ସାତକୋଶିଆ ଗଣ୍ଡ ପରିଦର୍ଶନ କଲା ମହାନଦୀ ଟ୍ରିବ୍ୟୁନାଲ ଟିମ୍ : ସ୍ଥିତି ପରଖିବା ସହ ବିଭାଗୀୟ ଅଧିକାରୀଙ୍କ ସହ କଲେ ଆଲୋଚନା; ଆଜି ଚିଲିକା ମୁହାଣ ଦେଖିବେ
କନକ ବ୍ୟୁରୋ : ସାତକୋଶିଆ ବୁଲିଲେ ମହାନଦୀ ଟ୍ରିବ୍ୟୁନାଲ ଟିମ୍ । ସାତକୋଶିଆ ଗଣ୍ଡରେ ଜଳର ସ୍ରୋତ ଓ ଗଭୀରତାର ସ୍ଥିତି ପରଖିବା ସହ ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଛନ୍ତି । ଉଭୟ ଆକାଶ ମାର୍ଗ ଓ ସ୍ଥଳ ପଥରେ ଦୁଇଟି ଟିମ୍ ଟିକରପଡ଼ାରେ ପହଞ୍ଚିଥିଲେ ।
Kanak News is now on WhatsApp
Join and get latest news updates delivered to you via WhatsApp
ମହାନଦୀ ଉପରେ ଛତିଶଗଡ଼ ସରକାର ଏକାଧିକ ବ୍ୟାରେଜ୍ ନିର୍ମାଣ କରିବା ଫଳରେ ଖରାଦିନେ ମହାନଦୀ ଶୁଖିଲା ପଡ଼ୁଛି। ଏଥିପାଇଁ ଓଡ଼ିଶାର ଉପକୂଳ ଅଞ୍ଚଳ ବିଶେଷ ପ୍ରଭାବିତ ହେଉଛି। ଏପଟେ ବର୍ଷାଦିନେ ମହାନଦୀରେ ବନ୍ୟା ଆସି ପ୍ରଳୟ କରୁଛି। ଏହାକୁ ନେଇ ଓଡ଼ିଶା ଓ ଛତିଶଗଡ଼ ଭିତରେ ବିବାଦ ଲାଗି ରହିଥିଲାବେଳେ ସ୍ଥିତି ଅନୁଧ୍ୟାନ ପାଇଁ ଗଠିତ ଟ୍ରିବ୍ୟୁନାଲ୍ର ଅଧ୍ୟକ୍ଷଙ୍କ ସମେତ ୯ଜଣିଆ ଟିମ୍ ଏବଂ ଛତିଶଗଡ଼ର ଏକ ଟିମ୍ ଗତକାଲି ଅପରାହ୍ଣ ପ୍ରାୟ ୨ଟା ବେଳେ ଟିକରପଡ଼ାରେ ପହଞ୍ଚିଥିଲେ ।
ଗୋଟିଏ ଟିମ୍ ହେଲିକପ୍ଟର ଯୋଗେ ଆସିଥିଲେ । ଅନ୍ୟ ସଦସ୍ୟମାନେ ସଡ଼କପଥରେ ଆସି ଟିକରପଡ଼ାରେ ପହଞ୍ଚିଥିଲେ । ଏଠାରେ ଥିବା ବନବିଭାଗର ଅତିଥି ଭବନରେ ଏକ ପାୱାର ପଏଣ୍ଟ ପ୍ରେଜେଣ୍ଟସନ୍ ମାଧ୍ୟମରେ ଟ୍ରିବ୍ୟୁନାଲର ସଦସ୍ୟମାନଙ୍କୁ ସାତକୋଶିଆ ଗଣ୍ଡରେ ବିଭିନ୍ନ ସମୟରେ ରହୁଥିବା ଜଳସ୍ତର ଏବଂ ବର୍ତ୍ତମାନର ସ୍ଥିତି ନେଇ ଅବଗତ କରାଯାଇଥିଲା । ମହାନଦୀର ଗଣ୍ଡ ନେଇ ଟ୍ରିବ୍ୟୁନାଲକୁ ସବିଶେଷ ତଥ୍ୟ ପ୍ରଦାନ କରାଯିବା ପରେ ସେମାନେ କ୍ଷେତ୍ର ପରିଦର୍ଶନରେ ଯାଇଥିଲେ ।
ଡଙ୍ଗାରେ ଭାଗ ଭାଗ ହୋଇ ମହାନଦୀର ଜଳରାଶି ଦେଖିବା ସହ ପାଣିର ସ୍ତର ନେଇ ରହିଥିବା ଚିହ୍ନ ସବୁ ଅନୁଧ୍ୟାନ କରିଥିଲେ । ସେହିପରି ଟିକରପଡ଼ାରେ ଥିବା କେନ୍ଦ୍ରୀୟ ଜଳ ଆୟୋଗର କର୍ମକର୍ତ୍ତାଙ୍କ ସହ ଆଲୋଚନା କରିଥିଲେ। କାର୍ଯ୍ୟାଳୟ ନିକଟରେ ଜଳସ୍ତର ନେଇ ମଧ୍ୟ ସେମାନେ ଅନୁଧ୍ୟାନ କରିଥିବା ଜଣାପଡ଼ିଛି । ଏପଟେ ଟିକରପଡ଼ାର ରାମସାର୍ ସାଇଟ୍ ମଧ୍ୟ ପରିଦର୍ଶନ କରିଛନ୍ତି ଟ୍ରିବ୍ୟୁନାଲ ।
ଆଜି ପୁରୀ ଜିଲ୍ଲାକୁ ଦୁଇ ଦିନିଆ ଗସ୍ତରେ ଯିବେ ଟିମ୍ । ଏହି ଅବସରରେ ଚିଲିକା ହ୍ରଦ ସହ ଚିଲିକା ଓ ସମୁଦ୍ରର ମିଳିନ ସ୍ଥଳୀ ବୁଲି ଦେଖିବେ । ଦୟା ଓ ଭାର୍ଗବୀର ଚିତ୍ର ମଧ୍ୟ ଦେଖିବେ । ସୂଚନା ଅନୁସାରେ ମହାନଦୀ ଟ୍ରିବ୍ୟୁନାଲର ୩୨ ଜଣିଆ ଟିମ୍ ଆଜି ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରିବେ ।