ନୃତ୍ୟଗୁରୁଙ୍କ ମୃତ୍ୟୁ କାହାଣୀ । ଦୀପ ପ୍ରଜ୍ୱଳନ ପରେ ମଞ୍ଚ ଉପରେ ଟଳି ପଡିଥିଲେ ଭାରତନାଟ୍ୟମ ଗୁରୁ ଶ୍ରୀଗଣେଶନ୍ ।
କନକ ବ୍ୟୁରୋ: ଗୀତ ଗୋବିନ୍ଦର ତାଳେ ତାଳେ ମଞ୍ଚରେ ଚାଲିଥାଏ ଭରତନାଟ୍ୟମ । ମଞ୍ଚରେ ପ୍ରଦର୍ଶନ କରୁଥାନ୍ତି, ମାଲେସିଆର ଭରତନାଟ୍ୟମ ନୃତ୍ୟଗୁରୁ ଗଣେଶନ ମୁନୁସ୍ୱାମୀ । ହେଲେ କିଏ ଜାଣିଥିଲା ଏହି ମଞ୍ଚ ତାଙ୍କ ଜୀବନର ଶେଷ ମଞ୍ଚ ହୋଇଯିବ । ନୃତ୍ୟ ସାରି ଅନ୍ୟ ଅତିଥିଙ୍କ ସହ ଦୀପ ପ୍ରଜ୍ୱଳନ କଲେ । ହସ ହସ ଚେହେରାରେ ଦର୍ଶକଙ୍କୁ ଜଣାଇଲେ ପ୍ରଣାମ । କିନ୍ତୁ ମାତ୍ର କେଇ ସେକେଣ୍ଡରେ ଟଳି ପଡିଲେ ନୃତ୍ୟ ଗୁର ଗଣେଶନ ମୁନୁସ୍ୱାମୀ । ସଭିଏଁ ଭାବିଲେ ଗୁରୁ ଗଣେଶନ ଅଚେତ ହୋଇପଡିଥିବେ । କିନ୍ତୁ ସେତେବେଳକୁ ଚାଲିଯାଇଥିଲା ପ୍ରାଣବାୟୁ ।
Kanak News is now on WhatsApp
Join and get latest news updates delivered to you via WhatsApp
ଭୁବନେଶ୍ୱର ସ୍ଥିତ ଭଞ୍ଜ କଳାମଣ୍ଡପରେ ଆୟୋଜିତ ରାଷ୍ଟ୍ରୀୟ ଜୟଦେବ ସମାରୋହରେ ଅତିଥି ହୋଇ ଯୋଗ ଦେଇଥିଲେ ଗୁରୁ ଗଣେଶନ । ନୃତ୍ୟ ପରିବେଷଣ କରିବା ପାଇଁ ଆୟୋଜକଙ୍କୁ ନିବେଦନ କରିଥିଲେ । ନୃତ୍ୟ ବି ପରିବେଷଣ କଲେ । ଦର୍ଶକଙ୍କ ତାଳିରେ ପ୍ରକମ୍ପିତ ହୋଇପଡିଥିଲା ପ୍ରେକ୍ଷାଳୟ । ଏହି ମଞ୍ଚରେ ଶ୍ରୀ ଜୟଦେବ ଅନ୍ତର୍ଜାତୀୟ ପୁରସ୍କାରରେ ସମ୍ମାନୀତ ହୋଇଥାନ୍ତେ ଗୁରୁ ଗଣେଶନ । କିନ୍ତୁ ବିଧିର ବିଧାନ କିଛି ଅଲଗା ଥିଲା । ନୃତ୍ୟ ପରିବେଷଣ କରିବାର କିଛି ସମୟ ପରେ ସେ ସଭିଙ୍କୁ ଛାଡି ଚାଲିଯାଇଥିଲେ ଆରପାରିକୁ ।
ନୃତ୍ୟଗୁରୁ ଗଣେଶନ ମୁନୁସ୍ୱାମୀଙ୍କ ପରିବାର କହିଲେ ସେ ତାଙ୍କ ଭଉଣୀ ଓ ତାଙ୍କ ଛାତ୍ରଛାତ୍ରୀ । ମାଲେସିଆର ଶ୍ରୀ ଗଣେଶାଳୟ ଅନୁଷ୍ଠାନରେ ଅନେକ ଯୁବାବର୍ଗ ଏହି ଅନୁଷ୍ଠାନରେ ଭରତନାଟ୍ୟମ ଶିଖୁଛନ୍ତି । ଗୁରୁଙ୍କ ବିୟୋଗରେ ଦୁଖରେ ଭାଙ୍ଗି ପଡିଛନ୍ତି ତାଙ୍କ ଛାତ୍ରଛାତ୍ରୀ । ଚାହିଁ ବସିଛନ୍ତି ଗୁରୁଙ୍କର ଶେଷ ଦର୍ଶନ ପାଇଁ । ଶବ ବ୍ୟବଛେଦ ପରେ ମାଲେସିଆକୁ ପଠାଯିବ ଗୁରୁ ଗଣେଶନଙ୍କ ପାର୍ଥିବ ଶରୀର ।