ଯିଏ ଢାଞ୍ଚା ତିଆରି ଜାଣିଛି, ସିଏ ଭଲ ମୂର୍ତ୍ତି ବି କରିପାରିବ । ସୁଯୋଗ ମିଳିଛି, ଗୋଲ କରିବୁ : ଜୟନାରାୟଣ ମିଶ୍ର
କନକ ବ୍ୟୁରୋ : ବିଜେପି ପାଇଁ ସୁଯୋଗ ସୃଷ୍ଟି ହୋଇଛି, ଆଉ ଆମେ ତାହାର ଫାଇଦା ନେବୁ, ଗୋଲ କରିବୁ । ବିଜେପି ଚାଣକ୍ୟ ଅମିତ ଶାହାଙ୍କ ଗୁରୁମନ୍ତ୍ର ପରେ ଗଣମାଧ୍ୟମ ସାମ୍ନାରେ କିଛି ଏଭଳି ଦୃଢୋକ୍ତି ରଖିଛନ୍ତି ବିରୋଧୀ ଦଳ ନେତା ଜୟନାରାୟଣ ମିଶ୍ର । ସେ କହିଛନ୍ତି, ଓଡିଶାକୁ ଭାରତୀୟ ଜନତା ପାର୍ଟି ତାର ଫୋକସ ରଖିଛି । ବଂଶଲ ଜଣେ ସଫଳ ସଂଗଠକ, ଉତ୍ତର ପ୍ରଦେଶରେ ବିଜେପି ଦୁଇ ଦୁଇ ଥର ସରକାର ଗଠନ କରିବାରେ ତାଙ୍କର ବଡ଼ ଅବଦାନ ରହିଛି । ବଂଶଲ ଓଡିଶାରେ ସଂଗଠନର ମାର୍ଗଦର୍ଶନ କରିବେ ଏବଂ ତାଙ୍କ ଯୋଜନା ଅନୁଯାୟୀ ଦଳ ଆଗକୁ ବଢିବ ଏବଂ ବିଜେପି ରାଜନୈତିକ ସଫଳତା ପାଇବ । ସେହି ଲକ୍ଷ୍ୟରେ ତାଙ୍କୁ ଅଣାଯାଇଛି ବୋଲି କହିଛନ୍ତି ଜୟନାରାୟଣ ।
Kanak News is now on WhatsApp
Join and get latest news updates delivered to you via WhatsApp
ବଂଶଲ ଆସିଲେ ସବୁ କିଛି କରିଦେବେ ବୋଲି କହୁନାହିଁ କିନ୍ତୁ ଗୋଟେ ପଲିସି କରିପାରିବେ, ଢାଞ୍ଚା ତିଆରି କରିପାରିବେ, ସେଥିରେ ଯେଉଁ ମାଟି ପକାଇବ ସେ ମୂର୍ତ୍ତି ତିଆରି ହେବ । ଯିଏ ଢାଞ୍ଚା ତିଆରି ଜାଣିଛି ସେ ଭଲ ମୂର୍ତ୍ତି ବି ତିଆରି କରିପାରିବ । ଫୁଟବଲ ଖେଳରେ ପ୍ରଥମରୁ ଆକ୍ରମଣ କିଏ କରିବ କିଏ ନ କରିବ ତାହା ଦଳର ଷ୍ଟ୍ରାଟେଜି ଉପରେ ନିର୍ଭର କରେ । କିଏ ପ୍ରଥମରୁ ଆକ୍ରମଣ କରେ ତ ପୁଣି କିଏ ସୁଯୋଗ ଅପେକ୍ଷାରେ ଥାଏ । ତେବେ ଗୋଲ କରିବାକୁ ସୁଯୋଗ ମିଳିଲେ ଆକ୍ରମଣକୁ ଜୋରଦାର କରିବା ଆବଶ୍ୟକ । ଆଉ ଏବେ ଆମ ପାଖକୁ ଗୋଲ କରିବାର ସୁଯୋଗ ଆସିଛି , ନିଶ୍ଚୟ ଗୋଲ ମାରିବୁ ଆଉ ଏଥିରେ କୋଚର ଭୂମିକା ବହୁତ ଗୁରୁତ୍ୱପୁର୍ଣ, କାରଣ କୋଚ ହିଁ ଷ୍ଟ୍ରାଟେଜି ତିଆରି କରିବ, ଆମେ କେଉଁ ମାଧ୍ୟମରେ ଖେଳିବୁ କୋଚ ନିଷ୍ପତ୍ତି ନେବେ ।
ଏହାସହ ବିଜେପି ଚାଣକ୍ୟଙ୍କ ଗୁରୁମନ୍ତ୍ର ବାବଦରେ ଜୟନାରାୟଣ କହିଛନ୍ତି, ଅମିତ ଶାହାଙ୍କ ତାଗିଦ ବିଷୟରେ ଜାଣିନି, କିନ୍ତୁ ସଫଳ ସଂଗଠନ ପାଇଁ ମନ୍ତ୍ର ଦେଇଛନ୍ତି । ତାଙ୍କ କଥା ଅନୁସାରେ ସଙ୍ଗଠନକୁ ଆହୁରି ସୁଦୃଢ ଓ ଶକ୍ତିଶାଳୀ କରିବୁ । ତିନି ବର୍ଷ ଭିତରେ ଯାହା ହୋଇଥିଲା ଆଉ ଦୁଇ ବର୍ଷରେ ତାକୁ ବ୍ୟାପକ ଭାବେ କରିବୁ । ଲୋକଙ୍କ ଆସ୍ଥା ଭାଜନ ହେବାସହ ଲୋକଙ୍କ ସମସ୍ୟାର ସମାଧାନ କରିବାକୁ ଶାହା ମନ୍ତ୍ର ଦେଇଥିବା କହିଛନ୍ତି ଜୟନାରାୟଣ । ଏହାପୂର୍ବରୁ ଓଡ଼ିଶା ଗସ୍ତରେ ଆସି ଅମିତ ଶାହା ଯେଉଁ ବୟାନ ରଖିଥିଲେ ତାହାକୁ ନେଇ ରାଜ୍ୟ ରାଜନୀତିରେ ଜୋରଦାର ଚର୍ଚ୍ଚା ହୋଇଥିଲା । କାରଣ ଓଡ଼ିଶାରେ ଶାସନ କ୍ଷମତାକୁ ବିଜେପି ଫେରିବ ବୋଲି ଶାହା ଦମ୍ଭ ସହକାରେ କହିଥିଲେ । ଯାହା ତୃଣମୂଳସ୍ତରରେ ବିଜେପି କର୍ମୀଙ୍କ ମନରେ ଜୋଶ ଭରିଛି ଓ ୨୦୨୪ ସାଧାରଣ ନିର୍ବାଚନ ପୂର୍ବରୁ ସଙ୍ଗଠନକୁ ସୁଦୃଢ କରିବାକୁ ବଳ ଯୋଗାଇଛି । ତେବେ ଶାହା ଓ ଜୟନାରୟଣଙ୍କ ଦମ୍ଭୋକ୍ତି ଭୋଟରଙ୍କୁ କେତେ ମାତ୍ରାରେ ପ୍ରଭାବିତ କରି ପାରୁଛି ତାହା ଦେଖିବା ବାକି ରହିଲା ।