ସମ୍ବଲପୁରରେ ଇଣ୍ଟରନେଟ୍ ଫେଲ। ବରଗଡ଼ରେ ହୋଟେଲ ଫୁଲ୍।
କନକ ବ୍ୟୁରୋ: ସମ୍ବଲପୁରରେ କର୍ଫ୍ୟୁ ବଳବତ୍ତର ରହିବା ଓ ଇଂଟରନେଟ ସେବା ବନ୍ଦ ରହିବାର ପାଶ୍ୱର୍ ପ୍ରଭାବ ଦେଖିବାକୁ ମିଳିଛି । ୭ ଦିନ ହେବ ସହରରେ ଇଂଟରନେଟ୍ ସେବା ବନ୍ଦ ଥିବାରୁ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି ଲୋକେ । ବିଶେଷକରି ଯେଉଁମାନେ ଅନଲାଇନରେ କାମ କରନ୍ତି, ସେମାନେ ସମସ୍ୟାର ସମ୍ମୁଖୀନ ହୋଇଛନ୍ତି । ଆଉ କାମ କରିବା ପାଇଁ ଏବେ ବରଗଡ ମୁହାଁ ହୋଇଛନ୍ତି । ବରଗଡ ସହରର ବିଭିନ୍ନ ହୋଟେଲରେ ରହି ଅନଲାଇନରେ କାମ କରୁଛନ୍ତି । କେବଳ ଅନ୍ଲାଇନ୍ କାମ ପାଇଁ ନୁହେଁ, ଯେଉଁମାନେ ଅନଲାଇନରେ ପାଠ ପଢୁଛନ୍ତି, ସେମାନେ ମଧ୍ୟ ବରଗଡ ଆସି ହୋଟେଲ୍ରେ ରହି ପାଠ ପଢୁଥିବା କହିଛନ୍ତି ହୋଟେଲ ବ୍ୟବସାୟୀ ।
Kanak News is now on WhatsApp
Join and get latest news updates delivered to you via WhatsApp
କୁଚିଣ୍ଡାରେ ମଧ୍ୟ ଇଂଟରନେଟ୍ ବନ୍ଦ ରହିଥିବାରୁ, ସେହି ଅଂଚଳର ଲୋକେ ଝାରସୁଗୁଡାର ମାଲିଡିହି ଅଂଚଳର ରାସ୍ତାକଡରେ ବସି ନେଟ୍ ଖୋଜୁଥିବା ଦେଖିବାକୁ ମିଳିଛି । କିଏ ଗଛ ମୂଳେ ବସି କାମ କରୁଛି ତ ଆଉ କିଏ ରାସ୍ତାକଡରେ ବସି ମୋବାଇଲ ଓ ଲାପଟପରେ କାମ କରୁଛନ୍ତି ।
କେବଳ ସାଧାରଣ ଲୋକ ନୁହଁନ୍ତି, ଇଂଟରନେଟ ଆସୁନଥିବାରୁ ଜିଲ୍ଳାର ପଡୋଶୀ ବରଗଡ ଜିଳ୍ଲାକୁ ଯାଇ କାମ କରୁଛନ୍ତି ସରକାରୀ କର୍ମଚାରୀ । ସରକାରୀ କାମ କରିବା ପାଇଁ ସମ୍ବଲପୁର ପୌର ପରିଷଦର କର୍ମଚାରୀଙ୍କୁ ଇଂଟରନେଟ୍ ସୁବିଧା ସହ ସ୍ୱତନ୍ତ୍ର କୋଠରୀ ଯୋଗାଇ ଦେଇଛି ବରଗଡ଼ ପୌର ପରିଷଦ ।
ସମ୍ବଲପୁରରେ ଶାନ୍ତି ଫେରାଇ ଆଣିବା ପାଇଁ ଉଦ୍ୟମ ଜାରି ରଖିଛି ପ୍ରଶାସନ । ଲଗାତାର ଭାବେ ଦୁଇ ସମ୍ପ୍ରଦାୟର ଲୋକମାନଙ୍କୁ ନେଇ ଆଲୋଚନା କରୁଛି ଜିଲ୍ଲା ପ୍ରଶାସନ । ଆଉ ଖୁବ୍ ଶୀଘ୍ର ସ୍ଥିତି ସ୍ୱାଭାବିକ ହେବ ବୋଲି କହିଛନ୍ତି, ଜିଲ୍ଲାପାଳ । ତେବେ ସହରରେ ବ୍ରଡବ୍ୟାଣ୍ଡ ଓ ୱାଇଫାଇ ସେବା ଫେରିଛି । କିନ୍ତୁ ଆହୁରି ୪୮ଘଂଟା ପର୍ଯ୍ୟନ୍ତ ମୋବାଇଲ ଫୋନ ଇଂଟରନେଟ ସେବାକୁ ବନ୍ଦ ରଖିବାକୁ ପ୍ରଶାସନ ନିଷ୍ପତି ନେଇଛି ।