ପ୍ରତ୍ୟେକ ଆଠ ଜଣରେ ଜଣେ ଅନିଦ୍ରାର ଶିକାର, ଜାଣନ୍ତୁ ଭଲ ନିଦର ନୂଆ ଫର୍ମୁଲା ।
କନକ ବ୍ୟୁରୋ: ଭଲ ନିଦ ମଣିଷକୁ ସକ୍ରିୟ କରାଏ । ମଣିଷକୁ କଳାତ୍ମକ କରାଏ । ମଣିଷକୁ ଦୟାଳୁ ବନାଏ । କେବଳ ଏତିକି ନୁହେଁ ଭଲ ଜୀବନସାଥୀ, ଭଲ ମାଆ ତଥା ଭଲ ବାପା ହେବାରେ ମଧ୍ୟ ସାହାର୍ଯ୍ୟ କରେ । ଏ କଥା କହିଛନ୍ତି, ଦି ସ୍ପିଲ ପ୍ରେସକ୍ରିପସନର ଲେଖକ ଡା ଏରିକ ପ୍ରେଥର । ଏରିକ ବର୍ତ୍ତମାନ କାର୍ଲିଫର୍ଣ୍ଣିଆ ବିଶ୍ୱବିଦ୍ୟାଳୟରେ ମନୋବିଜ୍ଞାନ ବିଭାଗରେ କାର୍ଯ୍ୟରତ ରହିଛନ୍ତି । ତେବେ ଆମେ ପଚାରିବାକୁ ଚାହୁଁଛୁ କଣ ରାତିରେ ଆପଣକୁ ଭଲ ନିଦ ହେଉଛି? ଯଦି ନିଦ ଠିକରେ ହେଉନାହିଁ ତେବେ କଣ ଉପାୟ ଅଛି ଭଲ ନିଦ ପାଇଁ?
Kanak News is now on WhatsApp
Join and get latest news updates delivered to you via WhatsApp
ଡାକ୍ତର ଏରିକ ନିଦ ପାଇଁ ମେଡିସିନ ନେବାକୁ ସମ୍ପୂର୍ଣ୍ଣ ବାରଣ କରିଛନ୍ତି । ତେବେ ରିସର୍ଚ୍ଚରୁ ଜଣାପଡିଛି ଯେ, ବିଶ୍ୱର ପ୍ରତ୍ୟେକ ଆଠ ଜଣରେ ଜଣେ ବ୍ୟକ୍ତି ଅନିଦ୍ରା ବା ନିଦ୍ରାହୀନତାର ଶିକାର ହେଉଛନ୍ତି । ତେବେ ସେହି ଅଷ୍ଟମ ବ୍ୟକ୍ତି ଆପଣ କିମ୍ବା ଆପଣଙ୍କର କେହି ସହଯୋଗୀ ନୁହନ୍ତି ତ? ଏହି ପ୍ରଶ୍ନ ଏଥିପାଇଁ ଜରୁରୀ କାରଣ, ନିଦ ଠିକରେ ପୂରା ନହେବା ଦ୍ୱାରା ଆପଣଙ୍କ ଦିନ ପ୍ରଭାବିତ ହୋଇଥାଏ । ନ୍ୟୁୟର୍କ ଟାଇମ୍ସର ରିପୋର୍ଟ ଅନୁସାରେ ରାତିରେ ନିଦ ପୂରା ନହେବା କାରଣରୁ ଲୋକଙ୍କ କାମ କରିବାର କ୍ଷମତା ହ୍ରାସପାଉଛି । ତେବେ ଭଲ ନିଦ ପାଇଁ ଅନେକ ଉପାୟ ରହିଛି । ଡାକ୍ତର ଏରିକ ମଧ୍ୟ ଭଲ ନିଦ ପାଇଁ କିଛି ଉପାୟ କହିଛନ୍ତି ।
