ଆଇପିଏଲ ମହାସମର : କ୍ୱାଲିଫାୟର-୨ରେ ମୁମ୍ବାଇ; ୮୧ ରନରେ ପରାସ୍ତ ହେଲା ଲକ୍ଷ୍ନୌ ସୁପରଜାଏଣ୍ଟସ
କନକ ବ୍ୟୁରୋ : ମାଧୱାଲଙ୍କ ମ୍ୟାଜିକରେ ଏଲିମିନେଟର ଜିତିଲା ମୁମ୍ବାଇ ଇଣ୍ଡିଆନ୍ସ । ୮୧ ରନରେ ଲକ୍ଷ୍ନୌ ସୁପରଜାଏଣ୍ଟସକୁ ପରାସ୍ତ କରିଛି ଦଳ । ପ୍ରଥମେ ବ୍ୟାଟିଂ କରି ମୁମ୍ବାଇ ୮ ୱିକେଟ୍ ହରାଇ ୧୮୨ ରନ୍ ସଂଗ୍ରହ କରିଥିଲା । ଜବାବରେ ଲକ୍ଷ୍ନୌ ୧୦୧ ରନ୍ କରି ଅଲ୍ଆଉଟ୍ ହୋଇଯାଇଥିଲା । ୫ ୱିକେଟ୍ ନେଇ ବିଜୟର ପ୍ରମୁଖ ଭୂମିକା ଗ୍ରହଣ କରିଥିଲେ ଆକାଶ ମାଧୱାଲ ।
Kanak News is now on WhatsApp
Join and get latest news updates delivered to you via WhatsApp
ଚେନ୍ନାଇର ଏମ୍ଏ ଚିଦାମ୍ବର ଷ୍ଟାଡିୟମ୍ରେ ଖେଳାଯାଇଥିବା ଏଲିମିନେଟର ମ୍ୟାଚ୍ରେ ମୁମ୍ବାଇ ଇଣ୍ଡିଆନ୍ସ ପକ୍ଷରୁ ଧାର୍ଯ୍ୟ ୧୮୩ ରନ୍ର ଲକ୍ଷ୍ୟକୁ ପିଛା କରି ଲକ୍ଷ୍ନୌ ୧୬.୩ ଓଭର ସୁଦ୍ଧା ୧୦୧ ରନ୍ରେ ଅଲ୍ଆଉଟ୍ ହୋଇଯାଇଥିଲା । ମାଧୱାଲ୍ଙ୍କ ସହ ଅନ୍ୟମାନଙ୍କ ଶୃଙ୍ଖଳିତ ବୋଲିଂ ଯୋଗୁଁ ଲକ୍ଷ୍ନୌ ବିପର୍ଯ୍ୟୟରେ ବୁଡ଼ି ରହିଥିଲା । କେବଳ ମାର୍କସ ଷ୍ଟୋଇନିସ୍ ୪୦ ରନ୍ କରି ଧିରେଧିରେ ରନ୍ ଗତି ବଢ଼ାଇବାକୁ ଚେଷ୍ଟା କରୁଥିଲେ ବି ଦ୍ବାଦଶ ଓଭରରେ ରନ୍ ଆଉଟ୍ ହେବାରୁ ଲକ୍ଷ୍ନୌର ସବୁ ଆଶା ମଉଳି ଯାଇଥିଲା ।
ଏଥିପୂର୍ବରୁ ପ୍ରଥମେ ବ୍ୟାଟିଂ କରିଥିବା ମୁମ୍ବାଇ ଇଣ୍ଡିଆନ୍ସ ୭ ୱିକେଟ୍ ବିନିମୟରେ ୧୮୨ ରନ୍ ସଂଗ୍ରହ କରିଥିଲା। ଈଶାନ କିଶନ ଓ ରୋହିତ ଶର୍ମା ପ୍ରଥମରୁ ୧୦.୦୦ ହାରରେ ରନ୍ ସଂଗ୍ରହ କରୁଥିଲେ। କିନ୍ତୁ ଆଫ୍ଗାନୀ ବୋଲର ନବୀନ ଉଲ୍ ହକ୍ ଓ ୟାଶ ଠାକୁର ଉଭୟଙ୍କୁ ପାୱାର ପ୍ଲେ ଭିତରେ ଆଉଟ୍ କରିଥିଲେ। ତଥାପି କାମେରନ୍ ଗ୍ରିନ୍ ଓ ସୂର୍ଯ୍ୟକୁମାର ଯାଦବ ଦଳକୁ ବିପର୍ଯ୍ୟୟରୁ ଉଦ୍ଧାର କରି ତୃତୀୟ ୱିକେଟ୍ରେ ୬୬ ରନ୍ ଯୋଡ଼ିଥିଲେ। ହେଲେ ୧୧ତମ ଓଭରରେ ନବୀନ ପୁଣି ଥରେ ଗ୍ରିନ୍ ଓ ସୂର୍ଯ୍ୟଙ୍କୁ ଗୋଟିଏ ବଲ୍ ବ୍ୟବଧାନରେ ଆଉଟ୍ କରି ଲକ୍ଷ୍ନୌକୁ ବଡ଼ ସଫଳତା ଦେଇଥିଲେ। ତିଳକ ବର୍ମା କିଛି ଆକର୍ଷଣୀୟ ସଟ୍ ଖେଳି ଦଳକୁ ୧୫୦ ପାର୍ କରାଇଥିଲେ ବି ଲମ୍ବା ସମୟ ପର୍ଯ୍ୟନ୍ତ ତିଷ୍ଠି ପାରିନଥିଲେ।
ଲକ୍ଷ୍ନୌକୁ ପରାସ୍ତ କରି ଆଇପିଏଲ୍-୨୦୨୩ର ଦ୍ୱିତୀୟ କ୍ୱାଲିଫାୟରରେ ପ୍ରବେଶ କରିଛି ମୁମ୍ବାଇ । ଆସନ୍ତାକାଲି ଦ୍ୱିତୀୟ କ୍ୱାଲିଫାୟରରେ ମୁମ୍ବାଇ ଓ ଗୁଜରାଟ ମଧ୍ୟରେ ମୁକାବିଲା ହେବ । ପୂର୍ବରୁ ପ୍ରଥମ କ୍ୱାଲିଫାୟର ଜିତି ଫାଇନାଲରେ ପ୍ରବେଶ କରିଛି ଚେନ୍ନାଇ ସୁପର କିଙ୍ଗସ୍ । ଏବେ ଦ୍ୱିତୀୟ କ୍ୱାଲିଫାୟର ବିଜେତା ଦଳ ଆସନ୍ତା ୨୮ ତାରିଖରେ ଚେନ୍ନାଇ ସହ ଫାଇନାଲ ଖେଳିବ ।