫେଲୋସିପ ବନ୍ଦ କରିଦେଇଛନ୍ତି କେନ୍ଦ୍ରସରକାର । ଏନେଇ କେନ୍ଦ୍ର ସରକାରଙ୍କ ତରଫରୁ ସଂସଦରେ ସୂଚନା ଦିଆଯାଇଛି । ସରକାର ଯୁକ୍ତି ବାଢିଥିଲେ କି ଏହି ଯୋଜନା ଅନ୍ୟ ଯୋଜନାମାନଙ୍କ ଉପରେ ଭାରି ପଡୁଥିବାରୁ ଏହାକୁ ବନ୍ଦ କରାଯାଇଛି । କେନ୍ଦ୍ର ଅଳ୍ପସଂଖ୍ୟକ ମନ୍ତ୍ରୀ ସ୍ମୃତି ଇରାନୀ ଗୁରୁବାର ଦିନ ଲୋକସଭାରେ କେରଳ ଓ ତ୍ରିସୁରର କଂଗ୍ରେସ ସାଂସଦ ଟିଏନ ପ୍ରତାପନଙ୍କ ଏକ ପ୍ରଶ୍ନର ଉତର ଦେଇ ଏଭଳି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରମନ୍ତ୍ରୀ ସ୍ମୃତି ଇରାନୀ କହିଛନ୍ତି କି ମୌଲାନା ଆଜାଦ ଫେଲୋସିପ୍ ଯୋଜନା ବିଶ୍ୱବିଦ୍ୟାଳୟ ଅନୁଦାନ ଆୟୋଗଙ୍କ ଦ୍ୱାରା ଲାଗୁ କରାଯାଇଥିଲା । ୟୁଜିସି ଦ୍ୱାରା ଦିଆଯାଇଥିବା ପରିସଂଖ୍ୟାନ ମୁତାବକ ୨୦୧୪-୧୫ ଓ ୨୦୨୧-୨୨ ମଧ୍ୟରେ ଏହି ଯୋଜନା କ୍ରମରେ ୬,୭୨୨ ଜଣଙ୍କୁ ଚୟନ କରାଯାଇଥିଲା । ଏହାସହ ସେମାନଙ୍କୁ ୭୩୮.୮୫ କୋଟି ଟଙ୍କା ଫେଲୋସିପ୍ ଆକାରରେ ପ୍ରଦାନ କରାଯାଇଥିଲା । ହେଲେ କେନ୍ଦ୍ର ସରକାରଙ୍କ ଦ୍ୱାରା ଛାତ୍ରଛାତ୍ରୀମାନଙ୍କୁ ଦିଆଯାଉଥିବା ଅନ୍ୟ ଫେଲୋସିପ ଉପରେ ଏହି ଯୋଜନା ଭାରି ପଡୁଛି ଓ ଅଳ୍ପସଂଖ୍ୟକ ଛାତ୍ର ଛାତ୍ରୀ ପ୍ରଥମରୁ ଅନ୍ୟ ଯୋଜନାରୁ ଲାଭ ଉଠାଉଛନ୍ତି । ଏହି କାରଣରୁ ୨୦୨୨-୨୩ ଶିକ୍ଷାବର୍ଷରୁ ଏହି ଯୋଜନାକୁ ବନ୍ଦ କରାଯାଇଛି ।
ସୂଚନା ଥାଉକି ମୌଲାନା ଆଜାଦ ରାଷ୍ଟ୍ରୀୟ ଫେଲୋସିପ୍ ଯୋଜନା ୨୦୦୯ ମସିହାରେ ଆରମ୍ଭ କରାଯାଇଥିଲା । ଏହା ଅଧିନରେ ୬ ଟି ଅଧିସୂଚିତ ଅଳ୍ପସଂଖ୍ୟକ ସମୁଦାୟ (ବୌଦ୍ଧ, ଇସାଇ, ଜୈନ, ମୁସଲିମ, ପାର୍ସି ଓ ସିଖ) ସମୁଦାୟର ଛାତ୍ରଛାତ୍ରୀମାନଙ୍କୁ ଏମଫିଲ ଓ ପିଏଚଡି କରିବାକୁ ସରକାର ୫ ବର୍ଷ ପର୍ଯ୍ୟନ୍ତ ଆର୍ଥିକ ସହାୟତା ଯୋଗାଉଥିଲେ ।