ଭଲ ନିଦ ପାଇଁ ଆପଣ ସନ୍ଧ୍ୟା ସମୟରେ ପୌଷ୍ଟିକ ଏବଂ ହାଲୁକା ଜଳଖିଆ ଗ୍ରହଣ କରନ୍ତୁ । ଭଲ ନିଦ ପାଇଁ ଆପଣଙ୍କୁ ଚା ଏବଂ କଫି ଠାରୁ ନିଜକୁ ଦୂରେଇ ରଖିବାକୁ ପଡିବ । ଶୋଇବାର ୬ ଘଣ୍ଟା ପୂର୍ବରୁ ଚା କିମ୍ବା କଫି ସେବନ କରନ୍ତୁ ନାହିଁ । ଏହା ଛଡା ଆପଣ ବୁଲାବୁଲି, ଗୀତ ଶୁଣିବା, କଳାତ୍ମକ କାମ କରିବା ତଥା ନିଜ ବନ୍ଧୁ ଏବଂ ପରିବାରଲୋକଙ୍କ ସହ କଥା ହେଲେ ଭଲ ନିଦ ଆସିପାରିବ ।
ଘରେ ଥିବା ନିଦକୁ ଭିତରର ସାଜସଜ୍ଜା ମଧ୍ୟ ପ୍ରଭାବିତ କରିଥାଏ । ଶୋଇବା ସ୍ଥାନ କିମ୍ବା ଖଟକୁ ଏପଟ ସେପଟ କରିବା ଦ୍ୱାରା ମଧ୍ୟ ନିଦ ଉପରେ ପ୍ରଭାବ ପଡିଥାଏ । ସେହିଭଳି ପ୍ରତ୍ୟେକ ଦିନ ଗୋଟିଏ ଜାଗାରେ ସେହି ସମାନ ଢଙ୍ଗରେ ଶୋଇବା ଦ୍ୱାରା ମଧ୍ୟ ନିଦ ଖରାପ ହୋଇଥାଏ । ଯଦି କିଛି ଅସୁବିଧା ହେଉଛି ତେବେ ଆପଣ ସେହି ଅସୁବିଧାକୁ ଲେଖିବାର ଅଭ୍ୟାସ କରନ୍ତୁ । ଏହା କରିବା ଦ୍ୱାରା ଭଲ ନିଦ ଆସିପାରିବ ।
ଭଲ ନିଦ ପାଇଁ ଶୋଇବା ଘରର ତାପମାତ୍ରା ମଧ୍ୟ ଠିକ୍ ରହିବା ଦରକାର । ଶୋଇବା ସମୟରେ ଘରକୁ ଥଣ୍ଡା ରଖିବା ଜରୁରୀ । ଲାପଟପ, କମ୍ପ୍ୟୁଟର ନରଖିବା ହିଁ ଭଲ । ଚେଷ୍ଟା କରନ୍ତୁ ଶୋଇବା ସମୟରେ ମୋବାଇଲ ନିଜ ଠାରୁ ଦୂରେଇ ରଖନ୍ତୁ । ରୁମକୁ ଅନ୍ଧାରରେ ରଖିବା ମଧ୍ୟ ନିହାତି ଆବଶ୍ୟକ । ରୁମରେ ଆଲୁଅ ଜଳିବା ଦ୍ୱାରା ନିଦରେ ବାଧା ଦେଖାଦେଇଥାଏ । ଅନ୍ଧାରକୁ ଅନୁଭବ କରିବା ପାଇଁ ଆପଣ ସ୍ଲିପ୍ ମାସ୍କ ମଧ୍ୟ ବ୍ୟବହାର କରିପାରିବେ ।
ସେହିଭଳି ଶୋଇବା ବେଳେ ମୁଣ୍ଡକୁ ଥଣ୍ଡା ରଖିବା ନିହାତି ଜରୁରୀ । ତେଣୁ କାମ ଶେଷ କରିବା ପରେ ନିଜକୁ ସମୟ ଦିଅନ୍ତୁ । ନିଜର ପସନ୍ଦର ଟିଭି ସୋ ମଧ୍ୟ ଆପଣ ଦେଖିପାରିବେ । ଯଦି ଶୋଇବାର ୨୦ ମିନିଟ ମଧ୍ୟରେ ଆପଣଙ୍କୁ ନିଦ ଆସୁନାହିଁ ତେବେ ଆପଣ ଛାତ ଉପରେ କିମ୍ବା ନିଜ ଘର ବାରଣ୍ଡାରେ ଟିକେ ବୁଲାବୁଲି କରନ୍ତୁ । ନିଜର ମନପସନ୍ଦର ବହି ପଢିବା ମଧ୍ୟ ଭଲ ଅଭ୍ୟାସ । ଏହି ଉପାୟ କରିଲେ ଆପଣ ଗୋଟିଏ ଭଲ ନିଦ ପାଇପାରିବେ ।