ସରକାରଙ୍କୁ ବିଶେଷଜ୍ଞଙ୍କ ପରାମର୍ଶ, ୪୦ ରୁ ଅଧିକ ବୟସ୍କ ଲୋକଙ୍କୁ ଦିଆଯାଉ ବୁଷ୍ଟର ଡୋଜ
କନକ ବ୍ୟୁରୋ : କରୋନାର ନୂଆ ଭାରିଆଣ୍ଟ ଓମିକ୍ରନ ବିପଦ ଦେଖାଦେବା ପରେ ଏହା ଉପରେ ନଜର ରଖିଥିବା କମିଟିର ବିଶେଷଜ୍ଞମାନେ ବୁଷ୍ଟର ଡୋଜକୁ ନେଇ କେନ୍ଦ୍ର ସରକାରଙ୍କୁ ପରାମର୍ଶ ଦେଇଛନ୍ତି । ବିଶେଷଜ୍ଞମାନେ ସରକାରଙ୍କୁ କହିଛନ୍ତି କି କରୋନାର ବଦଳୁଥିବା ସ୍ୱରୂପ ଏବେ ଲୋକମାନଙ୍କୁ ଅଧିକ ବିପଦକୁ ଟାଣିନେଇ ପାରେ । ତେଣୁ ଦେଶରେ ଥିବା ୪୦ ବର୍ଷରୁ ଅଧିକ ବୟସ୍କଙ୍କୁ କୋଭିଡ ଟିକାର ବୁଷ୍ଟର ଡୋଜ ଦେବାକୁ ସରକାର ବିଚାର କରିବାର ସମୟ ଆସିଛି । କହିରଖୁ କି ବର୍ତମାନ ସୁଦ୍ଧା ଭାରତରେ ୨ ଜଣଙ୍କ ଠାରେ କରୋନାର ଓମିକ୍ରନ ଭାରିଆଣ୍ଟ ଦେଖିବାକୁ ମିଳିଛି । ଆଇଏନଏସଏସିଓଜି ତାର ସପ୍ତାହିକ ବୁଲେଟିନରେ କହିଛି କି ଟିକା ନେଇ ନଥିବା ଲୋକଙ୍କୁ ତୁରନ୍ତ ଟିକା ଓ ୪୦ ବର୍ଷରୁ ଅଧିକ ବୟସ୍କ ଲୋକଙ୍କୁ କୋଭିଡ ଟିକାର ବୁଷ୍ଟର ଡୋଜ ଦେବା ଉପରେ ସରକାର ବିଚାର କରନ୍ତୁ । ଏହାସହ ବୟସ୍କ ଓ ରୋଗୀମାନଙ୍କୁ ଏନେଇ ପ୍ରାଥମିକତା ଦିଆଯାଉ ବୋଲି ବିଶେଷଜ୍ଞ ଟିମ୍ ସରକାରଙ୍କୁ ପରାମର୍ଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆଇଏନଏସଏସିଓଜି ତାର ସାପ୍ତାହିକ ବୁଲେଟିନରେ କହିଛନ୍ତି ଜନସ୍ୱାସ୍ଥ୍ୟ ପଦକ୍ଷେପକୁ ସକ୍ଷମ କରିବା ପାଇଁ ଏହିପରି ଭାରିଆଣ୍ଟର ଉପସ୍ଥିତି ଚିହ୍ନଟ କରିବା ପାଇଁ ଜିନୋମିକ୍ ନିୟାମକ ଗୁରୁତ୍ୱପୂର୍ଣ୍ଣ ହେବ । ଏହାସହ ସର୍ବାଧିକ ବିପଦ ସଂକୁଳ ଅଞ୍ଚଳ ଓ ବିଦେଶରୁ ଫେରୁଥିବା ଲୋକଙ୍କ ଉପରେ ସରକାର ସମ୍ପୂର୍ଣ୍ଣ ନଜର ରଖିବାର ଆବଶ୍ୟକତା ରହିଛି ।
ଉଲ୍ଲେଖଯୋଗ୍ୟ, ଆମେରିକା ଓ ବ୍ରିଟେନ ନିଜ ନିଜ ଦେଶରେ ୪୦ ରୁ ଅଧିକ ବୟସ୍କ ଲୋକଙ୍କ ପାଇଁ ବୁଷ୍ଟର ଡୋଜକୁ ଅନୁମୋଦନ କରିସାରିଛନ୍ତି । ଆମେରିକାର ଶୀର୍ଷ ସଂକ୍ରାମକ ରୋଗ ବିଶେଷଜ୍ଞ ଆନ୍ଥୋନୀ ଫୋସି କହିଛନ୍ତି କି, ସର୍ବୋତ୍ତମ ସମ୍ଭାବ୍ୟ ସୁରକ୍ଷା ପ୍ରଦାନ କରିବା ପାଇଁ ସମ୍ପୂର୍ଣ୍ଣ ଟିକା ଦିଆଯାଇଥିବା ବୟସ୍କ ଲୋକଙ୍କୁ ବୁଷ୍ଟର ଡୋଜ ଦିଆଯିବା ଉଚିତ ।